باركولي .. جبت نيو النترا
 

خلاص بعد تدوير و تمحيص .. اتكلت على الله و رحت اشترى من واحد معرفة ابويا و الراجل ماشاء الله ماقصرش معايا خلاص عصير و تكييف و مية .. بس تنزيل في السعر مارضاش هههههههه

اشتريت ال النترا 2012 اوتوماتيك ب abs و ايرباج واحدة و ب 133.5 جنيه ينطح جنيييييه .. ربنا يسامحك يا غبور

و كان هناك واحدة اوتوماتيك بنفس التمن بجنوط سبور 16 بدل ال abs و فوقيها شوية تتشات ظريفة اطار جلد للطارة و الفتيس و مسند متحرك للامام

و اكتر حاجة خلتني ادعى على غبور : المسند لان ال بيتحرك مش موجود غير في ال بجنوط بس و طبعا ده ضايقني لاني باطلع الكرسي لقدام و مش طايل المسند .. مش فاهم يعني ده واقفة عليه بايه ؟؟ علشان يحطها في عربية و يشيلها من التانية .. ده ماتتكلفش 20 جنيه زيادة ؟؟؟؟؟

و على فكرة سعر العربية ده طلع في الوكيل 132 الف لكن للاسف مفيش و هتقعد شهر و اتنين حاجز
و الخليجي على فكرة ال بنفس المواصفات نزلت لكذا اجنص في احمد عرابي ب 125 الف يعني اقل بتاع 8500 جنيه

بس ضمان الخليجي عند غبور طلع اشاعة و مش صحيح

انا لسه ماشفتش حاجة في العربية .. لما اشوفها كويس هاعملكم تقرير ظريف كده

سلااااام

رد: باركولي .. جبت نيو النترا
 

الف مبروك ربنا يديك خيرها ويكفيك شرها

رد: باركولي .. جبت نيو النترا
 

الله يبارك فيك و متشكر ليك يا استاذ قناوي

------------------

لوو حد عنده فكرة يا جماعة عن المسند المتحرك موجود في التوكيل و لا لأ يا ريت يقولي
و لو حد عنده مسند متحرك و مابيستخدموش و يحب يبدل مع دفع فارق يقولي برده
القصة اني مش طويل للاسف و الكرسي باطلعه قدام و يا دوب كوعي بيسند على المسند
انما لو في حد طويل مش هتفرق معاه

رد: باركولي .. جبت نيو النترا
 

الف مبروك يا كبييرعربيية الموسم والسنين الى قدام كمان عربيية جامدة مشاءالله بس فى سؤال غريب وفى ناس زيك كتير بتقول نفس حوار حجز اية ياكبيير الى بيعقد شهر وشهرين مافيش ياعم الكلام دة :)) دة 3 تيام وتستلمها وقتى وش وتعالا اوديك المعرض تشوف بنفسك و لا انتا بتكلم على توكيل و لا اية يعنى ؟؟!!!!!

رد: باركولي .. جبت نيو النترا
 

الف مبرووووك ياباشا وماتنساش التقرير لما تستلم ان شاء الله :0369B3~177:

رد: باركولي .. جبت نيو النترا
 

الله يبارك فيك يا ملك
الحجز في الوكيل بس و يبقى حظك بمب لو الموديل ال انت عاوزه جاهز عندهم

واضح ان الموزعين بيخلصوا اول باول على بضاعة غبور الوكيل تقوم تخلص بسرعة
و مايبقاش قدامك غير انك تاخد منهم بالغلا و الكوا او تستنى حجز الوكيل و ياخد زي ما ياخد
يومين تلاتة اسبوع اسبوعين شهر شهرين .. انت و حظك

و انا اتصلت بمعظم فروع غبور الوكيل و للاسف جزء كبير منهم ماعندهمش عربيات
بس بيقولك تعالى و ندورلك و فيلم كده و بعدين يقولك هتيجي في اسبوع و الاسبوع يبقى اتنين و كده
و كل واحد و حظه

رد: باركولي .. جبت نيو النترا
 

ألف مبروك عليك ياباشا عربية جميلة بسم الله ماشاء الله ربنا يديك خيرها ويكفيك شرها.
بس لو سمحت إنتا بنفسك بتقول إنك مش راضي عن السعر ومستغليه هوا إنتا ماكنتش قريت في المنتدى هنا قبل كدة خطوات وترتيب لمقاطعة كل العربيات الزيرو.
ماتعرفشي إني حاليا في قانون جديد للجمارك بيتصاغ ولو ماكناش هنلحق نضغط ونظهر في الصورة كقوى شرائية متحدة ترفض اللعب بعقولها ولا حد هيعبر فينا كمان 10 أو 20 سنة.
عموما ألف مبروك للمرة التانية وربنا يكرمك.