اعرف منين ان التكييف بيفصل و يشتغل ( بيريح يعنى )
 

مساء الخير يا شباب
انا معايا عربية BYD F3
التكييف ماشاء اللة قوى جدا لكن عايز اعرف هل هو طول ما انا مشغلة بيبقى شغال على طول ولا بيفصل و يشتغل - زى تكييف البيت مثلا
انا بسيب المؤشر على وسط اللون الازرق على طول و المروحة معظم الوقت على 2
قليل لما اشغلها على رقم 3 لما يكون الجو حار جدا
لكن بلاحظ ان الهواء البارد شغال على طول بدون توقف او راحة
علشان لما بسافر مسافات طويلة بعتمد على التكييف مش بفصلة -
فكنت عايز هو بيفصل لوحدة ولا لازم ابقى اريحة انا شوية
شكرا

رد: اعرف منين ان التكييف بيفصل و يشتغل ( بيريح يعنى )
 

مركز دنيا لصيانة تكييف السيارات
الاسكندرية

السلام عليكم ورحمة الله وبركاتة
اولا تكييف كل السيارات بيفصل لاكن تختلف طرق الفصل فى سيارات يفصل التكييف داخليا ودة مش حتشعر بية ابدا
وفى بيفصل خارجيا
عن طريق تروموستات موجود على الكويل او الثلاجة الداخلية اول ما يشعر ببرودة السيارة بيفصل واول ما يشعر بسخونة السيارة يشتغل
وطبعا لو السيارة جديدة مش حتحس اوى بلفصل بتاع التكييف عشان بيكون بين الكلتش وبكرة التكييف مادة اسبستوس عشان ما يعملش صوت التشغيل او الفصل نتيجة انحكاك بداية التشغيل
فلو عايز تعرف افتح الكبوت وشغل التكييف على رقم واحد واقفل الزجاج وتعالة عند مجموعة السيور حتلاقى حوالى كل 20 الى 30 ثانية حاجة بتقول تك وبعدين 10 الى 15 ثانية تقول تك تانى معناها كدة الامور تمام
واى استفسار انا تحت امرك
اشرف الدباس

رد: اعرف منين ان التكييف بيفصل و يشتغل ( بيريح يعنى )
 

انا متشكر جدا لحضرتك يا استاذ اشرف لاهتمام حضرتك
------------------
معلش لو انا عايز اتاكد اشغل مروحة التكييف على رقم واحد - دا قصد حضرتك
طب بالنسبة للمؤشر اللى فى سخن و بارد هل اسيب المؤشر على نص الازرق ولا اظبطة على اية
سؤال تانى معلش
دلوقتى لو انا مسافر لمسافة طويلة و مش عايز اضغط على التكييف
هل افصلة مثلا كل فترة كدة ولا اظبطة على درجة معينة بحيث انة يفصل و يريح لوحدة
معلش اصل دى اول عربية ليا و معرفش لسة اى حاجة و بحاول افهم
متشكر جدا جدا لحضرتك

رد: اعرف منين ان التكييف بيفصل و يشتغل ( بيريح يعنى )
 

السلام عليكم
اولا الف مبروك على العربية وان شاء الله ما دوبش ابدا

شوف يا سيدى تكييف العربية مكون من 3 انواع نوع بستم ونوع ريشة ونوع حلازونى

وعربيتك بى واى دى F3 هو حلازونى ودة اسوء انواع التكييفات اقصد على الكومبروسر يعنى الى بيقولو علية كباس

وطبعا عايز عناية شديدة جدا لعدم تعرضة للتلف
ازاى بقى العناية دى
شوف يا سيدى دايما شغل التكييف والعربية واقفة قبل ما تمشى او تتحرك بلعربية يعنى وخلى بكرة السخن والبارد على البارد فقط يعنى على اخر الازرق ويكون مروحة التكييف الداخلية وانتة واقف على رقم واحد عشان تدى فرصة للتكييف يفصل ويشتغل وهو مستريح بدون اى ضغوط ولما تمشى زود سرعة المروحة زى ما انتة عايز وتطفى كمان وانتة ماشى عادى لكن ما تشغلش وانتة ماشى وما تسمعش اى كلام يقولك افصل الفتيس او دوس دبرياش او خلى الار بى ام ينزل وشغل التكييف خلى بالك كومبروسر عربيتك حلازونى لا يحتمل اى صدمة كل دة تمام عندك بقى زرار بيجيب الهوا من برة ومن جوة دايما خلية يجيب الهوا من جو افضل ودايما خلى ارضية العربية مفيهاش اى اتربة عشان المروحة ما تشفطش الاتربة الى الثلاجة وتتسبب فى سدد الزعانف التى يمر منها الهواء
وكمان بعد ما توصل مكانك وكنت مشغل التكييف افصل زرار A/C وشغل المروحة على الاخر عشان تنشف المياة الموجودة فى الثلاجة الداخلية عشان ما تسوسش او تعمل روائح غريبة وكريهة وبعد ما تنشف حتحس الهوا بقى عادى اطفى وخلاص
دايما وانتى بتغسل العربية فى البنزينة خلية ينظف السربنتينة الامامية من الاتربة بمسدس المياة لزيادة كفائة التبريد بس خلية يفتح المسدس على الاخر عشان ما يعوجش ريش السربنتينة
وكدة هية افضل طريقة لتشغيل وفصل التكييف وعلى فكرة لما تكون مشغل التكييف حاول ما تقرص على العربية عشان غلط على الكومبروسر وهو لا يحتمل يعنى احسن حل ما تعدى 120 اخرك مع التكييف ولو اقل يكون احسن 100 مثلا تمام اوى وانا تحت امرك فى اى استفسار واوعى وانتة مسافر زى ما بتقول تفصل التكييف وتشغلو تانى حيتكسر على طول طفى ماشى شغل لا طبعا
وان شاء الله تكون خير ليك

رد: اعرف منين ان التكييف بيفصل و يشتغل ( بيريح يعنى )
 

متشكر جدا لرد حضرتك اللى كنت مستنة بفارغ الصبر و كنت خايف حضرتك تنسانى
معلش اول مرة اشترى عربية و معرفش اى حاجة لسة
انا كنت واثق ان الشركة هتحط طبعا اقل كمبوروسر فى الخامات لكن كمان اسؤ حاجة و طبعا بخامات تيت يبقا ربنا يستر
انا مرة شغلتة و طفيتة مرتين ورا بعض على سرعة 120 او اكتر لانى كنت بورى والدى ان العربية بتبقى تقيلة شوية مع التكييف بس الحمد للة ربنا ستر
و طبعا لما لفيت و عرفت نظام التكييف كنت بعمل زى ما الناس كانت بتقول يأما امور و ابقى ماشى سريع او ابقى ماشى على 30 كم و اشغلة و الحمد للة ربنا ستر بردو
-----------
بس ليا سؤال تانى - انا اسف واللة لتعبك
1- هل التكييف لية تسخين زى العربية كدة ولا الفكرة ان الحلزون دة يشتغل و العربية واقفة علشان الصدمة - بمعنى
انى لو ماشى اقف خالص و اشغل التكييف و اتحرك تانى ولا لازم استنى شوية لغاية ما يسخن زى العربية كدة
2 - حضرتك بتقول انى اسيب الؤشر على اخر الازرق - طب مش كدة انا بضغط على الكمبروسور ولا سرعة المروحة اللى بتظغط علية - اصل انا بسيبة على النص و على رقم 2معظم الوقت او 3 لما يكون فى عدد كبير فى العربية
او اسيبة على اخر الازرق و على سرعة مروحة على رقم 1
3 - اخر حاجة المشكلة انى دايما اسافر على سرعة 120-140 كم حل المشكلة دى اية
انا كنت بمشى بعد 160 بس بطلت اعمل كدة علشن حصل كام موقف كدة و ربنا ستر
انا متشكر لان حضرتك ذكرت كام حاجة كدة جميلة جدا و مفيدة و انا استفد منها و هنفذها انشاء اللة
بس هو تكييف الفيرنا اية
شكرا جدا - و جعلة اللة فى ميزان حسناتك انشاء اللة

رد: اعرف منين ان التكييف بيفصل و يشتغل ( بيريح يعنى )
 

لسلام عليكم ورحمة الله وبركاتة
اولا التكييف لا يحتاج الى تسخين يعنى اول ما تشغل امشى عادى لاكن ما تضغط على السيارة زيادة السرعة يعنى لو بتحب الجرى افصل التكييف

وبلنسبة لمؤشر التحويل بين السخن والبارد الى هو الازرق والاحمر
عبارة عن بوابة لو عايز سخن تحول الى الاحمر والبوابة تقفل على الصاقع ولو عايز صاقع تحول الى الازرق والبوابة تقفل على السخن وانتة بتخليها بين الاتنين يعنى فاتح شوية سخن على شوية صاقع يعنى الترومستات مش حتحس البرودة مظبوط عشان تعطى اشارة الى الكومبروسر عشان يفصل لان الهواء مختلط بين سخن وبارد وحيطول وقت عمل الكومبروسر فنصيحة عند تشغيل التكييف ضع البكرة على نهاية الازرق وخد الهواء من الداخل واحسن طرق تشغيل على رقم واحد والسيارة واقفة وعلى اى رقم وانتة ماشى

وبلنسبة لكومبروسر الفيرنا
هناك نوعان الاتنين بساتم ولكن نوع لسيارة 1500 ونوع لسيارة 1600 النوع الاول تبريد جيد جدا ولكن اقل غلطة يفسد مثلا لو نقص علية الفريون شوية مش حيفصل ويبوز على طول ويطلع زيت اسود ورايش ويبوز داير التكييف كلها فنصيحة لو اى شخص شعرت ان التكييف لا يعمل جيدا او التبريد ضعيف افصل التكييف واتجة الى اى فنى تتعامل معة للكشف يعنى دايما وانتة واقف شغل التكييف على رقم واحد وشوف درجة البرودة تمام معناها توكل على الله لو مش تمام ما تقولش دلوقتى امشى ويشتغل او ممكن كمان شوية يبقى كويس لا طبعا فكرة غلط اما بلنسبة للفيرنا 1600 دة بقى من اجود انواع التكييفات ومهما حصل لا يحدث لة اى شىء تكييف للاعمال الشاقة

رد: اعرف منين ان التكييف بيفصل و يشتغل ( بيريح يعنى )
 

طيب ايه رأيك و تعليقك على تكييف جيلى امجراند7 و ملحوظات عليه و هل هو من النوع الجيد و لا لأ و شكرا على ردودك الكريمة