|
عاوز اجيب عربية 128 بس محتاج اعرف شوية حاجات
السلام عليكم انا ناوي ان شاء الله اجيب عربية 128 في حدود 15 الف كنت عاوز اعرف لو العربية متظبطة من كلة وكل حاجة جديدة فيها هصرف عليها كام في الشهر اعطال؟ بالتقريب طبعا وكنت عاوز اسأل بخصوص تحويل الموتور لغاز بدل البنزين ايه النظام فيه انا جديد فالعربيات ولسه معرفش حاجة الصراحة بس محتاج عربية تساعدني في مشاوري وطبعا مش هسافر بيها مسافات كبيرة |
رد: عاوز اجيب عربية 128 بس محتاج اعرف شوية حاجات
اقتباس:
المبلغ كويس يشتريلك حاجه كويسه ان شاء الله وبالنسبه للمبلغ اللى هتصرفوا عليها من اصلاحات فوالله هو مش محدد بالظبط لانها بتبقى حاجه انت ونصيبك ولكن عموما نقدر نقول ان ليها حد ادنى بيتصرف على اصلاحات كل شهر تقدر تقول اقل مبلغ هتصرفوا عليها شهريا 50 جنية ده من غير زيوت او بنزين انا بتكلم على اصلاحات وممكن المبلغ يعلى عن كدا لان ال 128 عموما اعطالها بتبقى كتير لاكثر من سبب زى قطع الغيار المضروبة اللى مغرقه السوق مثالا وان المالك اللى قبلك ممكن يكون مهمل فيها كعادة 95% من الشعب المصرى وربنا يوفقك ان شاء الله |
رد: عاوز اجيب عربية 128 بس محتاج اعرف شوية حاجات
شكرا جزيلا لردك وافادتي طب بالنسبة لتغير الموتور من بنزين لغاز مافيش معلومات عنه وهيكلف كام؟
|
رد: عاوز اجيب عربية 128 بس محتاج اعرف شوية حاجات
اقتباس:
هو ينفع بس فعلا بلاش الغاز للعربيات القديمة كلها مشكله لا تنتهى معها وهيوريك الويل وكده كده ال 128 تستخدم معاها بنزين 80 وهتبقى بتوفر برضوا وهتبقى شغالة كويس بس الغاز فعلا هيتعبك جامد وهيبقى مصاريف على الفاضى بالنسبه لكل السيارات القديمة |
رد: عاوز اجيب عربية 128 بس محتاج اعرف شوية حاجات
اصل سمعت كلام ان بنزين 80 مش متوفر فالمحطات حاليا والحومة هتلغية وطبعا بنزين 90 غالي
|
رد: عاوز اجيب عربية 128 بس محتاج اعرف شوية حاجات
مفيش مبلغ ثابت انت ونصيبك
يعنى ممكن تغير جوز مساعدين امامى ب 400 جنيه فى مره وممكن شهر يعدى عليك من غير ما تغير حاجه بس وانت بتشترى العربيه اهم حاجه فيها ان انت تاخد سمكرى ثفه معاك ويتأكد من ان العربيه مش واكلاها البارومه واماكن البارومه المعروفه فى ال 128 هى الكارتيرات الخلفيه والدواسات بعد كده بقى كل حاجه هتغيرها فى العربيه هتبقى بتغيرها ليك وهتاخد قراءة العداد بحيث تعرف ميعاد تغييرها التقريبى بالنسبه بقى لاى عربيه قديمه هتشتريها يبقى اول حاجه تعملها انك تغيير السيور سير الكاتينه وسير الدينامو وسير التكييف ان وجد وتغيير الفلاتر ( فلتر بنزين وفلتر زيت وفلتر هواء ) وتشيل معاك احتياطى دائما سلك دبرياج علشان ده من المشاكل المتكرره فى ال 128 هو انقطاع سلك الدبرياج وبالتوفيق |
| الساعة الآن 10:43 PM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017