|
جيب شيروكى 92
السلام عليكم
انا اشتريت جيب شيروكى 92 مانيوال العربيه حالتها حلوه بس محتاج منكم طلبين اولا انا معرفش اى حاجه عن الجيب يعنى عايز اعرف الصيانه الدوريه بتاعتها عباره عن ايه و بتتعمل كل قد ايه يعنى بيتحطلها نوع زيت ايه و كميه ا\قد ايه و الفلاتر بتتغير كل قد ايه و المفروض اروح اغير فيها سيور معينه يعنى اشرحولى كده مع ماحظة انى ميح فى الجيب ثانيا عدادا السرعه مش شغال ده اروح بيه لكهربائى و لا ميكانيكى و لا هو ممكن يكون العيب من ايه و شكر |
رد: جيب شيروكى 92
الف مبروك على العربية ... ربنا يديك خيرها و يكفيك شرها ...
اول حاجة ... حضرتك تروح تغير الحاجات الى انت متضمنش اتغيرت امتى او ظروفها ايه .... و ممكن تبوظ منك فى اى وقت .... زى السيور ... البوجيهات ... الفلاتر ... اعتقد سير الكاتينة الى عندك جنزير حديد ... و السير ده لو بايظ ليه صوت مميز بيعرفوه الميكانيكية و حضرتك طبعا حتغير زيت الموتور و فلتر الزيت فلتر البنزين ... و تشيك على خراطيم دورة التبريد و خراطيم البنزين حتشيك على زيت الفتيس و زيت الكارونة ... و حتشيك على زيت الفرامل و زيت الباور العربية 4 سلندر و لا 6 سلندر ؟؟؟؟ اخبار الدفع الرباعى ايه ؟؟ على فكرة ... الى قلته لحضرتك ده حاجة عامة لاى عربية .... انا مش معايا شيروكى .. بس ممكن اقول لحضرتك حاجات فى الدفع الرباعى بصفة عامة ان شاء الله حد يكون خبير فى الشيروكى يفيد حضرتك اكثر |
رد: جيب شيروكى 92
الف شكر مهندس احمد العربيه 4 سلندر و الدفع الرباعى تمام
|
رد: جيب شيروكى 92
يا سيدى لا شكر على واجب ... كلنا اخوة و بنتعلم من بعض ( الله يمسيك بالخير يا مينا )
بخصوص الدفع الرباعى .... حضرتك لازم تكشف على زيت الكارونة الخلفية .... و كمان زيت الكارونة الامامية تكشف على زيت الفتيس العادى ... و زيت فتيس الغرز بعد ما عامل البنزينة يكشف على الزيوت ... من المستحسن ان حضرتك تغسل العربية كويس من تحت و بعد كدة .... تبدا عملية التشحيم ياريت حضرتك تنزل مع عامل البنزينة و تبص عليه و هو بيشحم .... حضرتك تبص معاه على صلايب الكردان الامامى و الخلفى ... و بيض العجل لو فيه مشاحم .... من الاخر .... اى مشاحم يتحطلها شحم كويس بصفة عامة .... عربيات الدفع الرباعى بتحتاج عناية زيادة شوية .... و مصاريف زيادة شوية لازم العربية تتغسل كويس من تحت قبل التشحيم علشان فيه تراب بيدخل جوة صلايب الكردان ... فلازم تتنضف بالمياه و بعدين يتحط فيها شحم تانى ... و نفس الحال بالنسبة للعفشة الموضوع ده حضرتك تعمله مرة كل شهر ... او على حسب استخدامك للعربية و كمان تعمل حسابك ..... مرة كدة كل شهر ... تعشق الدفع الرباعى و تمشى بيه شوية ... علشان تروس الغرز متقفش ... و فى نفس الوقت لو فيه مشاكل فى الغرز تبان معاك نصائح عامة :- قائد الدفع الرباعى ( و خاصة لو عربية قديمة شوية ) بيكون فى الغالب راجل كاجوال ... معندوش مانع انه ينزل تحت العربية و يتمرمط عند الصنايعية شوية ... البدل و الكرفتات مش مستحبة متبصش لعداد البنزبن كتير علشان متتعقدش .... العربية حتاكل بنزين ... مينفعش تقارنها بالعربية السيدان قطع الغيار حتكون غالية شوية ... برضو متقارنهاش بالعربيات السيدان انا عامل اجندة صغيرة للعربية ... بكتب فيها كل الى بعمله فى العربية .. و التاريخ ... التكلفة ... عداد الكيلومتر و قطع الغيار الى اتركبت و المصنعية اما عن عداد السرعة ... ابدا بواحد كهربائى ... و هو حيشيك على السلك و العداد ... لو العداد بايظ حيبعتك لواحد بتاع عدادات انا متابع معاك .... و اى سؤال انا فى الخدمة |
رد: جيب شيروكى 92
اقتباس:
|
رد: جيب شيروكى 92
والله يا مهندس احمد مش عارف اشكرك ازاى على اهتمامك انا بالنسبه لى الدفع الرباعى مش هستخدمه خالص لانى حركتى كلها فى المدن يعنى غالبا مش هحتاجه انا سمعت انه ممكن بيتلغى انت ايه رايك ؟ بالنسبه لعداد السرعه انا روحت للكهربائى و شيك ع السلوك و قالى جرب فلما ما اشتغلش برده قالى هتحتاج حساس سرعه
|
رد: جيب شيروكى 92
لا شكر على واجب .... احنا كلنا بنتعلم من بعضنا .... و انا حتعلم من حضرتك حاجات عن الشيروكى اكيد شوية كمان
من المستحسن ( زى ما قلت لحضرتك ) انك تعشق الغرز و تستعمله من فترة للتانية .... علشان الغرز ميبظش ... و علشان تفضل محتفظ بميزة الدفع الرباعى حتسمع كلام من ناس كتير عن موضوع الغرز ده .... كتير من الناس حيقولولك الغيه ... علشان ملهوش لازمة ... بيتقل العربية ... بيسخن العربية ... مشاكله كتير ... ريح دماغك ... موضوع الغاء الدفع الرباعى انت صاحب القرار فيه .... الناس الى بتلغيه بيكون علشان عندهم مشاكل فيه و بتستخسر تصلحه بس ليه تفقد ميزة فى العربية ؟؟!!!! احتمال تنفعك فى يوم من الايام .... انا رايى انك تخليه فى العربية متلغيهوش لو حبيت فى المشاركة القادمة ان شاء الله حشرح لحضرتك شوية حاجات عن استخدام الغرز ممكن حضرتك تشوف كهربائى تانى و لو رايهم اتفق ... توكل على الله و هات حساس سرعة انا مش حقدر افيدك فى التفاصيل الصغيرة علشان انا مش معايا شيروكى |
| الساعة الآن 10:29 AM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017