مشكلة فى البوجيهات والبنزين
 

معى عربية كيا برايد هاتش باك 1100 سى سى

لدى مشكلة تتمثل فى استهلاكها البوجيهات بشكل غريب ، فقد قمت بتغيير 7 اطقم بوجيهات خلال 9 شهور اخرهم تغيير اثنين خلال اسبوع واحد وهذا عدد كبير للغاية .

ثانيا استهلاك العربية فى البنزين كثير يعنى العربية تستهلك حوالى 10 لتر فى ال 100 كيلو وأنا اعتقد ان هذا كثير بالنسبة لعربية كعربيتى .

فالمشكلة تبقى فين ؟

رد: مشكلة فى البوجيهات والبنزين
 

للتذكير يا شباب

رد: مشكلة فى البوجيهات والبنزين
 

يا جماعة حد يعبرنى

رد: مشكلة فى البوجيهات والبنزين
 

بسم الله الرحمن الرحيم
يا باشا الموضوع ده عايز شوية معلومات بمعني
هل انتا بتلاقي البوجيهات القديمة مرطبه يعني عليها زيت مثلا و ده هيكون سببه ان جوان وش التقسيمة مش مظبوط فبيرشح زيت عليها و بالتالي بترطب و بتعمل مشاكل
ولا هل بتلاقيها متفحمه و عليها آثار عادم
و ده بيكون سببه مشكله في مجموعة الكهربا لو عادية بتبقي من الابلاتين و الكوندنسر و البوبينة غالبا مش بتطلع كهربا كافية لحرق البنزين و ده هيعمل مشكلتك التانية كمان و هيه استهلاك عالي في البنزين
و ممكن يكون وش السلندر عندك مش مظبوط او جوان وش السلندر بيهرب و في الحاله دي برضه البوجيهات هتبوظ بسرعة نتيجه وجود مياه اثناء الاحتراق بس ممكن تتأكد من ده انك تشوف الريدياتير اثناء دوارة العربية بيطلع منه فقاقيع هواء ولا لأ
بص اديني معلومات اكتر و انا احاول اشخصهالك يعني عرفني البوجيهات بتبقي طالعه لونها ايه او ريحتها ايه و لو عندك موبايل بكاميرا صورها كده و ابعت الصورة يكون افضل مع صورة لموتور العربية من فوق و ان شاء الله تلاقي الحل عندي
م - سامح ليله

رد: مشكلة فى البوجيهات والبنزين
 

أخيرا حد رد ربنا يخليك يارب

بص يا بشمهندس البوجيهات بتطلع من العربية متفحمة وده من ساعة ما اشتريتها ، وأنا كنت فاكر ان المشكلة من البنزين ال 80 من اسبوعين كده روحت للميكانيكى فلقيت البوجيهات طالعة متفحمة كالعادة وأنا ماحطيتش بنزين 80 غير مرة واحدة قلت خلاص توبة احط 80 تانى ، فجيبت طقم بوجيهات جديد وبعدين رجعت من عند الميكانيكى وكله تمام روحت الشغل وبرضو تمام وأنا راجع لقيت العربية عمالة تقطع وسحبها زى الزفت ركنتها لغاية اخر الاسبوع ولما روحت للميكانيكى جينا نبص على البوجيهات لقيتها متفحمة مع انى ما اتحركتش بيها غير هو مشوار واحد ، هو شك فى الكاربيراتير ولقى حاجة زى بوابة كده مابتفتحش مظبوط وفضل شغال فيها لغاية اما ظبطها وساعتها شوفت الفقاقيع اللى بتطلع من الردياتير اللى قلت عليها وقالى هى دى سبب مشكلتك والكربيراتير عايز يتفك ويتنضف فجيبت طقم بوجيهات مستعمل امشى بيه حالى لغاية اما اروح انضف الكربراتير .

رد: مشكلة فى البوجيهات والبنزين
 

بسم الله الرحمن الرحيم
بص يا باشا مفيش علاقة بين الكربراتير و الفقاقيع اللي بتطلع من الرادياتير لان الفقاقيع دي لو بتطلع علي طول الميه بتتقلب كده و بيخرج هوا ده معناه ان جوان وش السلندر عندك عايز يتغير لانه بيدخل هوا علي الفارغة بتاعة الموتور او ان وش السلندر نفسه عايز يتمسح علي المخرطه و دي حاجه تخلي البوجيهات شبة معرقه ميه كده او مرطبه و لونها بني
اما معني انها محروقه فده معناه ان نسبة الحريق بالموتور عالية يعني المخلوط من البنزين كتير
و كده يبقي هتشوف الكربراتير ممكن تكون بوابة السرعة بتعلق و تفضل مفتوحه علي السلانسية بس ده اكيد كنت هتحسه لان العربية كانت هتبقي عالية او بمعني آخر الموتور صوته هايج و كمان الشكمان بيطلع دخان كتير اسود و العربية مش مظبوطه و ده حله سهل هتروح لواحد بتاع كربراتير هيغير لك اكسات و بوابات و بكات سرعه و سلانسية او تجيب كربراتير جديد افضل
و نصيحه لما تعمل كده غير طقم كهربا بالمرة ابلاتين و كوندنسر و اسلاك بوجيهات مش هيكلفوك كتير حوالي 6 كوندنسر و 14 ابلاتبن و 25 طقم اسلاك بوجيهات و لو في امكانك تغير البوبينه كمان يكون احسن هيه في حدود 60 جنية
و كده تكون انتا قضيت علي المشكله تماما و ده هيوفر لك في البنزين اكتر مما دفعت لان انتا بتقول العربية 1100 سي سي يعني المفروض ماتعملش اقل من 275 كيلو في الصفيحه لو مظبوطه
و اي خدمة
م - سامح ليله

رد: مشكلة فى البوجيهات والبنزين
 

هو قبل ما اروح للميكانيكى صوت الموتور كان عالى بس دلوقتى رجعت للطبيعى وصوتها بقى هادى فأنا ممكن لما اروح لبتاع الكربراتير اخليه يأكد على كل شىء واللى محتاج يتغير اغيره أما تغيير الكربراتير كله فصعب اليومين دول ، بس كنت عايز اعرف تغيير الحاجات دى تتكلف حوالى قد ايه ؟

بالنسبة لطقم الكهرباء ايه فايدته وايه علاقته بمشكلتى ؟ معلش أنا اصلى بحب افهم الدنيا ماشية ازاى .

وشكرا ليك على ردودك يا بشمهندس سامح