مصر موتورز مجتمع السيارات - هيونداى النترا سنة ونص اشغال شاقه

مصر موتورز مجتمع السيارات (https://www.masrmotors.com/vb/index.php)

- Hyundai Elantra - النترا (https://www.masrmotors.com/vb/forumdisplay.php?f=134)

هيونداى النترا سنة ونص اشغال شاقه - تجربة ومراجعة شاملة

تقرير وتجربة ومراجعة شاملة للسيارة هيونداى النترا
مو 2007 - 2008 -2009 -2010- 2011

https://fbcdn-sphotos-e-a.akamaihd.n...51596595_n.jpg

اولاً عايز اعتذر لكل متابعى القسم الكورى عن غيابى الفترة اللى فاتت وربنا يعلم انا قد ايه بكون سعيد بمتابعة اعضاء كل الاقسام وكتابة موضوعات جديدة لكن التزامات العمل بالاضافه لمهام الدعم الفنى فى المنتدى هى اللى بتشغلنى وده السبب الاساسى اما السبب التانى فراجع للعربيه نفسها الالنترا واللى بتخلى صاحبها ميحتاجش يسأل ولا يفتح بقه فى اى حاجة معاها بصراحة :) وهشرحكم بالتفصيل ان شاء الله تجربتى الكاملة معاها

ثانياً الموضوع ده بإذن الله هيكون تجربة ومراجعة شاملة للعربية اللى ياما اتكتب عنها مئات التقارير والمراجعات وبالتالى هحاول اكتبة على مراحل واعرض فيه جوانب مختلفه واتمنى ان ربنا يوفقنى اقدم تناول جديد وفيه اضافه وبمعنى تانى اللى عايز تقرير سريع وفى الانجاز وفيه الخلاصة فى كلمتين يشوف باقى التقارير اللى زمايلنا الافاضل عاملينها قبل كدة لكن ده تقرير هيتعمل على نار هاااااااااااااااااااااااا ادية

وطبعاً اتمنى من الجميع يشرفونى بالمشاركة بالاراء او الاسئله او اى تجارب خاصة ان شاء الله

و الى اللقاء بعد الفاصل ،،،،

رد: بعت الالنترا بعد سنة ونص اشغال شاقه - تجربة ومراجعة شاملة

متاااابع يا كبير

رد: بعت الالنترا بعد سنة ونص اشغال شاقه - تجربة ومراجعة شاملة

لية اشتريت الالنترا
زى ما بنقول للناس كل يوم هنا فى مصرموتورز لما تيجى تشترى عربيه لازم تحدد اولوياتك ومتطلباتك وميزانيتك علشان تختار العربيه الانسب ليك وان مفيش عربيه هى الافضل على الاطلاق ومش شرط ان العربيه مناسبة لشخص انها تكون مناسبة لشخص تانى
كمان حد غاوى عربيات زيي دائماً فى عقله حسابات كتير وفى قلبة حب او ميل لعربيات كتير وبالتالى الاختيار بيبقى دائماً صعب لكن بعد البى ام ال 320 والتجربه المريرة معاها كنت محدد اكتر فكنت عايز

1- عربيه فى رينج 80 - 100 الف وديه شريحة سهله فى اعادة البيع عموماً ومناسبة لحالة البلد خاصة بعد الثورة ان مكانتش كتير كمان كمبلغ تبقى رامية فى الشارع وماشى بيه فى طرق هى الاسوء عالمياً بالاضافه لمظاهرات وشغب وفوضى عايشينها فى كل شوارع مصر تقريباً دلوقتى

2- عربية لو طولت مصرفش عليها فلوس خالص بمعنى تانى اقل تكاليف تشغيل واقتناء وده لان اللى خسرته فى البى ام فى اقل من سنتين اقتناء مبلغ يكفى لشراء عربيه صغيرة فكان نفسى اقعد سنة ولا اتنين راكب عربيه من غير ما اصرف فلوس عليها صيانات وقطع غيار

3- كنت عارف ان اى عربيه هركبها بعد البى ام هحس بفروق شاسعة فكنت عايز على قد ما اقدر اشترى حاجة متحسسنيش اوى بالفروق بشكل سلبى باختصار كنت عايز عربيه باداء مميز برضو وشخصية خاصة

4- ميكونش لونها فضى ولا ابيض علشان خلاااااااااااااااااص زهقت من اللونين دول :)

بس كدة شروط واضحة ومحددة اعتقد ولو حد دخل المنتدى طلبها سهل نقولة خيارات وبدائل بس برضو البدائل كانت محيرة ومنها

تويوتا كرولا
كيا سيراتو
هيونداى النترا
مازدا 3
بى ام الفئه الخامسة موديلات 98 2002

طبعاً كل ده فى المستعمل والحالات اللى بسميها فرست هاند وديه بحددها بان العربيه تكون استعمال خفيف عداد اقل من 100 الف كم حالة نظيفه ومش مهم لو كانت مرشوشة بره بس الاهم عندى من جوه متكونش متهانة وطبعاً الاساسيات كلها تكون سليمة ومفيهاش مصروف

بعد الفاصل مقارنة بين الالنترا وباقى السيارات المنافسه فى نفس الفئه

رد: بعت الالنترا بعد سنة ونص اشغال شاقه - تجربة ومراجعة شاملة

:Wkiss5::Wkiss5::Wkiss5:

الموضوع مشوق وشكله هيحلو

متااااااااابع

رد: بعت الالنترا بعد سنة ونص اشغال شاقه - تجربة ومراجعة شاملة

متابع ومتشوق لمعرفة التجربة ... وياريت يا ابو نورا لو كنت كاتب عن تجربتك مع البى ام تحط الرابط بس :)

صراع مع المازدا

Mazda 3 Vs. Hyundai elantra

http://www.masr1.com/di-9JOH.jpg

https://fbcdn-sphotos-e-a.akamaihd.n...17754805_n.jpg

http://files.conceptcarz.com/img/bmw/m51.jpg
اول عربيه سقطت من حساباتى كانت البى ام
هى عربيه محترمة وعملية اكتر من الموديلات اللى بعدها وقطع غيارها حنينه اكتر بس برضو بيعها مش سهل ومصروفها مش قليل وموديلاتها بعيدة اوى والحالات النظيفه فيها نادرة جداً

التقييم النهائى
اقتصادية ★★
عملية ★★
اداء ★★★★

http://www.24hourlocksmith.com.au/Toyota%20Corolla.jpg
الكرولا والتويوتا عموماً تقال على قلبى اوى لانها عربيه بلا لون ولا طعم ولا رائحة وان كانت تتوفر فيها شروط العملية وسهولة اعادة البيع واقتصادية فى مصروفها وكمان موديلات 2008 الكاملة فيها عوامل امان محترمة بس احنا ماشيين بمبداء خليها على الله ففى النهاية مكانتش مميزة كفايه بالنسبالى

التقييم النهائى
اقتصادية ★★★
عملية ★★★
اداء ★★
★
http://www.hdwallpapersinn.com/wp-co...ia-forte-2.jpg
كيا سيراتو عربيه تصميمها جميل وانا شخصياً بحبه اوى تسلم ايد عم بيتر شراير ابدع فيه بصراحة وقدم عربيه بروح اروبيه خالصة وتكنولوجيا وسعر اقتصادى وهى من العربيات الناجحة جداً بره بس مش بالامكانيات العيانة اللى عندنا طبعاً لكن فكرة سهولة سرقتها وعفشتها الضايعة خلونى شيلت الفكرة من دماغى خالص

التقييم النهائى
اقتصادية ★★
عملية ★★★
اداء ★

... يتبع

مميزات مازدا 3
♥ اداء رياضى متميز كمحرك وفتيس وعفشه
♥ كماليات وخامات متميزة - فتلاقى عندك كروز كنترول طارة مالتى ايرباج ستاندرد خامات تابلوه وفرش افضل

عيوب مازدا 3
✖ عفشه ناشفة وده راجع لكونها عفشه رياضية اكتر فدية ميزة وعيب
✖ مساحة الشنطة ومساحات التخزين ومساحات الركاب بالعموم اضيق واقل رحابة مقارنة بالالنترا

مميزات هيونداى النترا

♥ اداء محرك وفتيس رائع يظهر فى السحب والقوة وثبات الاداء على مختلف درجات الحرارة وظروف التشغيل وندرة الاعطال وكل ده بالاضافة لاستهلاك وقود اكثر من رائع مقارنة بالاداء ده

♥ عفشه انعم واقرب للطعم اليابانى (مديه على كرولا شوية) وان مكانش ادائها كثبات بنفس الروعة لكن مع قله المشاكل مقارنة بمشاكل السيراتو او الفئات الاقل زى الفيرنا والاكسنت فهى مقبولة جداً

♥ اكثر رحابة واتساع واماكن تخزين فى كل حتة (ابواب تابلوه كنصول كراسى شنطة واسعة ..

♥ سهولة اعادة البيع . بمعنى انك تنزل بيها السوق مترجعش بيها او تبيعها وانت قاعد فى بيتكم كمان لانها عربيه مطلوبة وناس كتير بتقدرها لاقتصاديتها والمزيج المتناسب مابين العملية والاداء اللى بتقدمة

عيوب هيونداى النترا

✖ كماليات عموماً وبالاخص وسائل الامان ضعيفة جداً ومتشوفهاش الى فى اعلى فئه

✖ خامات الصالون والتصميم الداخلى اقتصادى اكثر من انه فخم او جميل لكن يشفعله حفاظ المصمم على الطابع العملى بتوفير مساحات تخزين ومساحات للركاب ممتازة وده منهج طورته هيونداى فى الموديل اللى بعد كدة وقدرت تحافظ على طابع الرحابة والسعة الداخلية المريحة بالاضافة لتطوير التصميم واخراجه من حيز العملى الاقتصادى فقط الى الجمالى والابداعى كمان

✖ اداء العفشه زى ما هو ميزة فى النعومة عيب فى الثبات لكن برضو اجمالاً هى افضل من ثبات الكرولا او السيراتو لكن اقل بكتير من مستوى المازدا مثلا او السوبارو او السيفيك ناهيك عن الاوروبى يعنى تقدر تقول انها احسن ما فى الكورى وتبقى عامل حسابك انها بتحك وطول ما فيه مطبات هلامية زى بتاعتنا ديه وطول مانت مركب فيها حد بتحك مش علشان واطية لكن علشان المساعدين والعفشه انعم اكتر كمان

وبالتالى هتلاقو ان عدد المميزات فى الالنترا اكثر منها فى المازدا وعدد العيوب اقل وان كانت المقارنة غير محسومة تماماً بالنسبالى ومازلت نفسى اركب المازدا 3 لكن تفوق الالنترا فى الناحية الاقتصادية والعملية كان عامل ترجيح مهم فاخدت القرار لصالحها وعلشان كدة بنقول للناس دائماً مهم تبقى محدد متطلباتك بوضوح وكمان ترتيب اولوياتك وانى متطلبات اهم من التانية علشان ده اللى بيحدد العربيه الانسب ليك

كدة انا حكيتلكم اسباب اختيارى وعلى اى اساس قررت وزى ما بقول وبكرر حسبتى مش شرط تكون هى هى حسبتك بس المهم انك تحسبها ومتاخدش كلام او نصائح اى حد على انه مسلمات

فى المشاركات الجاية ان شاء الله هحكيلكم عن تجربتى مع العربيه بتفصيل اكتر ونشوف مع بعض اذا كانت حققت متطلباتى وكانت قرار صائب ولا لاء

ابكو معنا :D