|
استشارة بخصوص موتوسيكل صينى
السلام عليكم
يا ريت حد يدلنى على انسب وأامن موتوسيكل صينى ينفع للزوجة انها تركب مع زوجها بأمان فى بعض الاخوة دلونى على دايون 40 او هوجان 5 عشان مواصفاته مناسبة لطلبى...؟؟؟ هل الاختيارات دى الافضل فعلا...؟؟؟ ده اللى اتنصحت بيه وايه رأيكم فى هوجان 7 و دايون 7 و12 كينج 2 "كل دول شبه الهارلى كده" ده اللى فكرت فيه يا ريت تنصحونى او تاكدولى على معلومة وايه الفرق بين اللى اتنصحت بيه وبين اللى فكرت فيه؟ لا خاب من استشار وشكرا جزيلا على تعاونكمROSE4U |
رد: استشارة بخصوص موتوسيكل صينى
والله يا استاذ ايمن انا هقولك اللى عندى ولو انى ما احبش انك تشترى موتوسيكل لانه خطر.... المهم انا كان معايا موتوسيكل دايون A2 اللى هو الصغير وكان بيشيلني انا والعيال وكان جامد وسعره جديد فى 2009 كان 3100 جنيه ، وقطع غياره رخيصة جدا وموفر جدا فى البنزين ، وانا انصحك لو الحمل ( الوزن ) مش كتير فهو افضل من ناحية سعره وتوفيره فى البنزين وقطع غياره ومش هتحس بيه خالص ، اما لو الحمل كبير شوية فانا انصحك بدايون اربعة او اى دايون ولااااااااااااااااااااااا اااااا غير الدايون لانه انضف ماركة فى الصيني وكل قطع غياره متوفرة فى اى مكان ورخيصة كمان لو الهوجان والأنتوس والكلام دا مهما سمعت عليه وخدها منى نصيحه لانى شفت بعنيا هتدوخ على قطع غيارهم ( وعلى فكرة انا من امبابة وانت كمان من امبابة يعنى اللى بقولك عليه دا هتصادفه انت وهتدعيلي ان شاء الله) قطع غيارهم قليلة وكنت بشوفهم بيشتروا قطع غيار الدايون والميكانيكي كان بيعدل عليها عشان تركب ....طب فيبقي ليه !! ما نشترى الدايون على طول اسهل |
رد: استشارة بخصوص موتوسيكل صينى
اها صحيح يا استاذ ايمن نسيت اقولك ان مافيش موتوسيكل امان للأسف مرة كنت ماشي ومعايا العيال وسلك الدبرياج اتقطع والحمد لله كنت على سرعة قليلة وموقعناش ومرة كمان الجنزير كان بيخبط فى علبة الجنزير فرحت عامل ناصل وشايل العلبة خالص واللى كان راكب ورايا هدومه كلها الجنزير وبرضو لولا ستر ربنا وماشي بالراحة كان مات ..... وكنت رايح مستشفي القاهرة التخصصي اللى روكسي مرة وعربية قدامى كانت بتهدي وجيت اهدى لاقيت سوسته الفرامل طارت والفرامل نزلت وماطلعتش وقفشت فى العجلة وكنت هموت لانى كنت ماشي على 70/80 تقريبا لكن الحمد لله ربنا سترها .................وانا بقولك كل الحاجات دى عشان بس تخلى بالك ان الموضوع خطر وغير العربية وبالذات الموتوسيكل لو سمعت فيه او حسيت بفسووووووووووة تغير فى اى حاجة لازم تروح فى يومها او فورا للميكانيكي لان لدعته وحشة وبتزعل جامد وربنا يسترها عليك وعلينا يارب |
رد: استشارة بخصوص موتوسيكل صينى
الف شكر عمنا ابو رقية على نصيحتك... الحقيقة الحمل عندى مش كبير بالعكس ده خفيف خالص "زوجة وطفلة 3 سنوات" لكن انا دورت على الموديل اللى حضرتك قولتهولى مش لاقى صورتة خالص وبما انى ماليش فى الموتوسيكلات فا كل الفرق اللى بشوفة بين موديل والتانى هو موضوع الشكمان "يمين بس او يمين وشمال وفوقية دواسات للراكب الخلفى" بالاضافة للموديل العريض اللى تقريبا دايون 7 او 12
لكن نصيحة حضرتك عموما ان الدايون افضل من الهوجان ... مش كده؟؟؟ طيب ايه وضع حلاوه بالنسبة للدايون ؟؟؟ وهل فى موديل بيتميز عن موديل فى نفس الماركة؟؟؟ معلش تقلت عليك بكتر الاسئلة ... يا ريت لو تحطلى صورة للموديل A2 اللى قولتلى عليه اكون شاكر افضالك ... اللى مخلينى افكر فى الموتوسيكل انى عرضت العربية للبيع وفى ظروف الزحمة اللى احنا فيها مش هاينفع اركب مواصلات تانى وخصوصا مع وجود الاسرة "المشى ارحم" واهو الموتوسيكل حل وسط بين المشى والعربية الملاكى واشكرك مره تانية |
رد: استشارة بخصوص موتوسيكل صينى
بص يا سيدي دا اللى انا بكلمك عليه http://www.sptechs.com/emarket/thumb...s/item1141.gif وهتلاقي منه الجديد الفانوس الكبير اللى قدام مدور مش مربع وكمان تقدر تركبله دواسات كبيرة زي بتاع دايون 14 وكدا ( بالنسبة يعنى للى هيقد وراك بدل ما يحط رجليه على البتاعتين الرفعيين بتشترى السندات الكبيرة وبتركب عادى ) ودى دايون 3 اللى اكبر شوية من الايه تو وهى اعرض سنة والتنك اكبر شوية بسيطة وكمان جاى معاها السندات متركبه http://moshax.com/classifieds/screen...5_18_2_750.jpg فى بقي التفاحة اللى هى دايون 4 اللى اكبر من دول وبشكمانين http://2.bp.blogspot.com/_9HOzOEGBsI...%D9%86%2B4.jpg وكل دوووووووووووووول وكل الصيني وكل الدايون 150cc الموتور بتاع كله واحد والشكمان الواحد او الشكمانين بيفرق فى إخراج هواء الموتور فقط ودا معناه ان ابو شكمان واحد بيسخن اسرع من ابو شكمانين وكله شغالين بيه دليفري يا معلم :129E17~143: يعنى الموضوع ملهوش لازمة قوى بس اهم شيء الاهتمام بكل كبيرة وصغيرة فى الموتوسيكل ودي نصيحتي ليك . اه صحيح ولو عايز حاجة نضيفة ومعاك مبلغ اشترى بجاج هندي ودا احسن وانضف بكتير فى سواقته وبيستحمل لكنه غالى وقطع غياره طبعا غالية بالمقارنة بالصيني ودي صورته http://bikeadvice.in/wp-content/gall...r/dsc01187.jpg وبالله عليك بالله عليك بالله عليك يا اخى طول ما انت سايق ومعاك حد ما تعديش سرعة 40 بالله عليك كمان مرة وخلى بالك من الرمل واى مية واى بقعة زيت تبعد عنها لان فى فخ ناس كتير بتقع فيه انه يمشي بالراحة فى المية او الزيت واول ما يطلع منها يطلع يجري فيقع .حاسب والنبي ياشيخ وانا افضل تشترى سيات احسن والله وربنا يسترها عليك وعلينا يارب |
رد: استشارة بخصوص موتوسيكل صينى
فى مدونة مكتوبة على الموتوسيكلات الصيني ممكن تقراها http://moto4day.blogspot.com والموتوسيكل A2 اسمه 2B بس هو بيتقال عليه ايه تو او الدايون الصغير او النحلة .. المهم ان انت عرفت شكله وبالنسبة للحلاوة فنفس نظام الهوجان والانتوس برضو مش هتلاقي قطع غيار كتيرة ليه وهتلاقيهم غاليين ومشقلب شوية حاجات عن المعتاد مش متذكر دلوقتى تفاصيل بس اللى اقصده ان لو فى حاجة متركبة مثلا فى اليمين كباقي موتوسيكلات العالم هتلاقيها فى الحلاوة شمال او العكس يعنى....كمان اصغر من الدايون والعجلة اللى قدام ارفع من عجلة الدايون وسوقه قليل لو حبيت تبيع بخلاف الدايون يوم ما تفكر تبيعه الفكرة فى الحلاوة عاملة زى بروسيسور AMD كدا هو حلو لكن سوقه فى مصر قليل ومش اى حد يبيع قطع غياره اما INTL ( الدايو يعنى) سوقه شغال واى محل قطع غيار بيبيع حجاته |
رد: استشارة بخصوص موتوسيكل صينى
الله الله الله عليك يا كبير انت كده كأنك اديتنى درس خصوصى فى الموتوسيكلات
وكمان صور وشرح وفروق بين الموديلات ..... تسلم لنا يا غالى انا كده هاخلى ادارة المنتدى تغير عنوان الموضوع عشان يبقى اوضح لانه بيحتوى على اكثر من اللى فى العنوان عايز بس اطمنك ان الاستخدام هايكون محدود للغاية لان مشاويرى مش كتير وبتنحصر فى امبابة "داخليا يعنى" عشان كده مش عُرضة للجرى والسرعة وبطبيعة الحالى حضرتك عارف شوارع امبابة "قد ايه مميزة بالطرق الوعرة الجبلية" اللى مابتديش فرصة للواحد يمشى فى المعدل المتوسط حتى وكل فكرتى انى اهرب من الزحمة الى الشوارع الجانبية بتبقى سالكة اكتر ومافيهاش اتجاهات اجبارية وكمان ممكن اعدى من فتحة صغيرة فى الرصيف بدل ما اروح الف من يوتيرن فى شارع تانى... دى وجهة نظرى عن الاستفادة من خفة الموتوسيكل فى التنقلات الداخلية الاسرية واللى برضه ارحم من التوكتوك واستهتار وجشع سائقية بمناسبة الباجاج الهندى انا شوفت موديل اسمة بلاتينا 125 تقريبا وسعرة 5500 هل ده اللى حضرتك تقصدة وفى منة نوع تانى تقريبا ديسكفرى بـ 6500 وفى منهم تقسيط وتقسيط بدون مقدم للموظفين هل دى الاسعار اللى حضرتك تقصدها فى الهندى...؟؟؟ اللينك اللى حضرتك حطيتة فى الموضوع ممتاااااااااااااااااااااا ااااااااااااز جدا ...جزاك الله خير كان مكتوب فى الموقع ده ان موتوسيكلات حلاوة اوفر فى البنزين (45-50كم/لتر) بينما الدايون (35-45كم/لتر) يعنى فرق 10كم لصالح حلاوة....!!!!!!!وتبريد حلاوة هزاء+زيت وبيقول انه بيسخن اقل او ابطأ من تبريد الواء فقط اللى فى دايون.... وفى ناس بتقول ان الدايون 40 كويسة لكن الهوجان 5 عزمها اكبر بالنسبة لنقطة الامان اللى كنت اقصدها"خصوصا للراكب الخلفى" هى شكل الموتوسيكل من الخلف النيكل المحوط على الراكب والضهر اللى فاخر الكرسى والدواسة العريضة اللى راكبة فى النيكل الليى عامل زى الصدادات الخلفية كده .... يعنى باختصار الشكل العام اللى بيحمى الراكب وبيحوط علية وده مش شايفه فى الموديلات اللى ذكرتهالى فى الصور بما فيهم الباجاج الهندى واللى يعتبر اقيمهم وافضلهم هو يمكن اكتر حاجه قريبة من اللى بالى دايون 40 و7 و12 و14 |
| الساعة الآن 06:52 AM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017