ارجو الافادة من خبراء الكيا برايد ؟؟؟؟؟؟؟؟؟؟؟؟
 

بسم الله الرحمن الرحيم
الى جميع السادة خبراء الكيا برايد برجاء الافادة من سيادتكم عن :-
متوسط اسعار قطع غيار كيا برايد سيدان
يعنى مثلا سعر (داينمو/ مارش / فانوس امامي / فانوس خلفى / ............... الخ ) .
هل العربية كويسة و عملية ولا لاا ؟
علشان انا معروض عليا واحد موديل 1998 كاملة و بيتكلم فى 27000 ( اية رائيكم )؟
و هل السيدان افضل ام الهاتش باك ؟

رد: ارجو الافادة من خبراء الكيا برايد ؟؟؟؟؟؟؟؟؟؟؟؟
 

24516008 - 0123916567

ديه ارقام تليفون الجندى وده اشهر وافضل موزعين قطع غيار كيا فى القاهرة حضرتك ممكن تكلمة وتسأله عن تفاصيل الاسعار كلها

لكن عامة البرايد قطع غيارها رخيصة جداً ومتوفره فى كل مكان وفيه بدائل كورى ويابانى وصينى واستيراد

الفوانيس مثلاً هتلاقى فانوس اصلى فى حدود 200 جنيه وهتلاقى الصينى كامل بلمباته ب 70 - 80 جنيه وساعات ارخص فعامة قطع الغيار رخيصة

بالنسبة للتفضيل بينها وبين الهاتش باك فديه عربية 1300 سىسى وبشنطه واسعة الهاتش باك 1100 سىسى ومش فيها شنطة وده فرق جوهرى كبير بين الاتنين غير كده العربية هى هى كعفشة وصالون وكل حاجة
بس كان شائع فى الاول ان الهاتش باك احسن علشان الهاتش باك كانت كورى والسيدان كانت تقفيل مصرى وكان فيه عيوب تقفيل
بس الكلام ده لما كان الاتنين زيرو دلوقتى احنا بنتكلم فى مستعمل والفرق الاساسى هو الحالة

رد: ارجو الافادة من خبراء الكيا برايد ؟؟؟؟؟؟؟؟؟؟؟؟
 

نسيت اقولك ان مو 98 ديه يعنى كورى صناعة وتقفيل وبالتالى فهى زيها زى الهاتش باك ان مكانتش افضل لفرق الشنطة والموتور الاكبر
والسعر كويس بس المهم الحالة لازم تكشف عليها كويس سمكرة وميكانيكا

رد: ارجو الافادة من خبراء الكيا برايد ؟؟؟؟؟؟؟؟؟؟؟؟
 

العربية ممتازة انا لسه شارى واحدة مستعملة من شهر 12 اللى فات وهى تعبتنى فى اول شهرين بسبب الميكانيكى اللى معايا ماكنش بيفهم فكان مبهدلنى بس لما روحت لواحد تانى بيفهم ظبطلى العربية وبقيت مرتاح معاها جدا موفرة فى البنزين بفولها مرة فى الاسبوع وبتفضل معايا لغاية اخر الاسبوع بروح بيها شغلى ومشاويرى صاحب العربية اللى قبلى كان ممشيها على 80 يعنى انت لو عايز تمشيها على 80 مش حاتقول لأ بس حاتفرق معاك فى السحب ، أنا نزيه شوية ومشيها على 92 وحاسس بفرق ملحوظ والفرق هو بريزة بين ال 90 وال 92 يعنى لو التانك فاضى وفولته 92 مش حايفرق عن ال 90 إلا ب 3 جنيه بس حاتحس بفرق فى السحب ، العربية ثابتة على الارض لو ماشى طوالى لو حاتاخد ملف لازم تهدى شوية ما تحاولش تاخده بسرعة حتلاقيها بتميل شوية يعنى أنا فى نفق الازهر لو اخدت ملفاته على 70 لغاية 80 شغال مفيش مشاكل انما المشاكل والميل يظهر لو اخدته على 90 فما فوق وبرضو لو بتاخد يوترن لازم تبطء قوى زيادة عن سرعة عربيات غيرى ، العربية عالية عن الارض وعمرها ما بتحك فى مطب مهما كان حتى لو العربية مليانة أنا ساعات بيركب فى العربية 6 غيرى يعنى كلنا بنبقى 7 فى العربية وبمشى بيها فى مدينة الشروق وما ادراك ما الشروق ومطباتها وعمرى ما بحك فى مطب ، بس مشكلتها انك لو عديت على زلطة أو ارض مكسورة حتحس بيه فى العربية ولو اخدته بسرعة حتلاقى راسك لزقت فى السقف علطول !! كمان العربية عندى اخرها 120 مابتجيبش أكتر من كده مش عارف ده عيب عندى ولا فى كل البرايد .

ويارب اكون افدتك وأنا حاولت فى كل حاجة اقولهالك اضربلك مثل من اللى بقايله علشان اقربلك الصورة وما تنساش انك تستخير ربنا علشان يباركلك فيها

رد: ارجو الافادة من خبراء الكيا برايد ؟؟؟؟؟؟؟؟؟؟؟؟
 

مبروك عليك العروسة (البرايد) ياباشا وربنا يحفظهالك يارب

كل اللى قولته تمام بش مقولتش اللى معاك سيدان ولا هاتش باك

بالنسبة للاداء فى الملفات فممكن تحسن ادائها لحد 120 لو غيرت المساعدين باليبابانى بتاعها وعرضت الكاوتش وقللت ارتفاعة بس طبعاً ده هينشف العفشة اكتر

بالنسبة للسرعة القصوى انا بجيب بالبرايد الهاتش باك 140 بس تحرق على الغيارات لحد الرابع ما يعدى المية - 120 ولما المؤشر بتاع ال RPM يعدى الاربعة ويقرب على الخامسة جيب الخامس لان الخامس سحبه ضعيف جداً جداً ومش هيجيب معاك سرعات

بالنسبة للسيدان جبت بيها ل 160 وكسور بس بالانجكشن لو كربراتير ممكن تكون محتاجة تتنظف او تغير بوجيهات

رد: ارجو الافادة من خبراء الكيا برايد ؟؟؟؟؟؟؟؟؟؟؟؟
 

الله يبارك فيك يا أبو نورا ويحفظك

جبت الهاتش باك موديل 96 وشكلك كده نسيتنى من سؤالك .

أنا كاتب موضوع باسم مساعدة مبتدئ فى كيا برايد وأنا كمان اللى راسلتك بخصوص مركز الصيانة وانت دلتنى على المهندس مرسى والاتنين الميكانيكية اللى فى الحرفيين بس أنا مقدر مشاغلك وكتر الاعضاء انت حاتفتكر مين ولا مين .

أنا ناوى فعلا اعمل كده بإذن الله لأن العربية اصيلة وتستاهل العناية والاهتمام بس مش دلوقتى اصلى باظبط كل شهر حاجة فى العربية وتغيير البطارية ليه اولوية كبيرة عندى دلوقتى وكمان الميزانية برضو حاكمانى .

بالنسبة لتعريض الكاوتش هل يكون بانى اجيب جنط اكبر يعنى بدل ما هو 13 اخليه 14 ولا بيبقى فى ال 13 كذا عرض فاجيب أنا حاجة اعرض من اللى معايا دلوقتى ؟


والله يا أبو نورا أنا عملت العجب علشان العربية تجيب أكتر من 120 وهى حالفة ما تزيد عن كده ودى مش مشكلة سحب لأنى مشيت بيها حوالى 5 كيلو أو اكتر وأنا فاعص دواسة البنزين وهى برضو مصممة على ال 120 يعنى لو كان سحبها سلحفة كان زمانها جابت اخرها على المسافة دى ، بالنسبة لتأخير النقل فده الطبيعى بتاعى من أول النقلة التالتة إلى بافضل عليها لغاية 60 والرابع باستنى عليه لغاية 90 أو 100 وبعدين اجيب الخامس ، وأنا ماعنديش rpm فكلامك عن الجزئية دى مش عندى وأنا باعتمد على صوت الموتور فى النقلات .

أنا بيتهيألى والله أعلم ان عامل الزمن والاستهلاك مؤثر يعنى العربية عاملة 170000 وداخلة على ال 180000 كتر خيرها بصراحة على كده .

رد: ارجو الافادة من خبراء الكيا برايد ؟؟؟؟؟؟؟؟؟؟؟؟