عندى مشكله مع المياه
 

السلام عليكم

فى البدايه السياره اكسنت 1500

غطاء قربة الميه بيرمى الميه خارج السياره وممكن يفضى القربه خالص
غيرت غطا الريداتير بواحد جديد و المشكله فضلت كما هى برضه الميه بتنقص بسبب خروجها من غطا القربه

روحت لميكانيكى فك غطا الريداتير وبطل العربيه ودورها الميه نطرت لبره قام قالى ده جوان وش السليندر بايظ
بصينا على الزيت كويس وعلى مية الريداتير و الإتنين كويسين ( مفيش طحينه )

المهم قولت أتأكد روحت لميكانيكى تانى قالى هجرب اربط وش السليندر الأول كويس ونشوف وفعلا ربط على المسامير جامد وقفلنا الموتور وجربنا موضوع نطر الميه ده فمحصلش الحمد لله

لكن للأسف المشكله الأساسيه ما زالت موجوده ( خروج الميه من غطاء القربه على فترات متقطعه )
الميكانيكى قالى هاتلها غطا ريداتير استعمال بيبقى أحسن من الجديد وأصلى اشتريت واحد بالفعل يمكن الموضوع قل شويه لكن برضه موجود

لو فيه أى اقتراحات يا ريت تشتركوا معايا أحسن أنا خلاص تعبت

وشكرا لكم جميعا

رد: عندى مشكله مع المياه
 

علي فكره ممكن يكون الجوان بايظ فعلا لكن الميه ما تدخلش علي الزيت
ممكن الميه تكون بتروح من مخارج العادم و تنزل من الشكمان !!!!!
اما بالنسبه للغطا فانا مش عارف انت بتتكلم علي غطا القربه ولا غطا الردياتير نفسه؟؟
لو الردياتير له فتحه و الميه بتهرب منهو بتروح للقربه و بتغلي هناك يبقي كده غطا الردياتير وحش فعلا
اما لو الردياتير مالوش غطا و غطا القربه بيسرب يبقي اشتري غطا استعمال او جديد اوريجنال لان دا بيسبب السخونه رغم انه سبب تافه.
لو الميه لسه بتنقص يبقي انت عندك تسريب من مكان تاني ممكن خرطوم او اي حاجه بيسقط ميه و بتنزل علي اجزاء سخنه للموتور و تتبخر بسرعه

رد: عندى مشكله مع المياه
 

العربيه دى فيها طرمبه مياه

رد: عندى مشكله مع المياه
 

هى العربيه فيها غطا ريداتير وغطا قربة ميه كمان
انا غيرت غطا الريداتير قولت يمكن هو الى بيبعت ميه زياده للقربه

الميه الى بتنزل من غطا القربه ميه عاديه مش سخنه
وأنا جربت تانى من شويه رفعت غطا الريداتير وجربت مفيش نفخ ميه لبره مع بداية الدوران بس لما بزود بنزين الميه بتفور وتطلع لفوق بيتهيألى ده طبيعى ولا ايه ؟

لاحظت ان فيه تسريب من حته تانيه كمان بس معرفتش أشوف هيا من الريداتير نفسه ولا من مكان التقاء الماسوره المطاط بالريداتير

وشكرا على اهتمامكم

رد: عندى مشكله مع المياه
 

بناء على المعلومات الى فى الرد السابق ايه رأيك
وعلى فكره المشكله دى مظهرتش عندى الا مؤخرا بعد تغيير جوان وش السليندر

تحياتى

رد: عندى مشكله مع المياه
 

لو الميه بتتقلب عادي جوه الردياتير اوك مافيش مشكله
انما لو الميه نطرت علي بره و عملت زي نافوره يبقي دا جوان وش السلندر مالوش حل تاني

لازم تتأكد و اعتقد انها من الماسوره المطاط ممكن يكون الافيز بتاعها مش مربوط كويس
لان اي تسريب في دوره التبريد بيسخن العربيه.

رد: عندى مشكله مع المياه
 

السلام عليكم

النهارده روحت للميكانيكى واشتريت معايا جوان وش سليندر علشان يركبهولى
وركبناه الحمد لله وقفلنا العربيه وبعد ما حطينا ميه وقولنا بسم الله ودورنا العربيه لقيت غطا القربه بيحدف ميه كأنه حنفيه ومفتوحه
بصراحه أنا اتقفلت جدا وحسيت ان اليوم راح على الفاضى
المهم هو عنده عربيه قديمه زى بتاعتى بالظبط بياخد منها قطع غيار قولتله هات غطا القربه بتاعها نجربه حطيناه الميه وقفت
خدتها مشوارين كده ورجعتله مفيش ميه تقريبا غير نقط بسيطه جدا
الغريب بقى ان احنا حطينا الغطا القديم تانى وجربت برضه مجابتش ميه ههههه شكلها كده راكبها عفريت ولا ايه :)
المهم انا قولتله يرجعلى الغطا بتاعه تانى ( مجرد راحه نفسيه ) ومشيت بالعربيه حوالى 40 كيلو ورجعت الموضوع كويس ومفيش ميه بتنقص الحمد لله

معلش أنا طولت عليكم بس حبيت أقول الى حصل يمكن حد تانى يستفيد منه

وتقبلوا تحياتى وكل عام وأنتم بخير