الى الاخ بوب الجامد اسباب تفضيل رينو سيمبول
 

ان شاء الله ناوي اشتري عربية رينو سيمبول وهاوقول الاسباب وياريت تصححولي لوكنت غلطان قبل ما اتدبس
اولا انا عاوز عربية استعملها داخل القاهرة وممكن اسافر بيها مرتين تلاتة في السنة (سوهاج =450ك ذهاب فقط)
1- اقتصادية في البنزين
2-تجميع تركي يعنى قطع الغيار مش هتكون غالية قوى (حسب تصوري) بالاضافة الى ان التركي سمعته معقولة

ثانيا انا هاشتريها قسط يعنى مش هافكر اغيرها قبل خمس سنين على الاقل
1-شكلها عصرى ومقبول جدا (مش هيخنقك شكلها بعد شوية زي اللانوس مثلا أو اللوجان)
2-سعر اعادة البيع بعد 5 سنين هيكون قريب من سعر اعادة بيع النيو اكسنت بعد 5سنين برضو وهما نفس السعر حاليا (حسب تصوري)
3-بالاضافة لاني بحب التكنولوجيا العالية لاني مهندس اتصالات
ثالثا تمنها مايزيدش عن 80000 لانى مش هدفع مقدم كبير وعلشان القسط يبقى معقول
1- فكرت اوفر 13 الف واشترى اللوجان المغربي بس اللوجان 40% مغربي والباقى مش عارف فرنسي ولا روماني (ياريت حد يفيدني في النقطة دي )
2-فكرت في البولو تقفيل صيني لكن لما اشترى بولو صينى اشتريلها قطع غيار الماني ولا صينى ؟:08A742~169:بالاضافة الى انها اغلي

3- النيو اكسنت سمعت ان البور الكهربا بيعمل مشاكل لكن السيمبول امان اكتر
رابعا انا عاوز عربية متبهدلنيش ومابهدلهاش :CONGRA~238:
1- حسب الاراء اللي في المنتدي ان التوكيل بتاع رينو محترم ومعاملته جيدة
2-معنديش مشكلة في عمل الصيانة الدورية بتاعتها والمحافظة عليها
3- فيه ناس نصحتنى بالمستعمل بس انا مش عاوز بهدلة لكن منتظر نصائحكم
خامسا المساحات الداخلية جيدة بالاضافة الى ان الشنظة كبيرة
رغم ان عائلتى صغيرة (بنت وولد في الطريق ان شاء الله ) لكن ممكن وانا راجع من البلد يشبط معايا خمسة سته فممكن تلاتة يركبوا في الكنبة الخلفية واتنين في الشنطة وواحد يجرى ورا العربية .

انا في انتظار آرائكم واقتراحاتكم وتصحيح اي مفهوم خاطئ اكون اعتمدت عليه خصوصا رأي الاستاذ بوب الجامدptmnlo123per181

رد: الى الاخ بوب الجامد اسباب تفضيل رينو سيمبول
 

اللوجان 40% مغربي والباقى مش عارف فرنسي ولا روماني (ياريت حد يفيدني في النقطة دي )

الباقي فرنسي

سيمبول 40 % تركي و الباقي فرنسي

رد: الى الاخ بوب الجامد اسباب تفضيل رينو سيمبول
 

الف شكر يا بشمهندس خالد على الرد السريع ده بس تفضل مشكلة اللوجان ان شكلها مش عاطفي ptmnlo123per172
ولكن انا كنت منتظر تعليقك هل حساباتي كانت مظبوطة ام لا

رد: الى الاخ بوب الجامد اسباب تفضيل رينو سيمبول
 

بالنسبة لحسبة إعادة البيع بعد فترة التقسيط ، أنا عملت كده .

التوكيل مش جنة رضوان لكن من أفضل التوكيلات في مصر (إيجابيات و سلبيات) .

موضوع الشكل موضوع نسبي ، شكل سيمبول حاجة و شكل لوجان حاجة

بس ما يمنعش أبدا إن شكل لوجان مقبول جدا (بالنسبة لي) ، كمان في تفاوت في سعر قطع الغيار بين العربيتين .

إجمالا في كل فئة سعرية الواحد بيضحي بشيء مقابل شيء آخر .

رد: الى الاخ بوب الجامد اسباب تفضيل رينو سيمبول
 

الف شكر يا باشا على التفصيل بالفعل انا حاليا بافكر في انى اشترى اللوجان لان فرق السعر كبير ومغرى وممكن اتغاضى عن مسألة الشكل
وشكرا مرة اخرى على تأكيد مسألة اعادة البيع لاني ماكنتش متأكد منها

رد: الى الاخ بوب الجامد اسباب تفضيل رينو سيمبول
 

إللي معايا ميجان 2008

رد: الى الاخ بوب الجامد اسباب تفضيل رينو سيمبول
 

2-سعر اعادة البيع بعد 5 سنين هيكون قريب من سعر اعادة بيع النيو اكسنت بعد 5سنين برضو وهما نفس السعر حاليا (حسب تصوري)
سعر اعاده البيع مرتبط بالعرض و الطلب ... السيمبول جديده نسبيا و بالتالي لسه مخدتش فرصتها في الانتشار ... المؤشرات الحاليه تقول ان انتشار و سعر اعاده البيع للاكسنت افضل ..
لكن وارد جدا بعد 5 سنين تلاقي السيمبول او اللوجان منتشرين عن الاكسنت ..
فالسؤال ده اجابته في علم الغيب ... و الله اعلم
3-بالاضافة لاني بحب التكنولوجيا العالية لاني مهندس اتصالات
هي ايه التكنولوجيا العاليه في السيمبول ؟؟
3- النيو اكسنت سمعت ان البور الكهربا بيعمل مشاكل لكن السيمبول امان اكتر
الباور في الاسكنت بقى زيت من 2008 ...
لكن فعلا مفيهاش اي عوامل امان غير الحزام ... متهيألي السيمبول فيها ايرباج .
1- حسب الاراء اللي في المنتدي ان التوكيل بتاع رينو محترم ومعاملته جيدة
توكيل محترم ... مسمعتش اي حد اشتكى من التوكيل سواء رينو او حتى كيا
2-معنديش مشكلة في عمل الصيانة الدورية بتاعتها والمحافظة عليها
اي عربيه زيرو الصيانه الدوريه بتاعتها مش مكلفه قصاد انك بتحافظ على عربيتك ( قرار حكيم )
3- فيه ناس نصحتنى بالمستعمل بس انا مش عاوز بهدلة لكن منتظر نصائحكم
الفبريكه ليها ريحه .. واحساس تاني

انا بس رديت على الاجزاء اللي اعرفها
هو رينج ال 80 الف فيه كمان الافيو و الريو البروتون ولو زودنا شويه ممكن نفكر في ياريس ( للعلم و ليس للترشيح )

مش بحاول اقولك ان الاكسنت احسن او تختار عربيه تانيه بدل السيمبول او اللوجان ..
بس علشان تكون الصوره كامله وواضحه ادامك في الاختيار و المقارنه .. فتبقى مختار العربيه عن اقتناع كامل
مع العلم ان المقارنه بين توكيل رينو و غبور الافضليه طبعا لرينو



واكيد اساتذه الرينو حيفيدوك اكتر عن السيمبول و اللوجان
ومبروك مقدما