|
رينو سيمبول ..ولا .. كيا ريو !!؟؟
يا جماعة حد هنا اشترى او يعرف حد اشترى السيمبول ... انا العربية دى عاجبانى جدا جدا بس فى ناس بصراحة خوفتنى من التوكيل انه مش أد كدة وكمان قطع الغيار غالية نسبيا ( ودة متوقع أكيد ) ولو انه مش فارق معايا اوى قد موضوع التوكيل دة
انا محتار بصراحة بين الكيا ريو وبين الرينو سيمبول ومحتاج اخد قرار بسرعة ... ياريت لو حد يقدر يساعدنى و ينشلنى من الحيرة اللى انا بقيت فيها دى هما العربيتين عاجبنى جدا بس انا عايز افكر كباكدج بقى انهى واحدة فيهم اللى تكسب كمتنانة وعمر وتوكيل وقطع غيار وكدة |
رد: رينو سيمبول ..ولا .. كيا ريو !!؟؟
يا جماعة ساعدونى بجد عشان انا عايز الحق احجز بسرعة ... انا رحت النهاردة تانى وشوفت السيمبول وهى عاجبانى جدا جدا كعربية وهمية فعلا .... بس انا عايز اعرف التوكيل الواحد سمع عنه انه مش أد كدة وعايز اى حد مجرب التعامل مع التوكيل يقولى رأيه
وانا كمان عرفت ان قطع غيارها مش غالية اوى اوى زى ما كنت فاكر ... يعنى الفانوس الامامى ب 700 واللى انا اعرفه ان الريو والنيو اكسنت تقريبا ب 600 مش رخيص زى ما الناس فاكرة عشان كورى محتاج نصيحة بسرعة من أصحاب الرينو .. اية رأيكم فى الرينو عموما وفى التوكيل |
رد: رينو سيمبول ..ولا .. كيا ريو !!؟؟
وعايز كمان حد يفهمنى لية الرينو بالذات اسعارها بتنزل اوى لو فكرت ابيعها بعد كام سنة ؟؟.... وكمان تقيلة اوى فى البيع عن اى عربية تانية .... ولا انا بيتهيألى ؟؟
|
رد: رينو سيمبول ..ولا .. كيا ريو !!؟؟
اقتباس:
السيمبول هى الكليو 1400 يعنى عربيه مش معقده ولا فيها سحر(متخليش حد يوهمك) التوكيل معاملته كويسه مع نسبه كبيره جدا من اللى اتعاملوا معاه احب الفت نظرك لحاجه السيمبول تجميع تركى(كل قطع الغيار اللى بتشتريها من التوكيل فرنسيه الصنع مش تركى اكيد فيه فرق لما تجيب قطعه الغيار فرنساوى عن انك تجيب الاصلى كورى) ده رأى الشخصى وانتظر برضه لو حد من الاخوه عنده وجهه نظر تانيه وربنا يوفقك |
رد: رينو سيمبول ..ولا .. كيا ريو !!؟؟
متشكر جدا على اهتمامك يا بوب
انا عارف من الاول انها تجميع تركى وماعنديش مشكلة فى دة خالص لانى عرفت ان الميجان تقريبا هى كمان تجميع تركى ... وعرفت ان قطع الغيار مش غالية اوى زى ما كنت فاكر واكيد طبعا زى ما انت بتقول هتبقى قطع غيارها الفرنساوى معمرة عن قطع غيار الكورى بكتير انا بس كان سؤالى هل الرينو كماركة فيها مشاكل بعد كدة ؟؟ يعنى مشهورة بحاجة من زمان فى العفشة او الموتور او التكييف او كدة ؟؟؟ وليه معروف عن الرينو انها فى اعادة البيع بعد كام سنة بتنزل جامد عن سعرها ؟؟؟ انا السيمبول عاجبانى جدا وداخلة دماغى وحاسس فعلا بالفرق بينها وبين الريو والاكسنت والحاجت اللى فى نفس الفئة السعرية ... بس عايز حد يطمنى من ناحيتها عشان اتوكل على الله واحجز ... عشان فعلا زى ما انت قولت ان الشعب المصرى كل واحد بيطلع بكلمة وهو مش عارف .. يعنى العربية الواحدة بتسمع عنها انها زى الفل وتسمع من حد تانى انها زى الزفت ... حاجة تحيرptmnlo123per16 |
رد: رينو سيمبول ..ولا .. كيا ريو !!؟؟
اقتباس:
لكن السيمبول دى تعديل الكليو ال1400(كشكل لكن نفس الموتور والعفشه) الكليو ال1400 كان عيبها الوحيد ان طلبمه البنزين مش قويه (هو ميعتبرش عيب قوى) لو فضلت تخلص البنزين اللى فى التانيك كتير الطلمبه بتضعف وتضطر تغير اما موتور الطلمبه او الطلمبه كلها وكل ملاك الكليو عارفين الموضوع ده وبيتحل بحاجه بسيطه جدا انك متخليش التانك ينزل عن الربع(ناس كتير معاهم عربيات غير الكليو وبيعملوا كده برضه حفاظا على الطلمبه وعلى ان العربيه متسحبش الشوائب من التانك ومعتقدش ان دى حاجه صعبه)ومتقلقش خلص البنزين مره واتنين وتلاته وتلاتين ومش هيحصل اى حاجه انما عشان تعمر معاك جامد ومتحتاجش تغيرها يبقى زى ما بقولك متخليش التانك يفضى بس كده يا باشا هو ده العيب الوحيد المعروف ولازم اقولهولك بمنتهى الامانه عشان تكون على نور وموضوع ان الرينو تقيله فى بيعها وبتخسر ده طبيعى لان الشعب المصرى عنده اقتناع شديد جدا ان الرينو والسيتروين قطع غيارهم غاليه ومش موجوده وانها عربيات سحر عشان كده الناس بتقلق منها مستعمله ومحدش بيجيبها غير اللى فاهم فى العربيات كويس او غاويها ارجو انى اكون قدرت ارد على اسئله حضرتك وربنا يوفقك للخير بأذن الله |
رد: رينو سيمبول ..ولا .. كيا ريو !!؟؟
جزاك الله كل خير يا بوب ... انا خلاص شكلى هنوى واحجز السيمبول ان شاء الله لانى حاسس ان الرينو الناس هتبدأ تغير نظرتها ليها بعد اللوجان والسيمبول ما ينتشروا
اخر سؤال بقى ... اية رأيك اجيبها مانيوال ولا اوتوماتيك ؟؟؟ ... انا مش من النوع اللى بيسافر وبيحب يجرى وكدة وطبعا اغلبية مشيى جوة البلد فى الزحمة وطبعا الاوتوماتيك مريح جدا .. بس اية عيوبه الجوهرية ؟ |
| الساعة الآن 10:59 AM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017