|
بيجو 505 اوتوماتيك
كنت عاوز اعرف رأي رجالة البيجو في العربيه دي :
505 موديل 84 تكييف وباور وسنتر وزجاج كهربا قدام و جير اوتوماتيك (حالته كويسه جدا مش تعبان ) وغالبا كله بتاع بلده. دواخل وحوض وشنطه فابريكه , وفرش الفابريكه , والموتور نفس رقم الشاسيه , وفيها انذار وسارينه . فرش جلد طبيعي , وكاسيت مرسيدس , و4 كوتش جديد تيوبليس , وعبشه وسست جديده بالكامل , بطاريه جديده وسرفو فرامل جديد. وركبتها العربيه جابت معايا 150 , والموتور ناعم جدا . ياريت يا جماعه تقولولي العربيه دي تسوى كام بالظبط عشان اخلص فيها ان شاء الله. ولكم جزيل الشكر. |
رد: بيجو 505 اوتوماتيك
الموتور طياره ولا عادي
ومعليش اتاكد من العربيه دي عند سمكري كوييس لانها ممكن تكون نصيين ولو سليمه ممكن لغايه 40 اكتر من كده حرام ولو مش ناوي تركبها كتير يبقي لغايه 38 |
رد: بيجو 505 اوتوماتيك
لأ الموتور عادي .
لكن العربيه سليمه 100% والدواخل فابريكه ومش منصصه ولا حاجه ولا حتى فيها ربع . انا وريتها لأتنين سمكريه ورفعتها في مغسله. ده غير انها ان شاء الله هتخلص على 35 |
رد: بيجو 505 اوتوماتيك
في ظل السوق الحالي و انهيار الاسعار فالتمن دا عالي حاجات بسيطه
بس لو ناوي تركب و العربيه عاجباك هاتها العربيه دي كانت معايا بس المانيوال و كانت من احلي عربيات ركبتها في حياتي حتركب عربيه نفس ركوب المرسيدس و قطع غيارها تمنها معقول و اعتماديتها عاليه و شكلها كويس بس العربيه لو متهانه مستحيل ترجع لحالتها كنا شاريينها سنه 98 ب 31 الف جنيه موديل 80 و بعناها سنه 2002 ب 24 الف جنيه و كانت بحالتها برضه !!!! لكن سنه 2002 كانت العربيات كلها نزلت و تمنها بقي في الارض فنصيحه لو حتجيبها و حالتها نضيفه نزل من تمنها الف ولااتنين و برضه لما تبيع مش حتجيب الفلوس دي كلها بس طالما نضيفه و عجباك استخير ربنا و هاتها لو انت غاويها |
رد: بيجو 505 اوتوماتيك
هي بصراحه العربيه عاجباني اوي يا استذ حازم , خصوصا اني حاسس انها حاله شاذه , لأنها بصراحه نضيفه جدا (وزي ما حضرتك بتقول نفس ركوبة المرسيدس )
والعربيه متهانتش ولا حاجه لأن صاحبها كان مهتم بيها جدا وجايب لها كل حاجتها فرنساوي مش صيني حتى الطاصات. وهحاول ان شاء الله انزل من السعر زي ما حضرتك بتقول . وشكرا لحضرتك وللأستاذ محمود على الأهتمام. |
رد: بيجو 505 اوتوماتيك
أي عربيه بيجو بحالتها تساوي تقلها دهب (:
السنه اللي فاتت أشتريت البيجو 505 مو 86 خليجي كان صاحبها في الخليج وأشتراها وغيرلها الكاسيت بواحد بايونيير ياباني وعملها صندوق سماعات بعرض شنطة العربيه مغلف بالقطيفه اللي نفسها غير تنجيد العربيه كلها بيه ... ونزلها مصر ورخصها مرور قنا ( بلدي ) بنمر 508 ملاكي قنا ptmnlo123per122 المهم كام شهر الراجل حطها في جراج بيته ورجع الخليج وبعد كام سنه أتوفى واتركنت العربيه في الجراج علشان أولاده كانوا أطفال .. فأشتراها منهم واحد صاحبه كان معاه في الخليج ونقلها من جراج الراجل لجراجه .. وقعدت على الحال ده لغاية لاسنه الفاتت لما أشترتها منه ... طبعا مش عاوز أقولكم أني أصدمت لما لقيت عربيه 505 بحالة المصنع .. حتى مسمار أو فانوس متغيرش فيها ... حتى فرد الكاوتش بتاعة المصنع ... حتى مكن الزجاج بتاعها ... السنتر بتاعها ... حتى فريون التكييف بتاع المصنع ... لدرجة أني لقيت في درج التابلوه كتالوجات العربيه الأصليه وكتاب أعمال الفحص والصيانه في الخليج بتاعة سنة 86 غني عن القول ان العربيه أنعم من المرسيدس .. اتجيب ال 150 في الصحراوي بمنتهى السهوله ...لحراره من رابع المستحيلات انها تعلى ... عزل صوتي خرافه ..تكييف كأني قاعد في ديب فريزر في حر قنا ... كأني في دنيا تاني ... بس أضطريت أغير حاجتين فيها .. البطاريه لأنها باظت ...وبيطاش القطب الموجب لأنه (ملح) .. ومش عاوز أقولكم أن الكهربائي أستلف مقص أسياخ الحديد من واحد صاحبه علشان يقطع الكابل من البيطاش ptmnlo123per1116ptmnlo123 per1116 االظريف أنه معروض عليا أبيعها من كذا واحد وأنا رافض تماما مجرد التفكير في بيعها ..لدرجة أن مقدم في الجيش في الغردقه عرض عليا الشهر اللي فات 105 ألف جنيه وأنا رفضت .. فكركم مجنون ؟؟ يمكن .. بس أبقى مجنون فعلا لو فرطت فيها .. البيجو ده أدمان بالنسبه لي .. وسببت أدمان لمعظم الشعب المصري |
رد: بيجو 505 اوتوماتيك
البيجو 505 من اجمل العربيات الى هتركبها فى حياتك ولو حالتها نضيفة توكل ع الله هى عموما اسعار الصاج بتاعها رخيصة الاربع ابوب بالفرش بتاعهم ب 800 جنية لكن حاجة العفشة واملكنة دول مولعين نار ونادر لما تلاقيلهم حاجة نضيفة انا اتبهدلت كتير فى الموضوع دة
|
| الساعة الآن 07:16 AM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017