|
سؤال عن الإبيزا 94 من فضلكم
أول مشاركه فى المنتدى بعد المجهود الكبير اللى لمسته من الباشمهندس محمد إبيزا ياريت لو سمحت أعرف بس لو أمكن أسعار الإكصدام الأمامى والخلفى لو إستيراد ولو جديد وكمان عاوزه أركب تكييف للعربيه لأنها بدون ، وعندى كمان الفانوس الخلفى شمال مكسور ونفسى أغيره ، ياترى يعمل كام يا أستاذ محمد معلش أنا بتقل على حضرتك لكن ملناش غيرك متخصص نسأله فى المسائل دى عربيتى إبيزا 94 موتور 1300 أه نسيت أسألك ينفع يركب لها إكصدام خلفى بتاع البولو 95 ؟؟ أنا آسفه على الإطاله وشكرا مقدما أستاذ محمد إبيزا |
رد: سؤال عن الإبيزا 94 من فضلكم
الف شكر علي كلامك يا منه
الجوز ادام و ورا استيراد بتوع ال 99 ب 550 جنيه بتوع ال94 هيبقوا اقل شوية و جداد مش هيقلوا عن 300-350 بس مش اصلي بيبقي تايواني و الفيبر بتاعه مش حلو بلاش تكييف علي ال1300 لو اللي بيركبها بيجري لو مشي عادي بيتكلف حوالي 2500 جنيه و يركب عادي هتلاقيه مستعمل في الوكاله و الحرفيين هيعملوا بتاع 50-70 جنيه بالكتير معتقدش يركب لان الابيزا اعرض من البولو شوية و حتي لو نفس العرض و يركب يستحسن تجيبي حاجتها |
رد: سؤال عن الإبيزا 94 من فضلكم
يارافع راسنا على طول ... وحشتنا مشاركاتك ومواضيعك ياباشا
|
رد: سؤال عن الإبيزا 94 من فضلكم
المهندس محمد إبيزا
أشكرك كثيرا من القلب على اهتمامك بالرد على استفساراتى ، وأعتذر عن تأخرى فى شكرك نظرا لسفرى خارج مصر فى الفتره الماضيه . نرجع لموضوع التكييف ، أنا شايفه إن حضرتك لا تؤيد تركيب التكييف ، هل لضعف الموتور ؟؟ على فكره أنا يدوب مسقطه الموتور دا من 5 شهور بس وحالته ممتازه ، قالولى إن الشكمان لما يجيب ميه تبقى حالة الموتور تمام .. تفتكر ؟؟ كنت عاوزه أستفسر منك على موضوع سير الكاتينه ، يتغير كل أد إيه ؟؟ بليييز يابشمهندس متزهقشى من تساؤلاتى .. وأنتظر ردك |
رد: سؤال عن الإبيزا 94 من فضلكم
اقتباس:
انا مش بأيد تركيب التكييف لهواة الجري و التجميع السريع لانه بيبقي محمل علي الموتور مش اكتر و برضه مش بأيد تركيف تكييف علي موتور شقيان يعني مثلا انا عربيتي موتوري ماشي فوق 400 الف كيلو ده موتور بيشقي مبيبطلش شغال علي طول ممكن تعد اليوم كله شغاله مينفعش اركب عليه تكييف كده ابقي بقصف اللي باقي من عمره بصورة اسرع انما لو موتورك كويس ركبي تكييف عادي بس يكون بتاعها يا اما تركبيه في التوكيل و ده هيتكلف اكتر من العادي بس هيبقي مضمون يا اما تجيبي تكييفها الاصلي من الحرفيين او الوكاله عشان لو مش بتاعها الموتور هيضيع و يتركب و يتظبط كويس عشان ميأثرش علي سحب العربية اوي الموتور لما بيعرق ميه من الشكمان في الدواره الصبح بالذات بتبقي حالته ممتازة فعلا بيبقي لسه بيقول يا هادي حضرتك مسقطه موتور ايه ؟؟ 1300 برضه بس بحالة نضيفه ولا موتور اعلي سير الكاتينه بيتغير المفروض كل 40 الف بس انا بغيره علي 35 الف كيلو و مفيش زهق ولا حاجة و انا مش بشمهندس علي فكره ptmnlo123per122 |
رد: سؤال عن الإبيزا 94 من فضلكم
ميرسى يا استاذ محمد على ذوق حضرتك وسعة صدرك .. بجد حضرتك رحمتنى جامد من غباء وجهل الميكانيكى بتاعى .. تخيل بيقول إن سير الكاتينه لازم يتغير كل 10 آلاف كيلو !! أنا فهمت قصدك كدا من موضوع التكييف وبناءا على كلامك أنا صرفت نظر عنه خلاص بالرغم إن حالة الموتور ممتازه بدليل إنه بيجيب ميه كتير من الشكمان الصبح وأنا بسخن ، وحضرتك أكدت على كلامى .. الموتور اللى سقطته 1300 زى اللى كان فيها بالظبط ، اشتريته من بورسعيد من عند واحد هناك مشهور بيبيع كل حاجة الإبيزا والجولف إسمه رجب ، بس من فتره كدا بدأت أحس إن الميه اللى بتنزل من الشكمان لونها إسود !! تفتكر حضرتك دا عيب من الشكمان نفسه ولا من تظبيط الحرق وكهربة الموتور !!؟؟؟؟ وكمان بشم ريحة العادم .. على فكره كنت قريت فى أحد ردودك على أحد العضاء بخصوص أماكن بيع قطع غيار الإبيزا فى القاهره إن فى مكان لبيعها فى فيصل .. من فضلك ممكن توصفلى فين فى فيصل ؟؟ بعتذر يافندم على إزعاجك .. بس بجد أنا بثق فى حضرتك لأبعد حد .. شكرا أوى .. |
رد: سؤال عن الإبيزا 94 من فضلكم
اقتباس:
هو ممكن يكون جهل و ممكن يكون بينصب عليكي علي فكرة عشان تجيله كتير:HAPPY_~211: لو معملتيش صيانه اعمليها غيري فلتر هوا و بوجيهات و هاتي سبراي منظف الكربراتير و خلي الميكانيكي يرش الكاربراتير بيه و العربية واقفه مش دايره و يرش البوابات و البيكات كويس و لما ييجي يدور هتلاقي العربية اخرت في الدواره شوية الحته دي بتحصل بعد رش المنظف في الكارب و ده عادي متقلقيش منه و بيحصل مرة واحده بس مش هيحصل في كل التدويرات اللي بعد التنضيف عشان طالما بتشمي ريحة العادم يبقي حرق العربية ني و هتلاقي الكربراتير مش نضيف و الكهربا عايزه تتظبط بصي حضرتك انا لا اتعامل مع اي تاجر قطع غيار (جديدة) غير الحاج حسن صاحب محل فولكس هاوس اللي في شارع مراد قبل ميدان الجيزه علي طول علي ايدك اليمين و انتي رايحه ناحية الجيزه الراجل ده في منتهي الامانة لو حضرتك عايزه تاخدي من عنده يعني و لو علي فيصل فيه فتح الباب ده اشهرهم في فيصل و حاجته كويسه و بصراحة انا مش فاكر مكانه فين بالضبط في فيصل بس هو تقريبا قبل كلية تربية رياضية بشوية عموما انا هحاول اجيبلك نمرته و تكلميهم تسأليهم المكان فين تحديدا |
| الساعة الآن 05:49 AM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017