|
أيهما أفضل MERCEDES C300أمBMW 320i ولماذا
علما انها لطالب جامعي ولكن في نفس الوقت دكتور يعني أنا عارف ان البي ام شبابي أكتر بس عاجبني في المرسيدس البودي كيتamgبحس انها اكبر في الحجم أنا عارف ان المفروض اقارن السي300 بالبي ام 330 بس أنا حاسس ان سعرها كتير على امكانياتها فما رأيكم انتم وياريت لو حد معاه واحده منهم او جربها او شافها يفيدني بانطباعه عنه ومشكورين مقدماROSE4U |
رد: أيهما أفضل MERCEDES C300أمBMW 320i ولماذا
ياباشا الله يخليك لا خبير ولا حاجة, ال 320I فعلا شكلها شبابى جدا وتنفع لشاب سواء فى الجرى أو الفخامة والشكل, وقطع غيارها تعتبر موجودة وأرخص من المرسيدس ده لو الموضوع فى دماغك.
المرسيدس بحس أنها عربية رزينة جدا, ومتخيلش أبدا شاب راكبها, فيها كماليتها وثباتها, لكن شكلها كبير قوى فى عيون الناس, ونظرة الناس للى راكب مرسيدس غير للى راكب بى أم, المرسيدس بتمثل الفخامة والرزانة والنضج, والبى أم بتمثل الشباب والسرعة والموضوع ده بجد. وسواء هتجيب جديد أو مستعمل, البى أم تتفوق على المرسيديس فى الأنتشار وسهولة أعادة البيع وقطع الغيار التى تعتبر رخيصة, وكمان أمكانية التعديل عليها بسهولة, وهى مناسبة أكثر لشاب. وده رأيى الشخصى, شوف أنت مستريح لأيه وأنهى اللى عجباك أكثر, وأعمل لكل واحدة تست درايف سواء لو هتجيبها من التوكيل أو لو مع حد معرفة. والبى أم أرخص بمراحل من السى 300 بحوالى مية ألف يعنى مبلغ مش هين, بس المرسيدس أقوى وتسارعها للمية أسرع, والبدى ال AMG شكله تحفة على المرسيدس فعلا. |
رد: أيهما أفضل MERCEDES C300أمBMW 320i ولماذا
معالي الباشا انجكشن اشكرك بشده وبعنف على كلامك الشامل والموضوعي وفعلا كلام كله في التمام اعتقد ان هيكون له اثر كبير على اختياري
وفي انتظار آراء المزيد من اعضاء المنتدى الكرام |
رد: أيهما أفضل MERCEDES C300أمBMW 320i ولماذا
صعب يا استاذ فارس حد يديك راى فى موضوع شكلى لان ده حاجة نسبيه وخاصة وحضرتك بتقارن بين احدى الحسنيين الاتنين حلوين ومفيش حاجة منهم ينفع يتقال عليها وحشة وحتى موضووع القيمة مقابل النقود صعب يتطبق فى الفئه ديه لانها مش فئه اقتصادية بالعكس التفضيلات الشخصية هى الفصيل فى الاختيار
بس احنا ممكن نفكر مع بعض ايه تفضيلاتك واولوياتك ونشوف ايهم اقرب طالما انك مش ميال تماما لواحدة من الاتنين |
رد: أيهما أفضل MERCEDES C300أمBMW 320i ولماذا
أولا بشكر ردك واهتمامك يا أستاذنا أبونوره أستاذنا كلنا ومؤسس الموقع الجامد ده ثانيا انا أولوياتي كالتالي عشان تكون واضحه وبناء عليها تفضلي واحده منهم 1- عايز العربيه يكون حجمها كويس ومنظرها فخم ومبحبش الحجم المدمج أو الصغير وفي نفس الوقت تكون شبابي وستايل 2-بحب التميز يعني مش عايزها تكون منتشره 3-ساعات بحب أجري مع نفسي بس لو حد سابقني بنفضله بس لو أصر عايز أكتمه خالص وأخليه يفقد الأمل444546 4-مبحبش الصيانه الدوريه ووجع الدماغ يعني عايز عربيه اجيبها وانساها وفي نفس الوقت انا مبفحتش العربيه أوي يعني بروح الجامعه 3أيام في الأسبوع وساعات يوم واحد بس وتقريبا مبسافرش خالص او اقطع مشاوير أكتر من 30كم ولا مصايف ولااي كلام من ده 5-أسعار كويسه لقطع الغيار والاكسسوار والزينون وكده وكمان سعر اعاده بيع ميخسفش بيها الأرض 6-انطباعي حاليا:ميال للبي ام بس حاسس انها صغيره أصغر من المرسيدس وفروفوره بمعنى أصح مش عارف ليه(يعني ملهاش هيبه) 7-بالنسبه للc300هل هي مختلفه في الشكل عن بقيه الc-classولا هي نفس الشكل بس بموتور أعلى؟؟؟(سؤال محيرني) وكل سنه وانتم طيبين بمناسبه رمضان وربنا ميحرمناش من آراءكم(يعني أي عضو مهما كانت خبرته في الموضوع قليله بس له رأي ميبخلش علينا بيه) |
رد: أيهما أفضل MERCEDES C300أمBMW 320i ولماذا
البى ام 320 لا تقارن ابدا مع المرسيدس c300
لان محرك ال320 اصغر ب100 سى سى من c300 لما تحب تقارن 320 قارنها c200 يعنى 316 تقارن c180 بعديها 320 تقارن بc200 بعديه الجميلة 335 تقارن بc300 بعديها العملاقة M3 تقارن بC36 AMG طبعا لو قلنا تقدم وفخامة وشبابية والرياضية وقمة التكونولجيا يبقى البى ام طبعا لكن لو عايز الرزانة والقوة والشكل فخم ومهيب يبقى C بكل انواعها لكن انا افضل البى ام الفئة التالتة لانها تاريخ ممتد من اول موديل نزل فيها ف عام 1972 فيعنى عراقة ما بعدها عراقة لكن الC بدأت من مطلع الثمانينات وبعدين انت عايز المرسيدس الالمانى ولا المصرى المصرى تفقيل زبالة ومعروف ان حوادث المرسيدس المصرى منتشرة جدا وصوت الامة عمالة مشاء الله بقلها تلات سنين بتذم فى التفقيل المصرى ل مرسيدس مصر عايز الالمانى يبقى دى حاجة تانية برضة فى البى ام ابعد عن تقفيل البافارية وشوف التقفيل الالمانى وفى كلتا الحالتين دى هتفرق معاك فى السعر جامد بس هتاخد بقى عربية تشد معاك ولا تخذلك ولا تجبلك شلل رعاش من اعطله الغربية وبتوفيييييييييييييق |
رد: أيهما أفضل MERCEDES C300أمBMW 320i ولماذا
استاذ فارس
اولا بشكرك علي ثقتك الغالية في و علي رسالتك بالنسبة بقي لموضوعك بص يا زعيم اولا واضح انك عارف ان في فرق كبير بين ال C300 و ال 320 سواء في القوة او الفخامة حتي لانك بتقارن اعلي فئة في ال C باقل فئة في ال 3 و كل ده طبعا في صالح المرسيدس طبعا من ناحية الحجم فالاتنين يعتبروا صغيرين و ضيقين خصوصا في الكنبة الخلفية فمفيش فرق كبير ما بينهم بالنسبة لموضوع التميز فيكون في علمك ان ال C منتشرة اكتر من ال 3 و محدش هيركز قوي انها 300 من اول وهله بس بشكل عام العربيتين مميزتين لوحدهم في الشوارع المصرية و ده بسبب سعرهم طبعا نيجي بقي للمصاريف و الصيانة. طبعا الاتنين قطع غيارهم مش رخيصة و الفرق مش كبير مع الاخذ بعين الاعتبار ان المرسيدس عموما اكتر احتمالا من البي ام خصوصا في ما يتعلق بمشاكل الكهرباء. و طبعا ال C300 تعتبر غول بنزين بالمقارنة مع ال 320 و في ظل الاوضاع الحالية في البلد و الاشاعات عن غلو البنزين ممكن تبقي خيار مش سليم قوي بالنسبة لاعادة البيع فدي معروفة المرسيدس بتمسك سعرها عن البي ام و بفرق اما بالنسبة للكماليات و الاكسسوارت فطبعا ال C300 هتتفوق علي ال 320 لانها زي ما وضحت تعتبر فئة اعلي بالنسبة لشكل ال C فهي مبتفرقش بالنسبة لحجم المحرك لكن بالنسبة للتجهيز يعني ال classic غير ال Avengard غير ال Elegance و طبعا ال AMG kit بتحلي شكلها قوي و بيديه نفس رياضي قوي من الكلام اللي فات ده النتيجة طبعا في صالح ال C300 في كل حاجة ما عدا الاقتصادية و هي اللي ارشحها لك لو معندكش مشاكل في الموضوع ده. اما كنصيحة ارشحلك و بقوه ال C200 CGI الجديدة مع ال AMG kit فيها كل اللي انت محتاجة و بديل اقتصادي لل C300 و شكلها خرافة و ملفت للنظر و لمحاسن الصدف كان في واحده ماشية قدامي النهاردة لونها ابيض و سقف بانوراما مش طبيعية قعدت اطاردها عشان امتع نظري بيها و حتي لما صاحبها خذ باله و حاول يجري مني مسيبتوش الا لما غير طريقة حاجة اخيرة يكون في علمك ان الاتنين ال C و ال 3 هيتغير شكلهم في 2013 |
| الساعة الآن 02:52 AM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017