|
صيانة واصلاح لانوس 99
الحمدلله اشتريت لانوس99
فيها حبة تظبيطات اروح فين ولمين وللعلم دى اول عربية ليا يعنى خبرة مافيش وانا من سكان عين شمس المشاكل اللى عندى مبدئيا هيا تغيير الزيوت الدبرياج - الفتيس- السيور عوامة البنزين مش شغالة سمكرة فى حتة فيها بارومة تظبيط الاضاءة حقن الزجاج او تغييره ياترى محتاج مركز صيانة ولا ممكن ميكانيكى كويس وياريت تدلونى بالتفصيل والحاجات مكلفة ولا اية |
رد: صيانة واصلاح لانوس 99
بلاش من مراكز الخدمه
وأسأل أى واحد يكون فى منطقتك عن أقرب ميكانيكى ليك ويكون الميكانيكى أمين وشاطر |
رد: صيانة واصلاح لانوس 99
ألف مبروك على العربية الجديدة, بأذن الله تريحك وتشيلك ومتتعبكش أبدا.
أنا رأيى من رأى الأستاذ سمير, حضرتك دور على ميكانيكى فى منطقتك علشان يشيلك وقت اللزوم ويبقى الميكانيكى بتاعك :) على العموم, أنا أتعاملت مع 2 كويسين جدا, الأول فى شارع المطرية العمومى (القفاصين :)) عمارة 32, وأنت جاى من السواح هتلاقيه على أيدك اليمين بعد المطب الغبى بشوية:) قبل الشهر العقارى وشارع نصوح والكلام ده, كريم هو الأسم, شغلهم كويس, رخيص, بس عيبهم أن دائما هتلاقى حوالى 2 الى 5 زبون جايين قبلك, زحمة بغباء. التانى عند المسجد والمطب من الناحية التانية لو حضرتك تعرفهم, برضه من شارع المطرية بس المرة دى وحضرتك رايح منه على السواح, هتخش من عند المسجد شارع عبد الرحمن نصر وتمشى فيه شوية وهتلاقى الورشة على شمالك, دول متخصصين دايو وفيهم ناس كانت شغالة فى التوكيل, بس بيشتغلوا فى كل حاجة. السمكرية فى المنطقة دى بالذات ماليين الدنيا, مجرد خطوتين من الميكانيكى ده هتلاقى سمكرية بالهبل, وممكن هو ينصح حضرتك بواحد كويس (هما 3 مهندسين, عمرو, مصطفى, وللأسف مش فاكر التالت :(). |
رد: صيانة واصلاح لانوس 99
وانت بتوصف كدة حسيت انى بشوف جوجل ايرث كان ناقص تقولة مثلا فى واحد واقف على الناصية وبيتكلم فى التليفون ربنا يزيدك من فضلة ويتم نعمتة عليك
|
رد: صيانة واصلاح لانوس 99
بجد انا متشكر جدا جدا باذن الله اروح لهم يوم الاثنين وربنا يسهل بس انت ترشح مين الافضل والاكثر امانة مش الارخص و جزاك الله خيرا
|
رد: صيانة واصلاح لانوس 99
اقتباس:
والله هما الأثنين كويسين جدا, كريم ده تقدر تقول عليه ميكانيكى الشباب فى القبة وعين شمس, ودائما تلاقى عنده عربيات شباب وبيظبط عربيات برضه, ودى مشكلته أنه زحمة, بس شغله كويس ونضيف ورخيص, وفتح محل كماليات جنبه بيبيع حاجات كتييييييييير لو حضرتك عايز تشترى حاجة:), وهو على فكرة برضه بيجيب حاجات أستيراد من بره (صبات, بوازيك, جى أمات, ميكانيكى شباب بقى:)) لو عايز تجيب برضه. الورشة التانية شغال فيها 3 ميكانيكية -كريم 2 بس, هو وأخوه- وأحيانا والدهم بيشتغل معاهم, وكان منهم اللى شغال فى توكيل دايو وقعد فترة طويلة فيه, وشغلهم نضيف برضه وسريع لو عرفت تمسك واحد منهم علشان يشتغل فى العربية:), ومعروفين فى المنطقة بتاعتهم وناس كتير بتجيلهم من عدة أماكن. وعلى فكرة الأثنين جنبهم محلات لقطع الغيار, كريم جنبه محل صاحبه لقبه الشيخ وده على ناصية شارع نصوح, وأسعاره رخيصة وعنده كل حاجة من أول الأبرة للصاروخ وممكن يجيبلك أى حاجة بالطلب. التانى اللى جمب الورشة محل صغير وعلى قده, ومعندوش حاجات كتير. ولك حرية الأختيار ياباشا, رغم أنى أرشحلك تجرب كريم الأول, بس خد بالك بالهم طويييييل, ومرة قعدت عندهم يوم بحاله ومشيت من غير ما أعمل حاجة. |
رد: صيانة واصلاح لانوس 99
بجد متشكر جدا هاخد بترشيحك لكريم بس موضوع بالهم طوييييييل دى ربنا يستر منها لانى بصراحة ماعنديش وقت فى وسط الاسبوع ممكن اسيب عنده العربية؟!! |
| الساعة الآن 05:40 AM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017