اخيرا انتهت الحيرة -- قررت اشترى النترا 2012 ان شاء الله
 

سلام عليكم جميعا
جى اول مشاركة فعلية ليا على اى منتدى بس انا حبيت اشارككم بالقرار اللى وصلتله يمكن حد ينصحنى بحاجه-- بعد لف كتير وحيرة ما بين صنى و سيراتو واكسنت ار بى -- استقريت على اكسنت ار بى وروحت اتفرج عليا فى توكيل غبور اللى صلاح سالم -- وهناك شفت النترا لأول مرة وقعدت فيها واتفرجت عليها من جوا وبكل صراحة انا وقعت فى حبها -- فقررت اشتريها
المهم بعد شوية خطوات مع بنك التنمية عشان التقسيط وكده لقيت التوكيل بيقولى العربية زادت بقى 123 الف اول فئة اوتوماتك والتسليم اخر الشهر ده ومش اكيد
طبعا انا بدور بقالى كتير ومش قادر اصبر اكتر من كده رمضان داخل ومش ناقصه بهدله فى الحر المهم اتكلمت مع مندوب البنك وقالى فيه معرض هيجبهالك المنوفية فى خلال يومين بس 125 الف (انا اصلا من المنوفية بس شغال فى القاهرةومقسط تبع فرع المنوفية برضه)
ولسه مقررتش اعمل ايه ولا جيب اكسنت ار بى اول فئة اوتو برضه تانى واستلمها من التوكيل لأنى الصراحة على نياتى وبخاف من المعارض يكونو ضاربين حاجه من العربية؟
ايه رأيكم؟ ياريت تنصحونى لأن اول مرة اشترى عربية جديدة وياريت حد يقولى برضه المفروض استلم ايه مع النترا لو ربنا ييسر وجبتها
واسف على الأطالة

رد: اخيرا انتهت الحيرة -- قررت اشترى النترا 2012 ان شاء الله
 

صراحة لو انا منك واخدت قرار بعد لف كتير اتوكل على الله بس انا رأي تنى لحد اخر الشهر يعني 15 يوم مش كتير عشان توفر الفين لان فيه معارض تانية عارضها ب126 الف بس اهم تتاكد انهم هيسلموك اخر الشهر واللون اللي انت عاوزة فبسيطة كلها اسبوعين وبعدين متنساش لسة عندك مصاريف التامين اللي مش هتقل عن 4 الاف جنية يعني حرام تدفع الفين زيادة تاني على اسبوعين بالنسبة للار بي هيا طبعاا كويسة بس مش زي الألنترا وربنا يوفقك للخير ان شاء الله

رد: اخيرا انتهت الحيرة -- قررت اشترى النترا 2012 ان شاء الله
 

العربيه ابتدت تنزل فى المعارض والوكلاء...لولفيت شويه ممكن تلاقى بضاعه حاضره بدون حجزوانتظار........والف مبروك مقدماً

رد: اخيرا انتهت الحيرة -- قررت اشترى النترا 2012 ان شاء الله
 

انا راى استنى لاخر الشهر مشهتفرق كتير بس انا اضمن التوكيل عن المعارض اللى بجد معتش فيه ضمير
واختيار موفق ان شاء الله

رد: اخيرا انتهت الحيرة -- قررت اشترى النترا 2012 ان شاء الله
 

متشكر جدا لكل الردود انا خلاص الحمد لله هروح اجيبها من معرض المصرية اللى فى كلية البنات وهستلمها بكره ان شاء الله
حد عنده اى فكره هستلم ايه او المفروض ابص على ايه قبل ما امضى اقرار الأستلام

رد: اخيرا انتهت الحيرة -- قررت اشترى النترا 2012 ان شاء الله
 

الف مبروك مقدما بس هل المصرية حيدهالك بنفس سعر الوكيل ولا فى اوفر برايس؟؟ و كام؟؟

رد: اخيرا انتهت الحيرة -- قررت اشترى النترا 2012 ان شاء الله
 

لأ ده انا حصلى حوارات كتير على ما استلمت-- انا كنت خلاص هجيب من المصرية زى ما قولتلكم ب 124.5 وده ااقل سعر لقيته -- المهم واحد صاحبى بالصدفة قالى انه عارف حد فى سمير ريان وكلمه عشانى ولقيتها 124 فقلت تمام -- رحت ودفعت مقدم الحجز وشوفت اللون وكان سكرى (كريمى) بس ده كان بليل فقلت بلاش خلينا للصبح احسن روحت الصبح عشان اخلص واستلم لقيت المراية الشمال فيها خربوش والصراحة بينى وبينكم موافقتش ومكنش فيه عربيات تانى فقلت واضح انى هرجع استنى تانى فى نفس التوقيت مندوب المصرية كلمنى وقولتله الصراحة انا لقيت سعر ااقل من عندكم وكمان الوان احسن قالى قولى انت عاوز لون ايه وهجبهولك بنفس السعر قولتله لو عندك سماوى يبقى تمام المهم اخر يوم كلمنى وقالى السماوى قدام المعرض اهو تعالى استلم فى اى وقت روحت امبارح بليل وخلصت واستلمت الحمد لله
بعد لف كتير بقى انصح كل اللى عاوز يشترى العربية دى:
1- مطلوبة جدا جدا جدا والتوكيل مش قادر يغطى كمية الطلب دى ومنهم المعارض الكبيرة زى سمير ريان والمصرية وابو غالى والقرش
2- العربية سعرها هيعلى طول ما الطلب بالشكل ده اللى يلاقى سعر قليل ولون عاجبه يجيبه فى اسرع وقت انا فى ظرف ليلة كان فيه تلات عربيات عند سمير ريان روحتله الصبح لقتهم اتحجزو وبعضهم اتسلمو
بالنسبة لأنطباعى عن العربية بقى احب اوضح ان انا كنت راكب بيجو قبلها بس سوقت سيراتو وكورولا مشاوير بسيطة كده فممكن ميكونش حكمى دقيق لكل الناس
انطباعى الأول:
1- العربية عالية فى قعدتها واريح من كرسى السيراتو ( انا جسمى مليان شوية فالكرسى كان واسع ومريحنى)
2- نور التابلوه مريح للعين اكتر من السيراتو واشيك من الكورولا
3- العربية واسعة ماشاء الله اكبر من السيراتو
4- العفشة بتاعتها انعم من سيراتو بس وتقريبا زى الكورولا
5- الباور كهربا خفيف جدا اخف من السيراتو وخصوصا جوا البلد فى الزحمة وكده
6- الراديو و يو اس بى ممتاز والسماعات جميلة وصوتها نقى
7- فى الأول حسيت ان مش حاسس بأبعاد العربية وده لأنى العربية قصيرة من قدام ومن ورا بس بالتعود لقيتنى افضل
8- التكييف الصراحة اكتر من اتنين ساقع جدا ومحاولتش اعلى عن كده
9- اللون السماوى فعلا من اجمل الألوان عليها انا حاسه درجة مختلفة عن السماوى بتاع العربيات التانية
10- تفويلة التنك كلفتنى حوالى 85 جنيه بنزين 92 يعنى حوالى 47 لتر
11- متهيألى لازم احط فرش جلد للأرضية لأن من كتر التراب هيتبهدل لأن فرش الأرضية موكيت والمصرية ادونى دواسات موكيت برضه هدية
12- طبعا لما جيت استلم جربت كل حاجه وفهمت كل لمبة فى التابلوه وبصيت على البويا من بره كمان شبر شبر.

بس كده لو حد عنده اسئلة بقى ياريت يقولى المنتدى ده ساعدنى كتيير وانا تحت امركم واسمحولى انا هكتب البوست دى برضه فى منتدى تانى عشان برضه ساعدنى كتيير

ودعواتكم ليا واسف للأطالة