مصر موتورز مجتمع السيارات - دعوة لكل الاعضاء00 أجعل نفسك معروفا للاخرين

السلام عليكم يا شباب ... ايه اخباركم اتمنى تكونو كلكم تمام و زى الفل و مش بردانين :)

النهاردة حبيت اشارك فى حلقة التعارف و يا ريت كل اعضاء المنتدى الكرام يشاركو فيها
العربية ... شيفروليه كابريس LTZ موديل 2004
العربية معايا بقالها حوالى سنتين و نص
كان معايا قبلها المرسيدس الزلمكة و بعدين بعتها و كنت ناوى اجيب مرسيدس عيون
بس طبعا كنت هجيبها مستعمل لأن الجديد غالى جدا دورت كتير و ملقيتش عربية بالحالة اللى انا عاوزها
لأن المرسيدس كانت معايا بقالها 3 سنين و عرفت كل اعطالها و مشاكلها و طبعا مميزاتها الكتير
بس لما مالقيتش مرسيدس حالتها زى ما انا عايز جبت الكابريس دى عربية كويسة وواسعة و موتورها قوى
بس و اتوكلت على الله و جبتها
مميزات العربية:
قوة الموتور الغبية 8 سلندر 5700 سى سى 330 حصان و اللى بتخلينى ادوس مع اى حد بقلب جامد
وسع و رحابة السيارة
اسعار قطع الغيار معقولة
فيها وسائل امان كويسة و اوبشنز كويسة
عيوب العربية:
طبعا استهلاك البنزين بالمقارنة مع اصحابى اللى معاهم كورولا او لانسر مثلا بستهلك قدهم حوالى 4 مرات
الثبات على السرعات العالية مش عاجبنى و كمان عزل الصوت الخارجى مش عاجبنى
من الاخر كدة (مرسيدس و بس )

بفكر اغيرها طبعا و ارجع للمرسيدس بس لازم يكون موتورها كبير يعنى 500 او على الاقل 350
و يا سلام لو كانت ML500 الشكل الجديد ارزقنا يا رب :)
بس هنا فى الكويت للأسف العربيات بتتباع بسعر التراب يعنى ممكن ابيعا بنص تمنها بعد سنتين و نص استعمال و مش هينفع خالص اجيب العربية اللى انا عايزها بالتمن ده لانها لسة غالية
و اخيرا اليكم الصورة يا اعزائى و فى انتظار مشاركاتكم