مصر موتورز مجتمع السيارات - ملاحظات مشترى جديد للسيراتو SX 2010

السلام عليكم، إزيكم ياجماعة
أخوكم لسه مستلم سيراتو SX وكيل من حوالى شهر وحبيت أشرككم بملاحظاتى حوالين العربية والوكيل
أولا قبل ما أشتريها لفيت كتير وقريت كتير حواليها فى الانترنت وسمعت اشاعات كتير الخصها فى الآتى
1- العربية ماتورها قوى
2- الجنوط ال 17 كارثة وبتفرقع أول ماتخضها
3- العفشة ناشفة جدا ومن كتر ماسمعت فى الموضوع ده حسيت أنى هشترى وابور ظلط
4- المقصات فشنك وبتكسر مع أول مطب صناعى (الحتة الأخيرة من عندى)
5- التوكيل ناس محترمين ومواعيدهم برفكس
6- العفشة مش مصفحة تحت الماتور
7- التكييف قوى وما بيأثرش تأثير واضح على سحب العربية، بس فى أول شهر ولا اتنين هتشم ريحة مش ظريفة وهتروح مع الوقت
8- الخليجى أحسن من الوكيل

المهم نزلت وبدأت التدوير ورحت الوكيل ورحت موزعين ليه ورحت عند أجنصات بتتعامل فى الخليجى وسألت وخرجت بالآتى (لاحظوا ان كل ده قبل الشراء)
1- الوكيل (فرع روكسى) ال Sales هناك بيتكلموا بالتيلة ولو حبيت تشترى منهم هيدفعوك حجز 20 ألف ويركنوك جنبيهم 3 أو 4 شهور(ناس قرايبى قعدوا 6 شهور وفى الآخر اضطروا ياخدوا كاتيجورى أعلى من اللى كانوا عاوزينه علشان يخلصوا)

2- الأجنص لو عنده خليجى هيقولك "لأ طبعا الخليجى أفضل دهان وتكييف ومش عارف إيه" ولو ماعندوش يقولك "لأ طبعا الوكيل" ولدرجة ان واحد من الأجنصات الكبيرة قوى فى شارع النصر رحتله مرة البياع نصحنى بالوكيل وده طبعا علشان كان عنده كام حتة باقية وبعد شهر ولف هنا وهناك رجعتله تانى ووقتها كانت العربيات الوكيل شحة جدا فى السوق ولقيته منزل عدد مهول من الخليجى ولمأ سألت نفس البياع قالى البوقين بتوع الخليجى أحسن ولما قولتله الضمان قالى ممكن تشترى ضمان اسمه تربل إيه بألف ونص 3 سنين أو 60 ألف واللى خرجت بيه ان فعلا مافيش فرق وده من واقع 3 نقط:

كلام منطقى بيقول ان الشركة المصنعة اللى هيا كيا -وده للى نسى أنا بتكلم عن مين- لما هتصنع بتحط سمعتها ودى مش شركة صينية هتروحلها تقولها لأ والنبى بلاش الدهان الحلو ده ولا بلاش التكييف اللى بيسقع ده ولا بلاش العفشة الحديد دى عاوزها بلاستيك مثلا ... لأ طبعا يوم مابيحصل فرق بيحصل فرق فى الأوبشنز مثلا زرار يعلى ويوطى النور، مثلا يشيلك الولاعة والطفاية، مثلا يغير الجنت ال17 ب16 والعكس .... ألخ يعنى الفرق متركز فى امكانيات مش حديد وعفشة وموتور
النقطة التانية من واقع ناس ساقوا اللى اتنين (وكيل وخليجى) وبصوا على الاتنين من جوه وبرة ومن تحت وفوق ومنهم ناس أنا شخصيا أثق فى كلامهم جدا وأكدوا على عدم وجود فرق
كلام البياعين نفسه اللى بيتحول 180 درجة على حسب البضاعة اللى موجوده عنده

المهم نكمل ملاحظات اللف:
3- الوكيل مديك 5 سنوات أو 100000 كيلو وبصراحة دى نقطة زغللت عينى كتير لأن كل اللى حواليا من اللى اشتروا فى نفس الفئة من لانسر وشيفروليه وغيره آخرهم 3 سنوات

4- خلال فترة اللف والدوران بدأت الكروز تزغلل معايا بس الموضوع مااحتجش منى وقت طويل على ماحسمت أمرى واستقريت على السيراتو وده علشان

الكروز ماتور تكنولوجى قديم ومن دايو وماحصلش عليه تعديلات خلال فترة طويلة
الكروز مش مريحة فى قعدتها - أنا جربتها وجربت السيراتو فى الأجنصات طبعا- لأ بصراحة قعدة السيراتو أحلى وأوسع بصورة ملحوظة
حسب ماقرأت -لاحظوا انى لسه ماجرتش بنفسى- استهلاك السيراتو جوه البلد من 10-12 لتر لكل 100 كيلو بينما الكروز 19 لتر -حاجة فظيعة طبعا- لأ وبنزين 95.
برضه من واقع مجلات متخصصة ومواقع.... سحب الكروز مخنوق ولايقارن بسحب السيراتو
السعر أغلى ومش فاهم ليه - يمكن بسبب أن الغربال الجديد ليه شدة- وناس كتير قالوا ان بمجرد ما الأوبترا تختفى سعر الكروز هينزل

5- بدأت أحاول ألقط أى حد جايب سيراتو وواقف جنبى وأسأله ... أخبار السحب إيه، أخبار العفشة إيه، ألخ وكانت النتيجة ان العفشة مش ناشفة بالشكل اللى كنت بسمع عنه وللحق يقال ان صادف كل اللى سألته كان معاه جانط 16 وبخصوص الشاسيه الغير مسلح منهم كان مش فاهم أصلا أقصد إيه ولكن اللى فاهمين قالولى انهم سمعوا برضه الكلام ده لكن لما رفعوا العربية وبصوا لقوها مسلحة فعلا تحت الأجزاء المهمة فى الموتور

6- من واقع مجلات ومواقع وناس فاهمة كويس فى العربيات فهمت انه حتى لو العفشة ناشفة نتيجة الجنط ال17 إلا ان ده هيقابلوا ثبات رهيب

7- الخليجى بيقل من 2000 إلى 3000 تقريبا عن الوكيل وتنوع الأوبشنز فيه أكتر .... مثلا تلاقى فتحة سقف مع جنط 16 مع عدم وجود ولاعة وطفاية مع زرار بيعلى النور الأمامى ويوطيه (مش فارقة قوى يعنى) كل ده بحوالى 118500 ومقابلها 120000 فى الوكيل بفتحة سقف وجنط 17 وحاجات زى دى

8- المهم صليت ركعتين استخارة وتوكلت على الله وقررت أجيب سيراتو وكيل جنط 17 وحاولت أجيب أبو فتحة سقف بس مالقتش .... فقلت خلاص بلاها فتحة السقف المهم النية :))

وللحديث بقية ...

السلام عليكم، نكمل
زى ماقلت لحضراتكم توكلت على الله وقررت أجيب ال SX وكيل بجنط 17 وحساسات
ولأنى عمرى ما سقت اتوماتيك قبل كده فضلت أجيب معايا واحد قريبى فى الاستلام
ويوم الاستلام لقيت الموزع بيقولى ان الوكيل لسه مبلغه ان ضغط العجل يكون على 26؟؟ بصراحة استغربت بس قلت طيب حاضر وهبقى أتاكد من الوكيل بعد كده
قالى برضه ان ال أر بى ام خلال ال 1000 الأولى ماتخلهاش تزيد عن 3.5 ... ماشى

من ناحية اللون كنت عاوز أجيب اللون الفيرانى اللى بيسموه titanum silver ولكن لأنى مالقتوش جبت الموكا Metal bronze وبصراحة حمدت ربنا لأن اللون ده فعلا أحسن كتير من الفيرانى لما تقارنهم حنب بعض وبشهادة كل اللى شافوه

المهم استلمتها بزيادة 1000 جنيه عن الوكيل نظير التسليم الفورى، ماعلينا، واستنيت يومين على الترخيص ويومها بالليل كانت أول تجربة ليا بيها وأول حاجة لاحظتها ان العفشة مش ناشفة بالشكل الفظيع اللى سمعته، تانى حاجة كنت مهتم آخد بالى منها متوسط استهلاك البنزين حسب ماكمبيوتر العربية بيقول، يومها نزلت لفيت بيها جوه مدينة نصر بين عباس ومكرم وكان الخميس والشوارع زحمة ولاحظت ان المعدل فعلا كان بين 12-13 لتر لكل 100 كيلو

تانى يوم كان عندى سفرية العين السخنة قلت كويس للتليين فرحت أولا محطة بنزين ونزلت ضغط العجل لـ 26 (بالمناسبة كانوا مظبوطين على 40-45) وحاولت طول السكة مازودش عن 100، بصراحة العربية سحبها حلو وبتستجيب بسرعة على عكس ما أنا متعود أسمعه عن الاتوماتيك

وأنا راجع قلت لنفسى ما أجرب موضوع الحدفة، سبت الطارة لقيت فعلا فيها ميلة خفيفة جدا ناحية الشمال ... بس بصراحة ممكن الطريق يكون مأثر وبرضه لاحظوا انى ماحستش بالحكاية دى طول ما إيدى على الطارة

المهم بعد شهر من السواقة عليها ملاحظاتى الآتى:
1- العربية ماتورها قوى وسحبها حلو وسيبوكوا من رأيى، أنا طول عمرى بسوق مانيوال لكن أنا هسترشد برأى اتنين أولهم قريبى اللى استلم العربية معايا (هو بالمناسبة معاه نيسان صنى 2008 أتوماتيك وساق قبل كده بيجو ومرسيدس) ولما سألته عن العفشة والسحبة وبدون مجاملة قالى العفشة مش ناشفة ولاحاجة (بس بصراحة احنا كنا ماشيين على طريق نظيف وبدون مطبات جامدة) والسحب برضه حلو جدا
التانى كان أخويا (كان معاه قبل كده اوبترا اتوماتيك وكان مقروف من سحبها وحاليا لانسر اتوماتيك ومبسوط من سحبها) أول ما ساق العربية ومن غير ما أسأله قالى سحبها كويس جدا

2- الكبوت تحتيه الدنيا شيك ومنظمة جدا

3- الشنطة واسعة وممكن توسعها أكتر من خلال الشدادتين الموجودين جواها كل واحدة فيهم بتتنى نص من الكنبة الخلفية

4- الجنوط ال17 عاملين شغل جامد جدا فى شكل العربية وبصراحة لاحظت ان وجودهم بيفرق بشكل واضح فى الاحساس بفخامة العربية وكبرها بالمقارنة بالجنط 16 أو 15

5- الكابينة من جوه واسعة ومريحة وعزلها رائع واول ماتقفل الشبابيك هتلاقى نفسك فى دنيا تانية من ناحية الصوت ولكن بدون مايمنع عنك الاحساس بالخارج وكمان عزلها من ناحية الهوا رائع لدرجة انك اول مابتقفلها بتحس ان الدنيا كتمت جوه ولازم تولع التكييف بس بصراحة قلت أستنى ال 1000 الأولى
كمان عاجبنى السندات اللى فى الكنبة الخلفية ابو كبايتين وجراب النظارة وأنوار الكابينة الأمامية والوسطانية وأنوار الشماسات
التابلوه جميل والأنوار فيه عاملة شغل والكاسيت صوته قوى وكنت قريت ان ال USB بيعمل مشاكل أو بيفصل ساعات مع الكلاكس جربته ميت مرة وماحصلش
عجبنى كمان مخرج الكهرباء ال 12 فولت اللى بيريحك من استعمال مخرج الولاعة
أماكن التخزين جوه الكابينة حلوة سواء الموجودة فى التابلوه أو بين الكرسيين الأماميين أو الجزء الصغير الموجود عند فتحات الولاعة والUSB وكمان الموجودين فى الأبواب
عجبنى موضوع الحساس الموجود فى إزاز الشبابيك اللى بيخلى الإزاز يرد لتحت تانى لو حاجة وقفت فى طريقة وهو بيقفل

6- ظهر العربية مش واطى ومش عالى قوى واللى مضايقنى فيه شدادة السحب الموجودة تحت الشنطة واللى بتمنعك وانت بتركن عمودى على الرصيف وفى ظل الأرصفة العليا فى بلدنا من انك تريح ظهر العربية فوق الرصيف .... نفسى أشيلها ولا أتنيها لفوق

7- أول مرة أحاول أركن بين عربيتين موازى للرصيف كانت فضيحة بسبب ارتفاع ظهر العربية وحسيت انى لسه بتعلم سواقة واتضحلى بعد كده ان الاعتماد على الحساسات والمرايات الجانبية هما أفضل حاجة وهتخليك تركن كويس وبراحتك بدون مشاكل لكن اللى ضايقنى على الرغم من وجود 4 حساسات ان آخر مستوى فيهم بعيد يعنى مع الصفارة الطويلة بيبقى لسه وراك بتاع 40 سم ... لكن مع الوقت هتتعود

8- نسيت اقول لحضراتكم على استهلاك البنزين واللى لغاية دلوقتى بقيسه من واقع كمبيوتر العربية ... لما كنت على طريق العين السخنة وأول ما وصلت لاحظت ان متوسط الاستهلاك واللى كان جوه البلد من 12-13 نزل مع الطريق الطوالى لحد 6.2 ... طبعا رائع وبالمناسبة حايلا جوه البلد بيتراوح مابين 10-12 وأعتقد ان بعد صيانة ال1000 وقدام شوية لما الماتور يلين هيتحسن

9- الوكيل: ليه عندى ملاحظتين
الأولى انى بعد مارجعت من سفر العين السخنة بعت إيميل بسألهم فيه على ضغط العجل المناسب وعلى اشاعة المقصات الضعيفة وفوجئت باتصال من عندهم واحد صوته كبير وبيعرفنى بنفسه بأنه مدير الصيانة بالشركة وأولا قالى على المقصات ماتسمعش الاشاعات انت راكب عربية محترمة مش توك توك وثانيا بالنسبة لضغط العجل قالى يكون على 32 ولما سألته على الحدفه قالى ظبطه على 32 وبعدين اختار طريق معدول ونظيف وخلى السرعة على 60 وعد من 1-10 وبدون فرامل وقيس الحدفة تانى
وبرضه من نفسه كده قالى معلش هتلاقى العفشة ناشفة شوية ولكن بعد ال 5000 هتفرق معاك كتير وهتلين ولما سألته عن استعمال النيتروجين فى العجل قال لى استنى عليه لغاية 2000 او 3000 علشان تحس بتأثيره بس طبعا هو أحسن
برضه قالى استعمل التكييف لو تحب بس أنا من نفسى كده برضه قررت ما استعملوش إلا بعد الألف وخصوصا الجو لسه مش محتاج.

الملاحظة التانية على الوكيل: ان أى مرة بعد كده بحاول أتصل بيهم وأطلب حد من الصيانة أسأله على حاجة بطلطع على التليفون لغاية ما يفصل أو يتقالى معلش ماحدش فاضى .... طبعا قلة زوق متزوقة وهشوف بقى اللى هيحصل فى صيانة ال 1000

وللحديث بقية