مصر موتورز مجتمع السيارات - البومة او الصني .. عن تجربة شخصية

ايوه ..
انا برده كان عندي الاتنين ..
فاكريني ..
انا اللي لسه مقارن بين الافيو و اللوجان و اللانوس ..
و انا و بحمد الله الظروف خليتني اجرب عربيات كتير ..
يعني والدي بعد ما لبسني في الافيو بتاعته بعد ما بيعت الابيزا بتاعتي ( اللي اكيد هاعملها موضوع منفصل كله قصايد حب و هيام و عشق :fun_36_3_9[1]:) علشان خاطره..
راح هو جاب اللانسر شامبين اتوماتيك GLX 2008 خليجي زيرو ..
و بعديها بسنتين جوز اختي جاب الصني المانيوال فضي 2010 زيرو ..
و بعدها بشهرين سافر و سابها مركونة عندي .. و كنت باخدها مشوار كده كل اسبوع علشان احركها ..
و هكذا بسبب الجراج اللي تحت بيتنا سقت الصني ..
و موش الصني بس ده انا سقت ( السيفيا - البيكانتو - الجيتز - الاونو - المرسيدس "85"- فولفو "89") و كلها عربيات كانوا اصحابي او قرايبي لما بيسافروا بيسيبوهالي احركها ..:fun_car:
المهم نرجع للبومة و الصني ..
واحد يسألني سؤال ..
انت ليه بتقارن بينهم .. الصني فئة و اللانسر فئة تانية ..
فاقوله .. الصني بقى سعرها 104 الف جنيه و الانسر سعرها 114 الف جنيه ..
يعني فرق 10 الاف جنيه بس ..
يعني استعباط النيسان الرسمي خلاها في نفس الفئة مع البومة تقريبا .. و كده تبقى المقارنة عادلة و البقاء للاقوى في حلبة السومو الياباني دي ..
و نبدأ المقارنة ..
اللانسر ..عربية ياباني و انا اللي اصريت انها تيجي خليجي لاني دايما بحب اشتري العربية معمولة في بلدها .. سمعتها زي الجنيه الدهب في المحروسة .. و انا اعتقد انهم زي ما انتخبوا الخنفسة عربية الشعب في المانيا احنا هنا هننتخب اللانسر عربية الشعب في مصر .. و في موديلات مشيت و في موديلات كوعت .. و اشهر اللي مشيت البطة و البومة .. و اشهرت اللي كوعت المكواة و الشارك .. و البومة انتشرت بشكل غير طبيعي في مصر و ده ان دل على شيئ فهيدل على ان العربية زي الفل لانه في شعبنا الجميل ده مبقاش في حد اهبل خلاص ..
الصني .. عربية ياباني متجمعة هنا في مصر بقالها 11 سنة هنا زي ما هي .. بشوية تغييرات بسيطة في الشكل الخارجي ( خبراء الصني هنا ممكن يقولوها لينا ) و تغييرات لا تذكر داخل العربية .. مشهورة انها ياباني و عربية حمارة شغل و تشيل متقولش لأ .. منتشرة و بكثرة في مصر ( موش زي اللانسر ) و ان كان دائما بيشفعلها رخص سعرها و احتلال مكان سعري في السوق المصري بلا منافس في فئتها ( و مازالت كذلك )..

و لازم قبل التفاصيل تسأل نفسك يعني ايه ياباني ..
يعني سواقة ممتعة .. و عربية عملية ..بتوفر الاوبشن اللي انت محتاجه و بس.. و معمرة جدا جدا.. و جراية ..
و كعادة الياباني في جميع انواعه ..
بينزل الشكل الجديد و يشوف رد فعل الناس عليه ..
و لو حلو .. بينام عليه سبع عشر سنين كده :smileW4:
ده طبعا غير الكوري خالص ..

الموتور .. في كل منهما 1600 سي سي و ياباني الصنع ..
بس موتور اللانسر و تقفيل اللانسر الميكانيكي تم تحديثه تكنولوجيا في بلدها مع تغيير شكلها الخارجي ..
النيسان .. بقاله 11 سنة زي ما هو ..
احساس السواقة ..
دايما باحط البند في مقارناتي ..
مع انه شيئ محسوس اكتر منه موصوف ..
بس مهم جدا في العربية ..
اللانسر جمييييييييييييييييييييييي ييييييييييييييييييييييييي ييييييييييييييلة ...
هدية من اليابان الى مصر ..
احسن من عربيات كتير حتى في نفس فئتها ..
و ده رأي الشخصي ..
احسن من السيراتو ( سقتها من واحد صاحبي ) و الاوبترا ( واحد صاحبي تاني) و الميجان ( كنت بجربها علشان اشتريها ) ..
من اكتر العربيات اللي هتسمتع بسواقتها ..
و تشجعك .. على سواقة التيوتا و الهوندا ربنا يكرمنا و نسوقهم يا رب ..
باحب اسوقها جدا و كل شوية لازم اتحجج لبابا و اخدها منه في مشوار :smileW4:
اما الصني ..
فخيبة امل فظيعة ..
انا اول ما جوز اختي سابها فرحت جدا و قلت فرصة نجرب و حش تاني من وحوش الياباني الجامدين ..
و ركبت .. و منبهرتش ..
متضايقتش .. بس منبهرتش ..:w6w200504112236376d
عادية جدا .. مفرقتش على الافيو كتير يعني..
العفشة ..
نقطة تفوق اللانسر العظمى ..
عفشة و لا اجمل و لا احسن و لا اروع ..
ناااااااااااااااااااعمممم مممممممممممممممة
و علو مظبوط على الارض .. لا عالية و لا واطية ..
و مفيش احساس بالطريق خااااااااااالص ..
و حمالة اسية ..
الصني ..
عفشتها ناشفة سنة بس موش سيراتو يعني ..
و العربية عالية و مظبوطة على الارض ..
بس للاسف حاسس بالطريق .. بالحفر و النقر و الطوب و الزلط ..
و موش ناعمة اوي ..
اما قوة تحملها فده سؤال يجيب عنه وحوش الصني .. مقعدتش معايا كتير ..
السحب ..
اللانسر اتوماتيك ..
الكيك دوان بتاعها رائع ..
جراية .. بس برده موش سيراتو و لا النترا ..
النيسان مانيوال ( و سقت الاتوماتيك مرة في طابا ) سحبها متوسط ..
اقل من اللانسر برده .. و هي مانيوال ..
الثبات ..
اللانسر ما شاء الله ثابتة و راسية حتى على السرعات العالية ..
الصني برده ثباتها موش وحش .. و ممكن تتفوق على اللانسر هنا ..
التكييف ..
هنا تتفوق الصني ..
و ان كان مستواه في الصني متوسط ..
يعني فعلا مستواه في اللانسر اقل من المتوسط ..
في الحر لازم في الصني على 3 او 4 ..
في اللانسر لازم 4 ..
و بيقعد يصفر و يصوصو و فلتر الهوا بتاعه لازم يتنضف كل شوية ..
الاتنين موش كويسين اوي فيه ..
استهلاك البنزين ..
اللانسر متوسطة .. بتعمل 230- 250 في الصفيحة حسب الظروف ..
النيسان .. جهز فلوسك :1336:
ماسورة و ضربت .. بالعافية 180 للصفيحة و من غير تكييف كمان ..
الصني اكتر 1600 انا شفته بيستهلك بنزين يا اخوانا ..
العزل و صوت العربية..
اللانسر هاااااااادية
و عزلها اكتر من رائع ..
اقفل ازازك و شغل تكييفك و كاسيتك و انسى الدنيا بره .. و خصوصا انك موش حاسس بالطريق تحتيك ..
النيسان .. ضايعة في النقطة دي nononono
القعدة ..
من حيث الراحة في الكراسي ..
اللانسر مرييييييييييييييييييييييي يييييييييييييييييييحة ..
و واسعة و مريحة من جوه ..
الصني :fun_36_1_30[1]:
ضيقة جدا .. و القعدة ورا متعبة ..
تصميم ردئ .. كل الطول ده و العربية ضيقة فعلا ..
و من حيث الراحة .. اللانسر قعدتها مريحة و جميلة ..
النيسان برده مريحة .. بس موش زي اللانسر ( طبعا الكلام ده في الكراسي اللي قدام )
التابلوه و الخامات الداخلية ..
التابلوه الياباني عامة عملي ..
عدادين و تكييف و مكان للكاسيت و شكرا ..
موش زي الاوروبي كده مليان حركات ..
و الخامات في اللانسر شيك جدا ..
و في الصني رغم انه تقفيل مصري بس برده شيك جدا ..
و بالنسبة لل display
انا شايف انه في النيسان احسن ..

بس التابلوه و الابنوس و التقفيل الداخلى في اللانسر متناغم اكتر
و خصوصا انه العربية بتنزل بالكاسيت الاصلي بتاعها ..
موش الكينووود اللي تحس انه ملزوق على تابلوه النيسان ده ..
الاوبشن
انا اعتقد - و موش متأكد - انه السوبر صالون هيبقى فيها اوبشن اكتر من البومة..
بس كلها حاجات هايفة موش هتفرق ..
باركينج سينسور و اشارة في المراية و حاجات من كده ..
انا برده اعرف انه البومة ستب ترونيك دلوقتي ..( مالوش لازمة )
بس معرفش فيها ايه بي اس و لا لأ ..
بس موش هيفرقوا جامد عن بعض ..
الامان
الاتنين نفس تجهيزات الامان تقريبا ( بفرض وجود الايه بي اس )
و ان كنت انت بتحس اتوماتيك انه اللانسر متفوقة تكنولوجيا على الصني ..
الشكل الخارجي
الاتنين شكلهم كما هو منذ قديم الازل :smileW4:
و ان كنت انا - و ده رأي شخصي - بحب اللانسر اكتر
و شايفها اكثر انسيابية من الصني المكعبرة دي ..
التوكيل ..
انا كنت بتعامل مع الرواس ..
و طبعا مع الرواس انت متكدر لازم تصحى 6 الصبح علشان تروح بدري لانه مفيش حجز بالتليفون و مصر كلها ما شاء الله معاها لانسر ..
و الانيل من كده ..
دول بيصلحوا عربيات ماركات تانية فيه ..
ما شاء الله الناس اللي هناك فاهمة و عاملة سمعة بس هو اساسا صغير و موش ناقص زحمة..
و قطع غيارها موش رخيصة طبعا ..
بس معمرة جدا جدا جدا جدا ...
و مرة رحت الحرفيين في مشوار للافيو فوجئت بكمية الناس اللي شغالين فيها هناك ..
و كمية العربيات اللي متقطعة هناك ..
و كمية قطع الغيار الاسيتراد هناك .. في كل حاجة هناك .. كل حاجة ..
اما بالنسبة للنيسان ..
فانا متاعملتش مع التوكيل مباشرة ..
و اسمع انه قطع غياره اغلى .. و ده - سماعي -
و ان كنت رحت مع واحد صاحبي مرتين كده .. و مرتحتش للطريقة و لا التعامل الصراحة..
اعادة البيع ..
موش محتاجة كلام كتير ...
لانسر طبعا ..
جنيه دهب ..
و تفضل ماسكة سعرها طول ما حالتها كويسة ..
النيسان تقيلة طبعا ..
بس موش رينو مثلا ..
و ليها زبونها ..

طيب ..
قارنا بين العربيات ..
و النتيجة ..
احنا يا اخوانا بنقارن ما بين السما و الارض ..
السما ب 114 الف جنيه
و الارض ب 104 الف جنيه ..
اللانسر تتفوق في كل شيئ ..
سواقة و عفشة و سحب و متانة و تكنولوجيا و عزل و استهلاك بنزين و متعة في سواقة العربية ..
اللانسر ياباني ..
تحببك في الياباني و تخليك تدخل في الحزب اللي بيقولك بلا كوري بلا صيني ..
و ان فاتك الياباني موش هيرجع تاني ..
البومة عربية جميلة بجد و محبوبة في مصر و هتفضل ليها مكانتها ..
الصني ..
موش وحشة..
و موش ياباني ..
لا ضيقة اوي و لا واسعة ..
لا جراية و لا راسية ..
لا ناعمة و لا رياضية ..
لا شيك اوي و لا وحشة ..
عربية نص نص ..
عربية رمادية الاتجاهات ..

بس خد بالك ..
الاتوماتيك بتاعها ب 94 الف ( موش السوبر صالون )
و في السعر ده ..
لا يوجد لها منافس........
السكالا و الريو و الجين تو و البيرسونا و البيرليانس ..
كله ميقدرش يقف قدام الصني ..

فانا رأيي انه اذا كان معاك 95 الف بس- موش هتقدر تزودهم بمليم- يبقى هي الصني و مفيش غيرها ..
و لو ناوي تجيبها مانيوال ب 90 الف جنيه وفر 20 الف من فلوسك و هاتلك لوجان و لا لانوس اوفرلك و موش هتفرق - هي هتفرق طبعا - بس موش الفرق الرهيب اللي يستحق 20 الف جنيه..

اما لو ناوي تجيب ام 105 الف يبقى تتصرف و تعمل قرد و تروح تشوفلك10 الاف و لا 15 الف يخلوك تجيب عربية تانية احلى ميييييييييييييييييييييييي يييييت مرة من الصني في كل حاجة ..

و لو بتفكر في البومة لا تتردد ..
عربية هتدخل قلبك و هتحبها يعني هتحبها ..
:vctry: :fun_36_3_9[1]: :Bravo: GIFT4U :36_3_1:
و مستني اسمع رأيكم ..
و تقبلوا سلامي جميعا ..