ليه كسرنا ورا فيات قله ؟؟
 

رد: ليه كسرنا ورا فيات قله ؟؟
 

ديه الخلاصة...
و الموضوع أنك مش سهل أبدا تطلع فكرة دخلت و عششت و توارثتها الأجيال كمان...

يعني أبويا مثلا من كتر ما شاف من ال127... عارف لو قلتله ألفا روميو... هيقوللك الله الغني.... (لمجرد ذكر اسم ايطاليا في الموضوع)

رد: ليه كسرنا ورا فيات قله ؟؟
 

نسيته لكذا سبب .. منها اسباب احنا السبب فيها و منها من فيات نفسهم

فيات لسة قايمة من " انتكاسة " كانت ممكن تخليها تفلس و من فشل معاهدة تعاون مع جنرال موتورز الي هي اصلا فاشلة :)

بالنسبة لل80يات دي مش حترجع تاني ..

سيارات فيات حتى الايطالية الي كانت بتيجي مصر من 128 127 131 132 كانت مبيعاتها ممتازة استمرت ممتازة مع الريجاتا و التمبرا الي ان اخطأ وكيل فيات باسبتدل هذه الموديلات بموديلات مثل البونتو و السيينا و نسي تماما الموديلات المرغوبة في بلد معظم شعبها بيكره الهاتشباك و المواتير الصغيرة ( مثل الماريا و البرافا السيدان و الكروما )

و عندما ولع اليورو .. لم يكن امامنا سوى البونتو و هي سيارة شبابية ممتازة و لكن " قلة " في عين معظم الشعب المصري من مثلا محبين ال 131 و ال132

السيينا سيارة عملية و ناجحة عالميا و في مصر في اول مانزلت مثلا و لكنها فضلت كما هي لفترة تزيد عن ال 6-7 سنوات بدون اي اضافات - في نفس الوقت الي تم طرح في سيارات اسيوية مثل الانوس و الاكسنت و اختفت الميزة الاساسية لسيارات فيات مع دخول سيارات في نفس الحجم - ارخص - اسهل في الصيانة و متوفرة اكتر ... ثم جاء اختفاء التوكيل صاحب المبيعات الممتازة بالسيينا و البترا في مصر ( السعودي ) اختفاء غريب و لكنه ايضا كان في وقت توعك فيات ...
اوماترا موجودة في مصر من زمان و هي وكيل افيكو و هي السيارات فيات التجارية .. و ليس لهم اي خبرة في تسويق او بيع عامة سيارات الركاب و بالتالي " بيجربوا حظهم ".

سياسات فيات في ايطاليا الي افسدت فيات في مصر .

في اول الامر مكانش في عربية لاوروبا و عربية لمصر .. كانت كل سيارات فيات الايطالية ( الاسطول كله تقريبا ) يطرح في جميع البلاد و باسعار ممتازة ..

في اواخر التسعيينيات تم معاملة مصر كدولة نامية .. و بالتالي اكتفت فيات بطرح موديلات السيينا و بعض موديلات البونتو في نفس الوقت الي بدات فيه صناعة السيارات الاسيوية تحتل محلة كبيرة في مصر خصوصا مع سفر و هجرة الملايين من المصريين الى بلاد الخليج التي تكون خالية تماما من اي سيارة فيات ...

ثم جائت نكسة فيات ... و اختفت تماما من السوق المصري ... لتعود عودة " هزيلة " مع توكيل بيحاول لسة ... باسعار اليورو الجديدة و مواتير موفرة تحاول تنافس مرة اخرى ..

العقدة الازلية بتاعت الهاتشباك دي حتبقى مشكلة لشركة اميز و انجح سيارات عندها هي الهاتشباك ...

رد: ليه كسرنا ورا فيات قله ؟؟
 

فيات من العربيات الممتاااااااااااازه
بس للأسف احنا كانت في فتره فيها فيات عربيه العامه - بيجو 504 اعيان الارياف و تاكسي - مرسيدس الطبقه الميسوره
ابتدى الياباني يدخل مصر و كان تقريبا المازاد 626 تمنها تمن ال 128 أو ال 127 نصر .....يمكن ارخص كمان الناس الاول تقول لأ ياباني ايه دا ورق ..... ال 128 البقال بيفهم فيها ..... الياباني رخيص بس قطع غياره ناااااار
شويه شويه الناس لقت الياباني زي الفل و الفيات هي هي 128 - 127
طبعا كان فيه عربيه كارثه اسمها ارجنتا كان تمنها تمن المرسيدس 230 وكل اللي اشتراها لبس اسود!!! لأن مرسيدس كسحتها
شويه ونزل الكوري و فيات قفشت على شركه النصر و وقفوا عند الريجاتا .... حولوا على تركيا و جابو الدوجان
طبعا لما ابتدت كل انواع العربيات تدخل مصر خصوصا الكوري - كانت فيات في مصر خلاص ملهاش حد .... لحد التسعينات مع شركه النيل ودخلت الاونو وبعدها التيبو و البرافو .... بس كانت اغلا طبعا من الكوري .... الناس لما تقول فيات يعني عربيه رخيصه يبقى ازاي يشتريها اغلى وكان الياباني عدى خلاص ..... يشتري كوري احسن و ارخص.... واهو زي الياباني اللي مرضاش يشتريه قبل كده و ماشي زي الفل
نزلت البونتو و كانت مقطعه اوروبا .... بس طبعا كان قدامها البولو و الكورسا و الفيليشيا والاكسيل و الابيزا و اكيد حاجات تتنيه مش فاكرها .... و بعدين نزلو السيينا وفي نفس الوقت نزلت السيفيا 1600 بنفس تمن السيينا ال1400 ..... من غير مارغي كتير .....
الناس في فتره ما كانش قدامها غير الفيات .... و لما تنوغت العربيات .... خلاص
تخيل واحد كل يوم يفطر فول ..... و في يوم لقى فيه جبنه و اومليت و كشري و سميط .... اكيد حياكل حاجات تانيه لانه شبع فول
هي اوماترا بتحاول دلوقتي .... بس لازم يزودوا مراكز الخدمه ويعملوا دعايه قويه ( البرافو هايله بس ازاي تقنع الناس يشتروا عربيه بتمن الكورولا و الشارك و المازدا 3 و الاسترا و ......... )

الكلام ده طبعا وجهه نظر شخصيه و رأي شخصي .... وممكن اكون نسيت معلومه او خانتني الذاكره في نقطه معينه.... الله اعلم
ياريت لو اي حد من الزملا الافاضل قرا حاجه مش مظبوطه يصححها لي .... او له رأي تاني مخالف لرأيي
رأي صواب يحتمل الخطاء و رأيك خطاء يحتمل الصواب

رد: ليه كسرنا ورا فيات قله ؟؟
 

واضح اني كنت باكتب المشاركه في نفس الوقت اللي حضرتك شاركت فيه فمشوفتهاش الا بعد ما كتبت

انا موافقك على كل الكلام خصوصا نقطه انتكاسه فيات و مشاركه جنرال موتورز.. اعتقد انها فعلا كان ليها اثر كبير
بس في نقطه مش فاهمها اوي :-
الماريا و البرافا و الكروما عربيات سيدان ..... وكانو موجودين في مصر فيما عدا الكروما كانت قليله اوي... انا عن نفسي مشوفتش الا واحده بس.
السيينا كمان سيدان بس فئه اقل طبعا وبالتالي كان سعرها منافس
40000 جنيه كانت ارخص من الفيليشيا و البولو و الكورسا اللي كان متوسط سعرهم 42000 - 45000 - بس كان بينافسها الاكسنت و السيفيا
والبونتو كانت بتنافس عربيات كتير هاتشباك وكانت بينهم و بين الجولف يعني دخلت منطقه خاصه بيها
متهيألي هو كان مضطر يركز على موديل السيينا و البونتو مع زياده اليورو و بالتالي كان صعب ينافس بالماريا و البرافو .... اللي كانو فعلا موجودين بس مبيعاتهم قليله جدا .... زي التيبو من قبلهم
يعني هو كان مضطر مش بمزاجه
استئذنك توضح الجزئيه دي وياريت اعرف تعليقك على مشاركتي الاولى

رد: ليه كسرنا ورا فيات قله ؟؟
 

الموضوع طبيعى جدا,
لو رجعنا بالزمن لورا كانت السيارات الأمريكية و البريطانية هى السائدة,
بعد الثورة تغيرت سوق السيارات تماما, و بدأ عصر الفيات عندما تعاونت مع نصر للسيارات لانتاج سيارتها بمصر,
و معاها دخلت البيجو و المرسيدس كسيارات أكبر حجما و أعلى سعرا.
النهاردة قلت سوق بيجو و فيات فى مصر , نظرا لدخول شركات جديدة الى السوق, طبيعى انها تقتطع جزءا من الكعكة, خاصة و أن هذه الشركات طبقت نظرياتها التى تعمل بها فى دول العالم كلها (سيارة بشكل حديث مسروق فى معظم الأحيان+تكنولوجيا متخلفة + أداء سىء لا يشعر به المستهلك + دعاية جيدة = مبيعات جيدة !)
خد عندك مثلا اللانسر البوما لو بصتلها من ورا هتلاقيها نسخة طبق الأصل من البونتياك فاير بيرد, تكنولوجيا مأخوذة من كرايزلر من ايام ما كانت ميتسوبيشى تتبع كرايزلر (علب التروس و المحركات), سعر رخيص, أداء مخزى جربته بنفسى, و دعاية جيدة.
فى المقابل فان فيات تخلت عن النصر للسيارات, و أعتقد انو ده السبب الأساسى فى انخفاض مبيعاتها, تصنيع سيارات فيات فى النصر للسيارات كان يقدمها للمستهلك بسعر منافس, و امكانيات لا محدودة فى الصيانة, و الدليل على ذلك أن الشاهين تبيع جيدا رغم شكلها القديم فيما تعانى سيارات فيات الأخرى.
و اعتقد ان الموضوع منفصل عن أزمة فيات العالمية التى تجاوزتها الأن, فمثلا سيارات نيسان كانت تبيع جيدا فى مصر رغم أن نيسان كانت على وشك الافلاس لولا انقاذها من قبل رينو, و كذلك ميتسوبيشى التى تحقق مبيعات مرتفعة رغم أنها على حافة الانهيار.

رد: ليه كسرنا ورا فيات قله ؟؟
 

اتفق معكم تماما فيما قيل بالنسبة للاسعار و منافسة الكورى و اليابانى
لكن اعتقد غن موضوع عدم ثبات الوكيل له مردود سلبى كبير جدا على مبيعات فيات فى مصر
فى رايى ان فيات عربية كويسة جدا جدا السيينا 1400 و البونتو و الماريا و البرافا و الباليو و السيينا 1300 لكن إختيار فيات للصين لتجميع موديلات الباليو 1500 و السيينا 1500 اضاع الكثير من مجهود اوماترا فى السوق المصرية
إنتقال الوكالة من فيات اوتو ثم غنقطاع و غياب تام اكثر من سنة تقريبا ثم ظهور اوماترا كوكيل اضاع حق فيات فى مصر
أوماترا ناس مجتهدين جدا و عندهم خبرات رائعة فى الصيانة لكن اسلوب الدعاية أقل من المتوسط و ده ناتج من ان لسة اوماترا بتشوف الدنيا فيها اية
و كمان فيات خافت من الدعاية التى قد تكون غير قادرة على مجاراتها من ناحية الصيانة لأن الورشة صغيرة جدا بس اكيد هيخدو اماكن تانية
و فى توسع ملحوظ نسبيا فى فيات و مبيعاتها فى مصر و اعتقد ان الباليو و البونتو و السيينا 1300 باعت معقول
بالنسبة للبرافو سيارة فى ثمن سيارات يابانية و بتجهيزات اكتر((( البرافو مفيهاش تسجيل يا جماعة !!)))


نجحت مؤخرا مجموعة البرقان غنترناشونال فى الحصول على حق البيع و الصيانة من اوماترا و اعتقد ان المركز ده هيأثر فى مبيعات فيات فى مصر لان فيه إداريين و خطة بيع سوف تؤتى بثمارها قريبا بإذن الله