|
ما هي العيوب و المشاكل الناتجة عن اقتناء سيارة ؟
جميل أن يكون لديك سيارة .. ولكن ماهي أعباء أن تقتني سيارة هذا الموضوع قد يكون مهم جدا لمن ليس لديه سيارة و سيدخل للمنتدي لفاجأ بهذا الموضوع هل الموضوع كله ( بنزين و تغيير زيت و بس ) ولا ( ركنة في مكان الشغل .. وخبطات و حكات ) يا ريت نشارك ونقول لو كانت العربية مستعملة أو زيرو و الزيرو أفضل طبعا لو حد عنده تجربة شخصية يا ريت يفيدنا ازاي اتغلب علي بعض أعباء السيارة و الأن السؤال بوضوح أكثر . . ما هي أعباء اقتناء سيارة بوجه عام ( مستعملة أو زيرو ) ؟ |
رد: ما هي العيوب و المشاكل الناتجة عن اقتناء سيارة ؟
مبروك يامامو باشا
هو انت تقصد اعباء ماليه ولا صحيه؟ عموما خد عندك انا باكره ارجع متاخر بالليل لانى مابلاقيش مكان اركن ومافيش جراج هايدخلك تركن ولوركنت فى جراج هاتتحك هاتتحك فبره زى جوه دلوقتى طول عمرى كنت باحلم باليوم اللى هاسوق فيه عربيه ولما سقت كرهت شارع شبرا وجسر السويس والقاهره كلها والجيزه طبعا الزيرو افضل عشان التكلفه لو انت فقير اشترى زيرو وريح جيبك بس قلقك عالعربيه وهى زيرو يسببلك امراض زى الضغط والاكتئاب وحتى الجدرى الحمد لله انا باقضى حوالى شهر بره القاهره فى الصحراء واعصابى بتبقى زى الفل وبيجيلى حصبه لما بانزل اجازه القاهره اسبوع مره تانيه الف مبروك يامامو باشا |
رد: ما هي العيوب و المشاكل الناتجة عن اقتناء سيارة ؟
الله يبارك فيك و الف سلامة عليك من كل الأمراض دي
بس معرفتش تتلغب علي أي حاجة فيها ؟ |
رد: ما هي العيوب و المشاكل الناتجة عن اقتناء سيارة ؟
الاعباء الماليه معروفة طبعا
لكن المشكله فى الاعباء النفسية والعصبية ( لاحظ انى ما قلتش الاعباء الصحية - لان السواقة فى مصر حاجه تجنن ) وهى تشمل طبعا الركنات و استغلال ساسه الجراجات والارصفة العمومية وتلاقى واحد طلعلك من تحت الارض بعد ماتكون ركنت يقولك حمداله ع السلامه ياباشا ويقفلك المرايا او تتخانق مع الجيران عشان احقيه الركنه تحت العمارة او تلاقى واحد راكن صف تانى وقافل عليك وتستناه ساعتين لغايه ما يجيلك او تتعلم الشتيمه بلسانك او ايدك او حتى بالكلاكس ( زمان لما كنت باركب مواصلات كان على طول معايا المصحف وفى ايدى سبحه صغيرة وماشى بذكر ربنا ) دلوقتى مضايق جدا لانى ساعات بافقد اعصابى واضطر اشتم طبعا ده غير الام الرقبه والمفاصل والعمود الفقرى وخشونة الركبه نتيجه الانتظار لساعات فى اشارات المرور او ماشى مسافه 2- 3 كيلو فى عز الزحمة ورجلك ع الدبرياج نفسك تنقل عالغيار التانى . |
رد: ما هي العيوب و المشاكل الناتجة عن اقتناء سيارة ؟
هههههههههههههه والله يابندارى كانك بتوصف حالتى بالضبط
انا بطلت اركن فى جراجات اساسا لانه لازم يقولك سيبلنا المفتاح ولما كان معايا اللانوس عمرى ماركنت فى جراج الا والاقى تانى يوم عربيه موقعه على عربيتى ومره شكيت قمت صفرت العداد جيت لقيت العربيه عامله 33 كيلو تخيل وبعدين تعلم الشتيمه ده لازم زى مابتاخد كورس المانى تاخد كورس شتيمه عشان تتعامل مع اللى يستاهل ربنا يبارك فيك انت عضو محترم |
رد: ما هي العيوب و المشاكل الناتجة عن اقتناء سيارة ؟
سؤال جميل جدا
1- اعباء مالية متمثلة فى البنزين و الزيت و الصيانة و الكاوتش و البطارية 2- اعباء نفسية متمثلة فى الضغط النفسى و العصبى من القيادة , الله يكون فى عون الجميع 3- اعباء سياسية , مديرى الخواجة لما بيركب جنبى ساعات و يتكلم عن السواقة فى بلدهم و النظام و الامان ,بيصيبنى بالاحباطو ببقى عاوز انط فى كرشه و ابوظ العلاقة بين البلدين |
رد: ما هي العيوب و المشاكل الناتجة عن اقتناء سيارة ؟
اقتباس:
تخيل بقى نظرات الازبهلال ( الصفه من فعل مزبهل )وهمه معايا فى العربيه (طبعا بيكون معايا سواق الشركة ) كانهم بيتفرجوا على السيرك الروسى واكتر موقف خلانى فى نص هدومى لما واحد امريكانى سالنى واحنا فى صلاح سالم ايه المبانى الصغيرة دى على يمين وشمال الطريق ؟ جاوبته دى مدافن - الراجل كان هـيعملها على نفسه من كتر الضحك ptmnlo123per122 |
| الساعة الآن 11:59 AM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017