ازاى تظبط كهرباء عربيتك
 

السلام عليكم ورحمة الله
شوفت اكتر من سؤال هنا الاعضاء بيشتكو ان الكهرباء بتاعة العربية ماخرة او مقدمة
فقلت اعمل موضوع منفصل خاص بتلك المشكلة
اولا اعراض المشكلة
فى حالة ان العربية تكون مقدمة كهرباء بتسمع صوت صفع ( تسقيف ) وبيبان اوى وانت بتعدى مطب مثلا والصوت التسقيف دة مضر جدا باجزاء المحرك الداخلية علاوة على عدم الاحساس بالرضى عن سحب العربية والتسارع وايضا سخونة اكثر من اللازم
اما فى حالة ان الكهرباء ماخرة بتلاحظ خروج دخان لونة اسود من الشكمان وتهبيب البوجيهات بصفة مستمرة واستهلاك بنزين زيادة عن المعدل الطبيعى وبطا فى السحب وبرجلة على السلانسية
الحل:
وطبعا الطريقة دى تنفع فى المحركات الكربراتير والاسبراتير العادى
الخطوات:
جرى العرف ان مصممين المحركات بيعملو علامات لظبط كهرباء المحرك والعلامات دى بتكون موجودة على طنبورة الكرنك وما يقابلها من دليل على جسم المحرك من برة تملى بتكون 3 شرط او زنبة او ما شابة ذلك
وطبعا لان المحركات كتيرة ومش معقولة انى اقول كل محرك على حدة فاليكم الطريقة التالية ( معلش هى طريقة ميكانيكية بحتة بس دى الاصح)
1- فك البوجية رقم ( 1 ) الامامى واغلق فتحة الوجية بصباعك الكبير وخلى حد يديلك سنة مرش متقطعة ( تك....تك...تك) لغاية اما تحس بضغط خارج من فوهه فتحة البوجية
2- هات مفك رفيع ودخلة على راس البستم
3- ادى العربية الرابع وزقها فى اتجاة الامام الى ان تصل باقصى ارتفاع للمفك ودى اهم نقطة فى الموضوع لازززززززززززم المفك يكون فى اقصى ارتفاع لة
4-افتح كونتاكت العربية
5- والخطوة دى ليها طريقتين هاسميها رقم 5 و5 مكرر (55)
5- ركب سلك البوجية فى البوجية ولمس جسم البوجية على اى جزء معدن فى جسم المحرك بحيث انك تقدر تشوف الشرارة الخارجة من البوجية
55- ( مكرر) هات لمبة 5 وات بالدواية بتعتها ويكون خارج منها سلكتين واربط سلكة فى الطرف الموجب للموبينة والسلكة الاخرى فى الطرف السالب للموبية
6- فك الاسبراتير بمفتاح 13 ( تهوية المسمار فقط )
7- لف الاسبراتير كليا يمين او شمال الى ان اما فى الخطورة رقم ( 5 ) تنط الشرارة من قطبى البوجية او اما ان فى الخطوة رقم ( 55 ) مكرر تضىء اللمبة
8- دلوقتى تقدر تربط مسمار الاسبراتير باحكام
9- اربط البوجية رقم ( 1 ) المخلوع
10- دور وادعيلى

رد: ازاى تظبط كهرباء عربيتك
 

مشكور يا باشا على المجهود

رد: ازاى تظبط كهرباء عربيتك
 

تسلم ايدك يا باشا

GIFT4UGIFT4UGIFT4U

ولا تقولي ميكانيكي ولا يحزنون

رد: ازاى تظبط كهرباء عربيتك
 

الله ينور عليك
موضع اللميه ( رقم 5 ) ممكن من حضرتك شرح اكثر اذا تكرمت

رد: ازاى تظبط كهرباء عربيتك
 

الموضوع بكل بساطة هاتجيب لمبة 5 وات وهاتجيب الدواية بتعتها
تركب اللمبة فى الدواية
الدواية بيكون طالع منهم كلبسين وكل كلبس فية خرم
هات سلك كهرباء 1/2 مم ودخلة فى الخرم بتاع الكلبس وحرق علية وبعدين اعزلة بشريط لحام وخلاص التوصيل كدة انتهى
تعالى عند طرفين الموبينة ( الدخل - الخرج بتعها) ووصل كل طرف من اطراف الموبينة بطرف سلك من بتوع اللمبة

رد: ازاى تظبط كهرباء عربيتك
 

مش عارف حاسس ان فيه لخيطه شويه في الخطوات

اول طربقه
هتكون اساسا حالل غطا الاسبراتير و مهو الشوكه بتاعته
حل البوجيه اي بو يجيه تكون مالك حله و مكانه واسع
اقفل مكانه بصباعك
و ادي سنه المارش او تخلي حد يجيب التاني او التالت و يزق
هتزق لعايه ما تحس بضغط علي صباعك وضغط كبير
بس يا باشا هو ده طور القدره
وجه شاكوش الاسبراتير اللي انت مهويه الي سلك البوجيه اللي انت حالل البوحيه بتاعه و قفل اللي عملته ما عدا تهويه شوكه الاسيؤاتير
بعد ما تلم الليله دور و حرك الاسبراتير يمين و شمال لتحصل علي الاحتراق المثالي و يا ريت تكون زودت بنزين و قللت علي شان تتاكد انه مضبوط
الطريقه التانيه
زي ما هو مشروح فوق بي تختار الشوط اللي بعد ما صمام المخلوط يفتح و ده المكبس بيبقي تحت ولما يطلع و الصمامات كلها بتبقي مقفوله و هو فوق
بس يا باشا هو ده طور القدره
بعد ما تلم الليله دور و حرك الاسبراتير يمين و شمال لتحصل علي الاحتراق المثالي و يا ريت تكون زودت بنزين و قللت علي شان تتاكد انه مضبوط
معلش لصاحب لموضوع تدخلي بس علي شان ما اعملش موضوعين عن حاجه واحده
و شكرا يا كبير

رد: ازاى تظبط كهرباء عربيتك
 

طيب حكايه اللمبه دي هنستفيد بيها في ايه
دي كدا هتنور في الاريع اشواط بتاعه الاربع سلندرات
يبقي هنقسم عليها ازاي
برجاء التوضيح يا كبير