|
مـــشـــــكلة فــى الدبـــانـــــة BMW E36
السلأم عليكم ورحمة الله وبركاته
ياجماعة بالله عليكم أنا عاوز نصيحة من القلب لأخوكم لأنى لسة شارى e36 أمبارح وهى فابريكة برة وجوة وحالة المتور ممتازة بس الراجل اللى جبتها منه كان غطاء الريداتير بايظ وهو مش مغيره , رحت أشتريته من الحرفين وركبته بنفسى ولكن للأسف زودت مية والعربية مبطلة وسخنة فكانت النتيجة دخول هواء للمتور ووصول مؤشر الحرارة للعلأمة الحمرة ووقوف مستمر للسيارة وعدم تقبل الغيارات وخاصة أن أمبارح كان اليوم حر جداً والدائرى كان واقف,, الحمد لله أنها ماجبتش وش سليندر , واحد ميكانيكى فى الشارع بص عليها وشفط الهواء بعد ما كسر قميص المروحة وكان عاوز 150 جنيه ولما قلت له ممعايش غير 15 جنيه فأخد الحتة البلأستيك اللى هى مابين وش العربية وأول قميص المروحة وكمان خد حتة البلأستيك اللى مخرمة واللى هى فى أخر المتور بتاعة تكيف الهواءت تحت المساحات ,, واخدهم كهرهن عشان أديلو 100 جنيه كمان *هل ياترى الحاجات دي من غيرها العربية تسخن ؟ 1- عاوز أظبط كمان أشحن التكيف 2- عاوز أشغل السقف الكرباء لأنه بيعلق وكمان المريات فاصلة كهرباء الأتنين ومش شغالين 3- عاوز أغير بلية شمال خلفية وأبص على العفشة وأركب تيل أمامى واركب بوجيهات وأغير زيت متور وفلتر بس مش عارف هل هاحتاج أغير زيت باور وزيت فرامل , انا معنديش مشكلة فى الباور بس فى ناس بتقول لأزم تغيره هو وزيت الفرامل 4- عاوز أركب زينون وجهاز gps ,dvd 5- أه وفى حاجة كمان مهمة قوى قوى وهى أنى عاوز أخد هواء وأكشف على دورة التبريد وكمان أحط العربية على الجهاز كشف . تنصاحونى أروح عند منصور بى أم ,, ولأ أروح ورش ,, ولو هاروح ورش أروح عند مين لأنى بصراحة كاره الصنايعية كلهم بعد موقف أمبارح الرخم ده ,, وأزاى بيتم الأتفاق مع الصنايعية , يعنى أحدد سعر المصناعية الأول ولأ فى الأخر سامحونى أصل أول مرة بتعامل مع ورش وصنايعية وأول مرة أركب مستعمل شاكر جداً ليكم جميعاً وياريت بالله عليكم اللى جرب ورشة وبثق فيهم يكتب ويقول رأيه بصراحة لأن الموضوع ده زى ما هو مهم بالنسبة لى فهو برده مهم لناس تانية كتير ,, وجزاكم الله خيراً |
رد: مـــشـــــكلة فــى الدبـــانـــــة BMW E36
يا باشا روح لمنصور على ضمانتى هيحل المشكلة الاساسية ان شاء الله ويكشفلك على العربيه ويقولك محتاجة شغل ايه مستقبلا وبكام كل حاجة كقطع غيار ولو عايز هيجبهالك عايز تجيبها انت مفيش مشكلة وفى المصنعيات قنوع جداً انا اخر مرة كنت عندة كان الكمبيوتر عامل عطل فى الريداتير وكنت جاى من اسكندرية وقولت الموتور هيطير منى روحتله غير كوعة وطبه مية تمنهم عدى 400 جنية وخد مصنعية ايده 50 جنية مع انهم خدو فيها شغل زيادة عن ساعة علشان الفيبر الكتير اللى فى الحوض فكه وتركيبه وطبعاً ساعة قبلها انتظار لسحب الهواء وظبط الدورة واعادة الكشف على الكمبيوتر ومسح العطل
بس للامانة انت غلطت فى الاول اصلا انك اشتريت العربيه من غير ما تربط مع ميكانيكى وخدها نصيحة بعد كده فى البى ام لازم تظبط ميكانيكى ويبقى صاحبك وحبيبك وكفائه والا هتتعب اوى مع الصنايعية اللى انت بالنسبالهم زبون زائر خاصة اللى ملوش فى البى ام اصلا وبيتعامل مع زبونها انه زبون :1281F1~121: |
رد: مـــشـــــكلة فــى الدبـــانـــــة BMW E36
اقتباس:
|
رد: مـــشـــــكلة فــى الدبـــانـــــة BMW E36
طمنا ايه الاخبار
|
رد: مـــشـــــكلة فــى الدبـــانـــــة BMW E36
ربنا يوفقك اخي الكريم
:CONGRA~238: |
رد: مـــشـــــكلة فــى الدبـــانـــــة BMW E36
ياجماعة أنا أسف جداً عن الأنقطاع عن الرد والتواصل معكم لأن كان الكمبيوتر بايظ وأنا ماكنتش تقريباً متواجد فى البيت على مدار الأسبوع اللى فات كله وتقريباً كده تقدروا تقولوا بايت فى الحرفين مع العربية , أولأ ً أنا بشكر الجميع على التواصل وتقديم المساعدة وربنا يجعله فى ميزان حسناتكم , بالنسبة للعربية أنا رحت لمنصور عشان العفشة وتم تغير الطنابير وتيل الفرامل والجلب والبيض وأخد مصنعية تركيب 150 جنيه بس كان فى أشتغالأت من ناحية تانية , يعنى تركيب البطاحات فى ورشة مجاورة أتكلف 20 جنيه وتركيب الجلب والبيض فى ورشة أخرى 70 جنيه (أشتغالأت) وأكرامية صنايعى أسمه كارم 20 جنيه ومش عجباه مع أنه عمل عليا شغل ب 100 جنيه وأكتر لأن قطع الغيار بتجبها من محل على ناصية الشارع اللى فيه منصور والصنايعى بيكلم بتوع قطع الغيار فى التليفون ويقول لهم ان الناس دى من طرفى , ده غير أنه بيطلب كمان 20 جنيه ثمن أجرة الموتسيكل اللى وصل الواد الصبى عشان يركب الجلب والبيض فى المقص فوق ال 70 جنيه اللى أخدها , بصراحة حاجة تزهق ومش عارف ليه منصور ميبقاش عنده المكن ده ويركب الحاجات دى فى ورشته بدل شغل الصنايعية اللى مش حلو ده !! , وناصيحة لوجه الله ياريت اللى هيغير حاجة يكشف الأول وبعدين يروح يجيب الحاجة من الحرفين ويجى تانى يوم عشان يركبهم ,.. كهرباء العربية عملتها عند واحد أسمه محمود الكهربائى فى الحرفين وهو شاب صغير بس محترف وكان شغال مع عادل منصورة , عمل ضفيرة جديدة للتكيف وشال كل الأسلأك اللى ملهاش لأزمة حوالين الكشفات وبدلها بأخرى جديدة من الضفيرة وركب دراع المساحات وشغل المرايات وركب مروحة التكيف وشال القديمة المكسورةبالأضافة الى أنه ركب فيوز جديدة (عدد15) وخد 630 جنيه بس بصراحة خد شغل من الساعة 2 للساعة 10 بالليل , رحت بعدها اكشف على التكيف بس فى حتة بعد المرج الجديدة فى ورش عند حتة أسمها القلج , وكان فى ثقبين واحد فى الخرطوم وده شاله وركب واحد امريكى ثمنه100 جنيه وفى ثقب تانى كان فى السربانتينة من الجنب وده كان صعب جداً لحامه بالنار وكان صعب أكتر أنى أروح الحرفيين وأجيب واحدة جديدة فتم لحامها بحاجة أسمها أرانديل وده عبارة عن أنبوبتين بيتم خلطهم مع بعض ولونها شفاف وهى مادة قوية جداً فى اللحام وتمنها 5 جنيه بتتجاب من عند أى موان وبتزيد صلأبتها مع السخونية اللى خارجة من الموتور ولحد الأن بقالها أربع أيام وكل يوم بخرج بالعربية ومشاوير طويلة وزحمة ووقوف متكرر وشغالة بفضل الله زى الفل والتكيف تمام , والراجل خد منى بعد الفصال 380 جنيه لأنه قام بشحن التكيف ونظف دورة التبريد بالفريون وبصراحة الخراطيم نززلت طين ووساخة شديدة جداً وشال الخرطوم البايظ وركب واحد جديد .. فى حاجة كمان نسيت أكتبها
أشتريت ريداتير أستيراد ب 500 جنيه مروحة تكيف ب 270 جنيه قلب بالماتور بتاعه للمريات الكهرباء ب 70 جنيه للواحد دراع مساحات ب 100 جنيه أويل سيل ناقل الحركة ب 30 جنيه ماركة فيبى وأخر للفتيس بس مش عارف ماركته من ممدوح عبد الفتاح مقاس 40\55\8 وده ثمنه 25 جنيه وتم تركيبهم ب 100 جنيه عند محمد قطب شريك منصور اللى فى الحرفين وعلى فكرة هو عصبى شوية ورخم فى مشكلة واحدة بس وهى أستهلأك البنزين عالى شويتين ومش عارف ايه حل المشكلة دى ياريت حد يفيدنى؟!! |
رد: مـــشـــــكلة فــى الدبـــانـــــة BMW E36
حمدلله على سلامة العربيه وربنا يكفيك شرها :140109~347: |
| الساعة الآن 08:37 AM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017