مصر موتورز مجتمع السيارات

الاسبراتير او موزع الشرار
الفكرة كلها ان كهربة العربية 12 فولت تيار مستمر
وعشان يحصل شرارة فى البوجيهات لازم نحول الجهد المنخفض دة اللى هو 12 فولت الى جهد عالى جدا يقارب ال 16 الف فولت والعملية دى وظيفة الموبية او ملف الاشعال او ملف رومكورف
نيجى بقى لحاجة مهمة جدا وهى ازاى نخلى التيار المستمر ( ثابت القيمة + موحد الاتجاة ) الى تيار متغير او متردد ودة دور الابلاتين والكوندنسر بيحولو يقطهو التيار ويشوشوة عشان يبقى متغير
يبقى دلوقتى احنا عندنا تيار عالى جدا ( 16 الف فولت ) عاوزين نودية لشمعة الاحتراق فى وقت معين وهو النقطة الميتة العليا للبستم رقم واحد ودى وظيفة الاسبراتير بيكون راكب على ترس متصل بعامود الكرنك وفى تزامن بينهم وداخلة الجهد العالى عن طريق فحمة وش الاسبراتير الى الشاكوش والشاكوش دة بيوصل التيار العالى الى البوجية رقم واحد عن طريق وش الاسبراتير
وبعدين الكرنك لف وخلى البستم رقم اربعة فى النقطة الميتة العليا ونتيجة التزامن الموجود بين الكرنك والاسسبراتير دلوقتى الشاكوش لامس النحاسة الموجودة فى وش الاسبراتير الموصلة للبوجية رقم اربعة
وبعدين نفس الخطوات للبستم رقم ثلاثة
ونفس الخطوات للبستم رقم اتنين
يبقى اجابة سؤالك الاسبراتير بيدى او بيشغل بستم واحد ويليها بستم اخر الى ان تكتمل الدورة ( اربع بساتم ) ويبدا من اول تانى وهكذا
والسلام عليكم ورحمة الله وبركاتة
لان ايدى وجعتنى من الكتابة