|
سؤال عن غسيل السياره
غدا إن شاء الله هاودّى العربيه المحطّه عشان تتغسل ..
أوّل مرّه أغسلها فى المحطّه لأنّها جديده نسبيا .. سألت النهارده فى المحطّه عن عملية الغسيل عشان أتأكّد إنّهم هيغسلوا العربيه من برّه و تتنضّف من الصالون .. لقيت الراجل فى المحطّه بيقول لى و هنغسل الموتور كمان !! و أنا كنت سمعت إن مفيش داعى أصلا لموضوع غسل الموتور ده و إن مفروض يتعمل بفوم معيّن و مالوش لازمه يكون غسيل متكرر .. و قلت كده للراجل فى المحطه قال لى عشان العفره و التراب !! فمش عارفه بصراحه هل مفروض أسيبه يغسل الموتور ولاّ أكتفى فقط بالغسيل الخارجى لجسم العربيه ومافتحش الكبّوت أصلا عشان محدّش يهوّب ناحية الموتور؟ ptmnlo123per1116 |
رد: سؤال عن غسيل السياره
لا تقلقى من غسيل الموتور
عادى .... دا ...... بالعكس غسيل الموتور كويس لانه بيشيل العفار والتراب اللاصق بالموتور والاجزاء المختلفه من المحرك يفضل غسيل السياره كل فتره غسيل كامل ييجيلك احساس بعد غسيل الموتور .... ان صوت السياره اهدأ .... والحركه كويسه |
رد: سؤال عن غسيل السياره
هوا عادى جدا بيتغسل بجاااز و كدا بس انتى بتقولى يعنى العربية جديدة و كدا فاعتقد بلاش فى الاول كدا ولازم تتغسل فى بنزيننة محترمة اجنبية بلاش بقى الوطنية و التعاون و الحاجات دى يعنى خليكى فى شيل - كالتيكس - كدا دول انضف اتنين عشان يكونو فاهمين كويس و ما يبوظوش حاجة ( ملحوووووووظة هامة : اتاكدى انو مغطى الكومبيوتر بتاع العربية كويس ) و طبعا ما تنسيش اكرامية الصنايعية بس خلى بالك عشان دول سفااحين يعنى على القد كدا حاجة بسيطة |
رد: سؤال عن غسيل السياره
هو الاصح وحسب تعليمات التوكيل ان موتور العربية يتغسل بفوم غير مائي علشان الحساسات بتاعت العربية ودة موجود في العربيات الحديثة واسمة تقريبا (ريليهات) لكن الاشهر كلمة حساسات وهي ممكن تسبب في بعض السيارات قلة في سحب العربية او ضعف في التكيف ولكن بعد فترة بتكون المياة نشفت بترجع كل حاجة زي الاول. بس علشان دة مش متوفر هنطر نغسل فالبنزينة ومفيش حاجة اسمها بنزينة نضيفة وبنزينة مش نضيفة في موضوع الغسيل بالخصوص لان كلة بيتبع نفس الاسلوب في الغسيل 1-غسل الموتور بمسدس المياة(الضغط ). 2-غسل الموتور بالجاز. 3-غسل الموتور بالصابون. 4- غسل الصابون بالمياة . والصابون دة علشان لو سبتي العربية بالجاز اول لما هتسخن هتلاقيها بتدخن وتتخضي تفتكري فيها حاجة ولكن دة طبيعي بسبب سخونة جسم الموتور وسخونة واحتراق الجاز الموجود علية علشان كدة بيغسلو بالصابون علشان ميحصلش كدة. انا شخصيا كنت بستمتع بغيل سيارة والدي . بس تحاول تخلي الراجل يخف المياة شوية وميدربش المسدس بتاع المياة عن قرب من اجزاء السيارة عموما, لانة ممكن يطير البوية ممكن يكسر اي حساس او يخرم اي خرطوم فالسيارة علشان قوتة 350بااااااااااااار . واتمني اني اكون شرحت كويس وافدتكم |
رد: سؤال عن غسيل السياره
الف مبروك يا فيروز
بالنسبه للغسيل ما فيش فيه اي مشكله لكن لو حيغسلوا الموتور بالجاز يبقي بلاااااااش من الغسيل دا الموتور عندك اكيد نضيف و هما اكيد فاهمين بيغسلوها ازاي فهميهم بس الميه ما تجيش علي الموتور و يدوب علي قد الدواخل و خلاص او بلاش منها مش مشكله. بالنسبه للدخان يبقي في حدود 7 جنيه او 10 جنيه ما تزوديش عن كده علشان فعلا بيطلعوا في العالي و بيبقوا ارخم خلق الله في موضوع البقشيش دا |
رد: سؤال عن غسيل السياره
اقتباس:
يمكن اختلاف موقع و فيه حاجه كمان عاوز اقول عليها عن واقع تجربيه بجد بنزينة الوطنيه احسن بنزينه ممكن تتغسلى فيها عربيه بجد احسن من كالتكس كالتكس بينفخوا التراب الى جوا على السريع بس الوطنيه عندهم مكانس كهربا قويه تشفط الاتربيه مش تزقها لحته تانيه و الوطنيه عندهم غسيل بالفوم كالتكس معندهمش و الوطنيه برضه من انشائات الجيش يعنى حاجه مش سهله برضه |
رد: سؤال عن غسيل السياره
طيب وغسيل الفوم بكام وفين
الموتور بس والباقى نعمله احنا بقى |
| الساعة الآن 10:48 PM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017