مصر موتورز مجتمع السيارات - اشتريت صنى وبتقتطع

اقتباس:

المشاركة الأصلية كتبت بواسطة elkomi15 (المشاركة 67325)

يجماعة انا اشتريت نيسان صنى ----وعامل بيها دلؤتى 350 كيلو فقط بس فى حاجة غريبة ظهرت العربية بتقطع منى وانا مديها الأول وبطلت منى مرتين مش عارف اية السبب انا بحط بنزين 90 -----------ياريت لو حد عندة حل يقولى اعمل اية
وهل دة علشان لسة فى التليين اول الف كيلو ----------وهل تشغيل التكيف فى اول الف كيلو غلط على الماتور

السلام عليكم بقالى بالظبط سنة وشهرين مش بعمل مشاركات ويمكن دخلت مرة واحدة بس من سنة وشهرين وقت ماكنت حيران اشترى اية وتعبتكم معايا وحجزت ماتريكس وبعدين غيرت لتيجو وسبحان الله فى اخر لحظة اشتريت نيسان صنى
انا بئة بقالى بالظبط سنة وشهرين معايا النيسان صنى عاوز بئة احكى حكاية العربية
من واقع تجربة حقيقية وطبعا انتو عارفين انى عندنا النترا خليجى 2009 وبرضة بس جبناهاا قبل الصنى ب 3 شهور ------------------بس انا سبتلهم النترا فى البيت واخدت الصنى بعد شد وجذب مع والدى 0000000000علشان كان عاوز يدينى النترا وياخد الصنى المهم
طبعا انا سمعت فى الأول كلام ان الصنى وحشة وتقفيل مصرى ومعرفش فيها عفريت وحاجات كتير كدة

بصو انا عامل بيها لحد دلؤتى 42 الف كيلو لأن بسافر كتير بالعربية وعاوز اقولكم انى مشقيهاااا يعنى مطلع عنيها بس بديها حقهاا فى النظافى والصيانة والمحافظة عليها

اول 1000 كيلو كان الكرسى بيزيق وكانت بتقطع منى لدرجة انى قولت انا لبست العربية ولا اية
روحت التوكيل كان فيها عيب فى فى بوابة الماتور والصراحة الناس غيرتة بمنتهى الشياكة والأحترام وربطت الكراسى ومن وقتهااااا الى وقتنا هذااااا
واقسم بالله ماغيرت فيها الا بوجيهات وزيت الماتور حتى سير الكاتينة طلع جنزير مش بيتغير وتيل الفرامل لسة مغيرتوش لأن لسة شغال تمام
يعنى بئالى سنة وشهرين مش غيرت غير طقم بوجيهات وزيت ماتور وشكرا على كدة
الصراحة النيسان الشكل الجديد الفوانيس الكريستال والشبكة الطويلة عربية ممتازة جدا جدا وبتاعت شقى وشغل وانا مبسوط بيها والحمد لله ولاكن
هقولكم على الحاجات ايلى فيها مميزات وايلى فيها عيوب

اول حاجة الدركسيون مش تقيل ولا حاجة زى ماناس قالت انا ركبت لانسر سوبر اكشن وتقريبا هو هو نفس الباور
تانى حاجة العربية على الطريق ثابتة جدا وبحس ان العربية بتتقل اكثر على الطريق كل اما ازود السرعة دة بعكس النترا ايلى بترعب لما بوصل بالعداد ل 160
على مصر اسكندرية الصحراوى
التكيف بتاعهااااا تحفة لدرجة انى عرفت قيمة اليابانى فى يومين الحر ايلى عشناهم وبشغلة على رقم 2 وببئة بردان وانا جوة السيارة ويعتبر افضل مكيف فى فئة السيارات ايلى بتتراوح من 80 الى 100 الف
العفشة ناس برضة كانت بتقول ناشفة انا شايف عفشتها كويسة جدا ولا حس بدبدبة ولا بحش بخشونة فى المطبات بس يمكن النترا انعم منها شوية لاكن عفشتها ممتازة

عيوبهااا بئة ودة ايلى تاعبنى فعلا فى العربية
حــــــــــــــــــوت بنزين يجماعة حوت بجد بتاكل فى الصفيحة 210 كيلو وممكن كمان 200 كيلو لو الجو زحمة ومشغل المكيف والموضوع دة مضايقنى جدا
وسئلت اصحابى ايلى معاهم نيسان الشكل الجديد قالولى على نفس الموضوع دة
ال 10 لتر بيمشونى 110 كيلو والمكيف شغال

المشكلة التانية بئة وبرضة تعبانى ان الصالون بتاعها ضيق من ورا يعنى لو واحد رجلية طويلة زى حلاتى مش هيقعد حد وراة مرتاح ودة لأن هما موسعين فى الشنطة على حساب الصالون الخلفى
هما دول المشكلتين ايلى تعبنى فى السيارة واى حد بيفكر ويفاضل مابينها ومابين الأنواع ايلى ذكرتها قبل ذلك عندك مميزاتها وعيوبها من واحد جربها واعتقد ان الموديل الجديد بدا ينتشر فى الشوارع دلؤتى لأن العربية رخيصة ومش غالية وفيها كماليات كتيرة حتى الحساسات الخلفية بتركب دلؤتى وبرضة اسمها يابانى
دى حكايتى وبالتوفيق ليكم

انا بئة لية سؤال لخبراء المنتدى شهر 12 الجاى ان شاء الله
انا عاوز اجيب عربية تانى اتوماتيك تتراوح من ال 80 الى ال 100 الف
هادفع 25% واقسط الباقى على 3 سنين انا موظف قطاع خاص واستعلام عادى
ومفردات مرتب برضة عادى

انا بفكر فى الأتى
نيسان صنى بس اللون الأسود تكون اتوماتيك
العربية الصينى الجديدة ايلى ب 72 الف اتوماتيك ايلى هى بيقولو عليها كلها تويوتا يارس وانا شوفتها فى المعرض وشكلها كويس وسعرها منافس وتوكيلها يارس لو حد ركبها يقولنا رائية
وبفكر بما ااننا فى الصينى فى ام 11 شكلها برضة عاجبنى واسبرانز نجحت فى مصر واثبتت كفاءة برغم انها مانيوال بس بفكر فيها برضة

وبفكر فى سيراتو بس مش عارف لية قلقان من السيراتو وحاسس ان العربية دى هيظهر فيها عيوب الفتة الجاية

تفتكرو ممكن اجيب اية ولو فى حاجة تانية كويسة ياريت تساعدونى وشكرا ليكم جميعا وصباح سعيد على احلى منتدى وجمعة مباركة ان شاء الله