العربية بتبطل وبتطلع دخان اسود
 

الإخوة الكرام اواجه مشكلتين فى عربيتى الكيا برايد

المشكلة الأولى ظهرت من ثلاث اسابيع وتتمثل فى ان العربية أول ما اطلع بيها الصبح ألاقيها بتبطل مرتين أو ثلاثة كل ما اجى اقف أو اهدى العربية ، وبعد كده العربية بتمشى تمام مفيش أى مشاكل ولا بتبطل بعد كده ، قلت يمكن الموضوع خاص بالتسخين فبقيت بطول فى العملية لمدة 5 دقايق بقت تبطل منى مرة أو مرتين بالكتير .

المشكلة التانية هى انى لما باجى اسخن وادوس على البنزين ابص الاقى الشكمان بيطلع دخان اسود .

شكيت فى الأول فى البنزين علشان كنت ماشى على 80 فغيرت ل 90 وغيرت فلتر البنزين كمان وروحت للميكانيكى فبصينا على التانك من الحتة اللى عند العوامة لقينا التانك نضيف من جوة ومفيش فيه اى شوائب ، بعد كده قالى الميكانيكى انه شاكك فى التاكيهات فراح باصص عليها وجاب حاجة زى المسطرة كده وبقى بيجرب بيها المهم لقى ان الصبابات بتاعة البنزين مسدودة فراح مهويها شوية وقالى كدة الموضوع حايتظبط بس برضو لسه العربية بتطلع دخان اسود بس اخف من الأول وأنا بصراحة مش مقتنع ان اللى عمله مظبوط

فيا ترى مشكلة الدخان دى مشكلة فى الموتور ولا مشكلة فى الشكمان ؟

وحكاية التبطيل دى مزعجة جدا دى بتيجى منين ؟

رد: العربية بتبطل وبتطلع دخان اسود
 

رد: العربية بتبطل وبتطلع دخان اسود
 

هو فعلا الميكانيكى كان شاكك فى الحاجات دى وكان من ضمن اللى عملناه اننا غيرنا البوجيهات لانها باظت فى اقل من شهر بس واضح انه مش عارف يحل المسألة بشكل صحيح علشان كده ياريتك يا أبو نورا لو تدلنى على حد بيفهم كويس فى الكيا وحافظها عن ظهر قلب ويكون عنده ذمة علشان ما يستغلش برضو انى لسه جديد فى المواضيع دى وياريت يكون عارفك علشان اقوله انى من طرفك

رد: العربية بتبطل وبتطلع دخان اسود
 

هو في الاول يبص علي الكربراتير يشوف الهوا بتاعه مظبوط ولا لأ
يشوف البيكات بتاعته لو مكانش
يبقي يبص علي منظومة الحرق يشوف البوجيهات
لو مكانش يبص علي التاكيهات
لو مكانش يشوف علبة البيئة
صح يا ابو نورا ولا انا كلامي غلط

رد: العربية بتبطل وبتطلع دخان اسود
 

معلش أنا جديد ففيه حاجات حاستفسر عليها

لو الكربراتير ده اللى تحت العمة يبقى اه هو شافه وقعد شوية يظبط فيه
اما البيكات دى ماعرفهاش لا هيا ولا البينة
والبوجيهات زى ما قلت هو لقاها بايظة وغيرها
والتاكيهات فعلا كانت اخر حاجة بص عليها وعمل اللى أنا قلت عليه
بس واضح ان لسه فيه حاجة فايتة منه علشان هو حدد المشكلة بس مش عارف يحلها

رد: العربية بتبطل وبتطلع دخان اسود
 

بص يا سيدي
معني ان السيارة تخرج دخان اسود
ده ان النزين ما اتحرقش كله
الكربراتير ده هو اللي تحت العمة
والبياكات ده جو الكربراتير
وظيفة الكربراتير هو
يدخل البنزين إلي المنفول (المؤدي إلي وش السلندر ) ثم إلي البستم
ومسمار الهواء اللي في الكربراتير هو اللي بيظبط دخول الهواء إلي المنفول ثم إلي وش السلندر ثم إلي البستم
وداخل البستم يختلط الهواء مع البنزين عن طريق صباب في وش السلندر يدخل البنزين واخر يدخل الهواء
إلي البستم
فتدخل كهرباء من البوبينة إلي الاسبراتير( وظيفة الاسبراتير توزيع الكهرباء علي البساتم كل حسب وقت حاجته) ليتم الحرق ويأتي صباب للعادم يخرج العادم من البستم إلي الجكمان )
فإن كان العادم لم يحرق بشكل جيد (لم يكتمل احتراقه) يخرج العادم باللون الاسود
ولو جينا للكربراتير
وظيفته
يأخذ البنزين من التنك تسحبه الطلمبه (طلبمة البنزين) تدفعه للكربراتير في حوض الكربراتير عن طريق الاكسراتير الذي تدوس عليه 0بدواس البنزين فيضخ البنزين في الكربراتير وعن طريق البيكات ثم يدخل إلي المنفول
والمنفول هو ماسور تحت الكربراتير منه إلي الموتور يخرج واحد من الكربراتير يدخل فيالموتور 4
فأولا يشوف الكربراتير بتاع كربراتيرات
يظبط الهواء
وينضف الكربراتير ويشوف العوامه بتاعت الكربراتير ديه وظيفتها ماتخليش الكربراتير يتملي بنزين للاخر
زي بتاعة سيفون الحمام
لو ما اتظبطش
يبقي تشوف الكهرباء اللي داخلة علي البستم عن طريق بوبينة اسبراتير (ممكن يكون مأخر) أو بوجيهات واخدة رطوبه أو سلك مهرب
وبعد كده لو منفعش
يبقي تظبط تاكيهات عن بتاع تاكيهات
عشان يظبط دخول البنزين والهواء وخروج العادم
بعد كده علبة البيئة ده في الشكمان بس ديه مستبعده جدا
وربنا يوفقك

رد: العربية بتبطل وبتطلع دخان اسود
 

ربنا يبارك فيك على الشرح الوافى اللى استفدت منه فعلا وحايساعدنى كتير فى تصليحها ، كده أنا فى انتظار رد أبو نورا علشان يقولى على حد كويس شغال فى الكيا اروحله .

وجزاكم الله خيرا