|
مشكله في الفتيس الاتوماتيك في كريستاله 98
السلام عليكم ورحمة الله وبركاته ده اول موضوع لي في منتدانا الجميل واعذروني لأن خبرتي في العربيات مش تمام هي مشكله في الفتيس الاتوماتيك في عربيتي كريستاله 98 هما في الحقيقة مشكلتين الاولي ودي اللي قلقاني جدا هي ان لما بكون سايق والفتيس علي D وينقل من التاني للثالث بتحصل نتشه خفيفه او شديده علي حسب ضغطي علي دواسة البنزين وبعديها يبدأ نور N ينور ويطفي ويفضل كده طول ما العربيه دايره حتي لوقفت تماما لازم افصل الكونتاكت علشان يطفي ولكن لما ادور وامشي بتحصل نفس النتشه ونفس النور ينور ويطفي والنتشه دي بتحصل مره واحده بس في اول مره الفتيس ينقل من التاني للثالث لكن لو هديت او وقفت خالص وزودت السرعه مبيحصلش حاجة لكن نور N ينور ويطفي طول الوقت ولو انا ماشي علي L مبتحصلش النتشه دي ولا النور ينور ويطفي لان L اخره التاني علي ما اعتقد المشكلة التانية ان ساعات بتحصل نتشه اول ما بغير من غيار P او R واروح لل D او اي غيار من L او 1 او 2 ارجو من أهل الخبرة المساعدة مع العلم اني روحت لميكانيكي وقالي في حساس مش فاكر اسمه عايز يتغير ايه رأيكوا في الكلام ده وجزاكم الله خيرا |
رد: مشكله في الفتيس الاتوماتيك في كريستاله 98
اهلا و سهلا بحضرتك
واضح ان حضرتك فعلا مش بتشارك معانا بالنسبه للمشكله الاول نبتدي بتغيير الزيت و لو انت مش بتغير الزيت كل 40 الف كيلو تعرف ان الفتيس في طريقه للتقاعد و بعدين شوف الحساس اللي بيقول عليه لاميكانيكي ولو ماحصلش حاجه يبقي تغير الفتيس و بلاش تلعب فيه |
رد: مشكله في الفتيس الاتوماتيك في كريستاله 98
السلام عليكم ورحمة الله وبركاته
اولا جزاك الله خيرا علي سرعة الرد ثانيا انا يمكن مش بشارك لضعف خبرتي في السيارات ولكن لو الموضوع كان في الاسمنت ولا الحديد ولا الطوب كنت تلاقيني طيارة لاني مهندس مدني ملايش في العربيات اما بالنسبة للمشكلة فأنا لسه شاري العربية قريب وهجرب اغير الزيت وربنا يسهل ومحتجش اغير الفتيس وخصوصا ان الفتيس بيأخذ كل غيارته كويس وفي السحب تمام ومفيش منه ازعاج غير في اللمبة اللي بتنور وبعدين انا سمعت ان سعر الفتيس الاتوماتيك غالي شوية فلو في حلول اخري غير التغيير يكون احسن وجزاك الله خيرا مرة اخري |
رد: مشكله في الفتيس الاتوماتيك في كريستاله 98
ممكن حضرتك توضح اكتر عن النتشة دى ؟؟
يعنى من التانى للتالت بس ولا على كل الغيارات ولا ساعات تحصل وساعات لا ؟؟؟ ولمبة الـ N بتنور فى التابلوه بس ولا فى الفتيس كمان ؟؟؟ لانى عندى مشكلة شبيهة لحضرتك شويه ؟؟؟ |
رد: مشكله في الفتيس الاتوماتيك في كريستاله 98
السلام عليكم ورحمة الله وبركاته
ازي حضرتك استاذ حسام اقول لحضرتك حكاية النتشة دي النتشة دي بتحصل مرة واحدة بس عند اول مرة الفتيس يجيب من التاني للتالت لكن باقي الغيارات زي الفل وحتي لو وقفت خالص بس العربية دايرة وجيت من التاني للتالت مبتحصلش النتشة دي تاني ولا مع اي غيار اما لو بطلت العربية خالص ودورت فعند اول مرة الفتيس يجيب من التاني للتالت تحصل النتشة دي ومن التاني للتالت بس اما لما بمشي علي غيار L عمر ما النتشة دي بتحصل ولمبة الـ N بتنور فى التابلوه بس تقريبا وتقريبا دي لاني عمر ما شوفتها ولا لاحظتها في الفتيس وربنا يسهل ويكون الحل بسيط مش زي ما خوفني اخونا حازم |
رد: مشكله في الفتيس الاتوماتيك في كريستاله 98
الحمد لله يا جماعة المشكلة اتحلت
زي ما كان الميكانيكي قالي لقيت في حساسين عايزين يتغيروا وغيرتهم وغيرت الزيت والحمد لله العربية دلوقتي من غير اي مشاكل وسحبها بقي احسن شكرا لكل من اهتم بالموضوع وجزاكم الله خيرا |
رد: مشكله في الفتيس الاتوماتيك في كريستاله 98
أهلا بيك يا بشمهندس معانا
أول لما أى لمبة تشخيص تنور الفيصل هو جهاز التشخيص لمبة ال N بتنور مع حضرتك يبقى لازم جهاز ال MUT و ده جهاز التشخيص الخاص بيميتسوبيشى يقرا الكنترول الخاص بالفتيس و نعرف اية المشكلة و بعد كدة نقرر هنعمل اية لكن بدون جهاز انا ممكن أنصحك بحاجة جايز تفيدك فى فيشة فى أعلى الفتيس بتكون كبيرة شوية مش 4 او 3 بينات لأ اكتر ممكن تكون 16 على بينة على ما أذكر الفيشة دى زى ما قلت اعلى الفتيس و فى نفس الوقت تحت البطارية فكثير من الأحيان بيجى عليها مية نار من البطارية خصوصا لو البطارية سائلة شوفها و نضفها دا طبعا لو جهاز التشخيص مش عند الميكانيكى لكن الصح تروح لمركز خدمة معتمد او مصرية الوكيل الأسبق لميتسوبيشى |
| الساعة الآن 07:56 AM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017