قبل أن تشتري اسبيرانزا - احذر!
 

باختصار سأروي لكم خلاصة تجربتي المريرة ومعاناتي مع اسبيرانزا 516 -1600cc حتى تم بيعها والحمد لله ،هذا ليس للنقد ولكن للاستفادة وأخذ العبرة لمن يريد :

(سيارتي كانت موديل 2007 وعملت بها 20000كم ولونها ،Sky grey- سيارتي السابقة كانت نوبيرا 2003 أوتوماتيك)

1) بداية استلام السيارة المكيف كان لا يعمل ودواسة البنزين بتقطع، تم ضبطهم بصعوبه وبعد عده زيارات للتوكيل وعده خناقات أيضا.
2) العفشة ناشفة جدا وتحس بكل زلطة في الطريق وتسمع أصوات غريبة وانت بتلف يمين أو شمال حتى بعد تعديل العفشة .
3) سحبها ضعيف جدا خاصة عند تشغيل التكييف وياسلام لو كنت محمل معاك ناس في العربية وطالع كبري في عز الظهر (فضيـــــــــــــــحة)، وحتلاقي في الأحوال العادية والله بلا مبالغة الـ 128 بتسبقك في الطلعة وكذلك جميع السيارات الـ 1300 والـ 1600 طبعا ، وموضوع انها 117 حصان وانها 147 نيوتن ده كلام فاضي وكذب عن تجربة وهي من واقع التجارب تقدر تقول انها فعليا 90 حصان ، 130 نيوتن/م
4) في المطبات وما أكثرها تسمع صوت طقطقة قدام ولما المطب ييجي وره تسمع نفس الصوت ورا وهو صوت ثابت في المطبات ومنتظم. (سوف تتعود عليه).
5) صفارة الفرامل وخاصة عندما تسخن الطنابير تحس انك ماشي بصفارة ممتازة تغنيك عن أي كلاكس (أيضا فضيحة)، نوعية التيل سيئ جدا بياكل الطنابير ، وكذلك نوعية الطنابير سيئة جدا - الطنابير اتاكلت بعد 20الف كيلو - طبعا خارج الضمان.
6) التابلوه بدأ يتقوس ويقب من الشمس ولسة العربية ما كملتش سنة !!
7) الباغة الخاصة بالكلاكس في الدركسيون غير حساسة وأحيانا بتعلق ونوعيتها رديئة .
8) الدوكو الخاص بالسيارة خفيف جدا لو عملتوا بأظافرك حيطلع علطول والاكصدام الأمامي والخلفي بدأوا في التقشير بعد الشهر الأول!!
9) صوت المارشدير عالي جدا (أيضا فضيحة ) الفتيس بيعض في المارشدير حتى بعد ضبطه في التوكيل ( لكن حتتعود عليه)
10) عيب قوي جدا في تصميم الموتور وأنه مقلوب ستجد الهيدرز الخاصة بالشكمان والفرن تم وضعهم إلى الداخل ناحية السائق والتابلوه وليس إلى الخارج كما هو الحال في جميع السيارات الأخرى المحترمة (فهل هذا اختراع جديد ؟) مما يسبب دخول حرارة الشكمان إلى الداخل ودليل ذلك حط يدك على الكاسيت بعد السير لفترة طويلة حتلاقيه مولع وسخن جدا ، انا كنت مركب صفارة انذار في الموتور ساحت واضطررت لتغييرها من سخونة الموتور ، فحركة قلب الموتور سيئة جدا وفكرة فاشلة تضر بالسيارة على المدى البعيد.
11) سماعات الكاسيت الأمامية كانت لا تعمل وتم ضبطها في توكيل كلاريون (السيارة زيرو !!!)
12) التوكيل وما أدراك ما التوكيل المعاملة الفعلية سيئة جدا جدا جدا ، لا تنخدع بالابتسامة وحضرتك ويا افندم وتحت أمرك ... ، انا عايز واحد يشتمنى بس يصلحلي العيوب اللي رايح عشانها مش بعد ما أحجز قبلها بأسبوعين وأروح وأضيع يوم كامل وأدفع مبلغ لا بأس به أرجع البيت بنفس العيوب !!!! (ضحك على الذقون)
13) أسعار الصيانة غالية صيانة 10000كم 300 جنيه - صيانة 20000كم - 700 جنيه ولدي ايصالات دفع بذلك ،طبعا كتير جدا غير اللي كنت بأدفعه في الزيارات اللي في النص مع المعاناه مع حضرتك وتحت أمرك يا فندم والكلام الفارغ ده والنتيجة ولا حاجة.
14) سنتر الباب الخلفي يمين لا يعمل وذهبت للتوكيل 3 مرات دون جدوى السنتر مش موجود حاليا ياا فندم على مدى شهرين !!!!
15) يوجد حدفة يمين لوجود عيب في الشاسيه باعتراف التوكيل وكثير من مالكيها سواء شعروا بها أو لم يشعروا وليس لها حل .

عموما هذا ما أذكره وهذه تجربتي الشخصية لمن يريد أن يستفيد ، والحمد لله بعت العربية وخلصت منها واشتريت الآن دايو ليجانزا مو 2001 أوتوماتيك وهي الحمد لله زي الفل وربنا يبارك فيها .

وتقييم نهائي للسيارة أعطيها 60% وقد تكون جيده لمن كان لديه قبلها 128 - سيات 133 - 127- 125 أو شي من هذا القبيل مع احترامي الكامل لجميع السيارات السابقة ، وهي تصلح أكثر للسيدات وللاستخدام الخفيف غير كده للأسف مش حتنفع واللي حياخدها حيفكر يبيعها بعد أسبوع من شرائها .

اللهم قد بلغت اللهم فاشهد - نصيحة خالصة لوجه الله

أي استفسار انا جاهز 0123498224 م/ خالد جمال -
ملاحظة السيارة اتباعت بـ 60000جنيه ولو جابت أقل من كده كنت حأبيعها برضه.

رد: قبل أن تشتري اسبيرانزا - احذر!
 

اشكر حضرتك جدا على النصيحه
لكن مكان موضوع حضرتك فى قسم الاسبيرانزا او الصينى العام
ارجو حد من الاداره ينقل الموضوع لمكانه الصحيح

رد: قبل أن تشتري اسبيرانزا - احذر!
 

رد: قبل أن تشتري اسبيرانزا - احذر!
 

الحمد لله انك بعتها يا ريت لما تعرف أن حد عايز يشتري اسبرانزا تنصحه لأن فعلا العربية دي عيوبها ملحوظة جدا لكن الناس بتنبهر بالأوبشن والكماليات اللي جوه العربية والكارثة ان قطع غيار العربية دي رخيصة جدا بس تروح التوكيل تلاقي نفسك دافع فلوس كتيرة جدا ....

رد: قبل أن تشتري اسبيرانزا - احذر!
 

شكرا على معلوماتك و فعلا الصينى غير مقنع على الاقل بالنسبة لى

رد: قبل أن تشتري اسبيرانزا - احذر!
 

لا حول ولا قوة الا بالله--داخل بتنصح الناس يا باشمهندس--
ياراجل اتقى الله --وشوف انت بنفسك كنت بتقول اية على سيارتك قبل وبعد ال20 الف
اى قبل وبعد البيع ----وعلشان ماحدش من الاخوة هنا يفهم غلط --الموضوع دة قديم واعتقد ان وائل مجدى فاكرة كويس --
وبالمناسبة انا لا بدافع عن الاسبيرانزا ولا غيرة--
انا بعت الاسبيرانزا ال516 ب58000--وتانى يوم اشتريت الاسبيرانزا ال620 --
مع العلم ان ال516 كانت عاملة 9000-ك-م

((من غشنا فليس منا))

هذا هو اجمل و ادق و اكثر الردود واقعيه سمعته على السبيرانزا

و انا مؤخرا اصبحت من مالكى السبيرانزا و اخترتها بنفس الفكر اللى قاله الاخ ابو نورا

انا الشكل عندى مهم عشان طبيعه عملى و امكانياتى لا تسمح بشراء يابانى او الانترا و لا على سعر قطع غيارها و الفيرنا كانت البديل و لكن لم تعجبنى لا من الداخل و لا من الخارج و خصوصا انها بدأت تبقى تاكسى و هتاخد سكه الشاهين مع انها عربيه ممتازه فى اساساتها اما قصه التقفيل و التوكيل فده ينطبق على كل تقفيل مصر فى كل العربيات

و اللى طمننى ان العربيه بقى لها سعر فى السوق و لو دخلت سوق السيارات هتلاقى التجار بيجروا عليها و انت اللى ليك انك ساعه ماتبيعها ماتخسرش جامد و موءخرا شفت كذا عربيه موديل 2007 بتتباع ب58000 و اصلها 63500 يعنى يوم نا تتخنق منها مش هاتغلب فى بيعها

فقررت بعد الاستخاره اشترى العربيه لحين ما ربنا يرزقنى و ابيعها و اجيب لانسر او كورولا يعنى عربيه تبقى مؤقته

و نصائح ابونورا بخصوص الموتور فهمتنى العربيه قبل ما اسوقها و ده سهل عليا التعامل معاها و كنت عارف معظم عيوبها و حاليا فى انظار الوصول الى صيانه ال1000 و اشوف بعدها اذا اتغير اى شىء

انصح اللى عايز يشترى العربيه انه يجربها الاول مع اى حد يعرفه عشان يشوف احساسه بيها ايه
و لازم يعرف انه مش راكب BMW و الا هاينكد على نفسه كل يوم و خصوصا لو قارنها باليابانى

اما بالنسبه لكونها صينى تقفيل مصر و بالنسبه لسعرها فالعربيه ممتازة و ركوبه ممتعه و مريحه

و فى الاول و فى الاخر ربنا اللى بيسترها