|
سؤال فى كهرباء السيارة و نصائح قبل السفر
السلام عليكم و رحمة الله و بركاته
ازيكم يا رجالة مصر موتورز؟ عاملين ايه ؟؟؟ يا رب تكونو بخير جميعا عندى سؤال بعد اذنكم فى الكهريا بتاعت العربية أنا مغير دينامو العربية من شهر و نص تقريبا بس مركبه تجارى مش أصلى لأن الأصلى ان سعره غالى جدا جدا (حوالى 2400 جنيه مصرى ) و الحمد لله اشتغلت العربية كويس بقالى كام يوم اول ما اشغل العربية كل النور اللى فيها بيرعش (اللى جوة و اللى برة حتى نور العددات) و يفضل يرعش لحد ما اسخن العربية و اطلع بيها بعد م امشى بشوية الرعشة دى بتروح و جربتها النهاردة و انا وقف دوست بنزين جامدقوى فا الرعشة راحت و مارجعتش بعد ما شلت رجلى من على البنزين و العربية كانت سخنة و رحت كشفت على الدينامو و البطارية لقيتهم تمام عند اول واحد و ماعرفش سبب الرعشة و قالى اروح افحصها كمبيوتر و تانى وحد ربط البطارية كويس فالرعشة فضلت موجودة قالى شان الدينامو مش أصلى و قالى امشى بيها كدة مش هتأثرعلى حاجة و انا بصراحة اتضايقت من الاتنين حسيت انهم مش فاهمين خصوصا ان كلها شهر و نازل بالعربية بإذن الله تعالى من الكويت لمصر ... فا ماينفعش اسافر كدة و انا قلقان من حاجة فا يا ريت لو حد من الشباب يقد يدينى نصيحة بخصوص موضوع الكهرباء ده يبقى ليه ألف شكر و يا ريت لو حد عنده نصايح بخصوص السفر للمسافات الطويلة دى ابقى شاكر له جدا وياريت لو المهندس يونس نيسان يقدر يقولى اى تعليمات اقدر اقوم بيها و كمان يا شباب لو ا حد محتاجحاجة من الكويت انا تحت أمركم و ألف شكر ليكم يا احلى شباب و نشوفكم على خير ان شاء الله |
رد: سؤال فى كهرباء السيارة و نصائح قبل السفر
فينكم يا اسانذة المنتدى
|
رد: سؤال فى كهرباء السيارة و نصائح قبل السفر
يا رب حد يفيدنى :)
|
رد: سؤال فى كهرباء السيارة و نصائح قبل السفر
يا كيمو اولاً تيجى بالسلامة ان شاء الله
بخصوص عيب الكهرباء اوعدك اسأل الكهربائى بتاعى عنة انهارده اما عن نصائح السفر فدية بعض الموضوعات اللى ممكن تفيدك نصائح قبل السفر ... نصائح هامة في السفر نصائح طبية قبل السفر آداب السفر معدات السفاري ( بالصور والاسعار) |
رد: سؤال فى كهرباء السيارة و نصائح قبل السفر
تسلملى يا ابو نورا يا رب و يا ريت تخلو مقابلة شهر 6 بعد 20 منه علشان اقدر احضرها معاكم
و الف شكر يا باشا على تعبك و سؤالك للكهربائى ... ربنا يجزيك كل خير يا حبيب قلبى و بالمناسبة طمنا على عربيتك و ألف ألف شكر يا باشا على مواضيع السفر كلك ذوق والله ... و لو تأمر باى حاجة من الكويت عنيا الاتنين ليك يا باشا |
رد: سؤال فى كهرباء السيارة و نصائح قبل السفر
توصل ارض الوطن بالسلامة ياباشا
بالنسبة للكهرباء انا معرفش بالظبط بس انا عندى مشكلة شبيها بها وهى انى لما اكون ماشى ببطىء والعربية باردة بلاقى وش وزن كبير فى الكاسيت ولما اطلع بسرعة بيختفى تماما اعتقد ان الوش اللى فى الكاسيت نتيجة لقصور فى الكهرباء انا عربيتى فيرنا وانا رايى الشخصى غير المتخصص انة ممكن يكون الدينامو فعلا بيطلع كهرباء مش مظبوطة او فة وصلة من الوصلات مش مربوطة كويس ولما التيار بيقوى بتشتغل كويس لكن كنت عايز اسالك لو انت واقف الصبح ونورت النور على البطارية من غير ما تدور العربية اية الاخبار؟ بالنسبة الى السفر انا مسافرتش خالص لكن انا موجود فى ليبيا (طرابلس)واعرف ناس كتير بيروحو برى بعربياتهم والمسافة تقريبا 3000 كيلو اللى اعرفة انهم بيبغيرو جميع السيور ويحتفظو بالقديمة معاهم علشان لوحصل قطع يقدرو يستعملو القديم اللى هو اصلا كان شغال وكمان لازم المحرك يكون كويس جدا يعنى مفيش نقص فى الزيت ولا تكوت بتسخن ولو بسيط طبعا بالاضافة الى الكاوتش والاستبن يكونو تمام وبالنسبة الى الطريق تعمل حسابك تعدى على البوابات والجمارك فى ايام ماتكونش جمع او اجازات رسمية وربنا يوفقك وتوصل بالسلامة |
رد: سؤال فى كهرباء السيارة و نصائح قبل السفر
ألف شكر يا استاذ بيرو على مشاركتك الجميلة و النصائح الغالية و ترجع مصر الحبيبة بالف سلامة يا رب
بالنسبة لما اشغل النور على البطارية مافيهوش رعشة ولا حاجة بيشتغل كويس هى المشكلة بتبدأ اول ما أشغل العربية و ألف شكر مرة تانية على مرورك الكريم |
| الساعة الآن 10:32 PM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017