محتار بين صني إي إكس صالون وسوبر صالون رجاء الافادة
 

السلام عليكم
بعد بعض البحث والدراسة للسيارات الموجودة بالسوق المصري قرر ت شراء سيارة صني حيث أنها الأكثر ملائمة لذوقي وامكانياتي وظروفي . لكني مازلت في حيرة من أمري هل أشتري EX Salon أم Super Salon .
الفروق معظمها كماليات لا تمثل أهمية كبرى بالنسبة لي لكن الفرق الجوهري في العفشة فهم يقولون أن سوبر صالون بها عفشة رياضية وإضافات غير موجودة في إي إكس مما يعطيها ثبات في السرعات والمنحنيات.
وسؤالي هل هذا الفرق في العفشة فعلا كبير ويستحق الفرق في السعر حوالي عشرة آلاف جنيه بالاضافة طبعا للكماليات الأخري مثل الصالون والنواكل والأبنوس وcd changer إلخ .
كما يسعدني أن أعرف تعلقاتكم وأرآكم في الصني عموما خاصة موضوع التقفيل المصري.
وجزاكم الله خيرا

رد: محتار بين صني إي إكس صالون وسوبر صالون رجاء الافادة
 

استاذي الفاضل :-

أولا :- أحيييك على اختيارك الموفق 100% للنيسان الصني ، أنا في مصر معايا لانسر وهنا في (الدوخة) معايا صني 2004 .

ثانيا "- السيارة ممتازة بلاجدال وإن كان بها عيبان :-
أ- ضيق الصالون من الخلف ب- التقفيل المصري
لكن كموتور وعفشة وفتيس أوتوماتيك لا غبار ولا جدال على اعتمادية هذه الأشياء

ثالثا :- من وجهة نظري الشخصية السوبر صالون لا تستحق هذا الفارق (10) آلاف جنيه إنت ممكن بنص المبلغ ده تحط إضافات ثانية أحسن وأفضل مثل الباركينج سنسور والزينون والجنوط وووووووووو إلخ
أما موضوع الأبنوس والحليه النيكل والمرايات الضم أنا عن نفسي مش شايف إنهم يستحقوا .

رابعا :- السيارة العوامل المصرية فيها لاتتعدى التتجميع والكراسي وفرش الأبواب والأرضية ما عدا ذلك فهو ياباني

خامسا :- موضوع العفشة مش هقد أفيدك فيه وإن كنت أجزم أنه لافرق بين السوبر والإي إكس من هذه الجهة

مبرووووووووووووك مقدما

رد: محتار بين صني إي إكس صالون وسوبر صالون رجاء الافادة
 

اهلا بيك يا ابو كريم فى منتدانا يارب نقدر نفيدك ان شاء الله

اولا الصنى مفيش كلام عليها عربية عملية ووقوية واثبتت كفائتها فى الدنيا كلها

بالنسبة للتجميع المصرى فهو اتحسن عن الاول ومشكلة ضفيرة الكهرباء اتحلت خلاص ومفيش مشاكل كبيرة او مقلقة منه وهيا مع اصدقاء ليا ومفيهاش اى مشاكل

وبالنسبة لضيق الصالون الخلفى فده على حساب اتساع الشنطة الخلفية

وكلمة تانية فى ودنك (التجميع حظوظ ممكن عربيتك يطلع مفيهاش الهوا وممكن يطلع فيها عيب سخيف لا قدر الله ) بس ان شاء الله مش هتلاقى فيها مشاكل لان الادارة فى اليابان بتراقب مصانعها كلها بنفس الاهتمام والجدية فى العالم كله والا مكانوش رفعوا شعار Made in Nissan

بالنسبة للكماليات فانا شايف انها تستاهل الفرق فى الفلوس ونحسبها مع بعض

السوبر صالون بتزير عن ال EX بالاتى

مرايات ضم كهربية
مشغل اسطوانات وشينجر 6 اسطوانات
ايرباج للراكب الامامى بجوار السائق (وديه مهمة جدا جدا)
مسند زراع خلفى مع حامل اكواب
كونسول سقفى به لمبة ومكان لتخزين النظارات
مراية مضيئة للراكب الامامى (الستات بيحترموا الاوبشن ده اوى)
مساند راس خلفية
جنوط سبور 15 بوصة
فوج ليت
كسوة جلد للدريكسون والفتيس والهاند بريك
تطعيم ابانوس فى الابواب والتابلوه
نيكل فى المقابض داخليا وخارجيا

وطبعا العفشة الرياضية وديه تشمل مساعدين دبل اكشن وده مهم اوى للثبات على السرعات العالية والملفات

فانا راي ان المبلغ مناسب للفرق فى الموديل (وده هتلاقية فى اعادة البيع)
وفرق الكماليات وديه كماليات الفابريكا
وفرق العفشة الرياضية
واكثر امانا

احسبها هتلاقيها تستاهل

واستخير ربنا وبالتوفيق ان شاء الله

رد: محتار بين صني إي إكس صالون وسوبر صالون رجاء الافادة
 

السلام عليكم و رحمة الله

أنت ممكن تعمل إختبار قيادة للموديلين بنفسك عشان تتأكد و تطمئن و لو إنه إختبار قصير بس أكيد ها يفيد , الإختبار ممكن تؤديه لدى موزعي نيسان في مصر مثل السبع و أوتو إيجيبت , إذا كنت جاد في هذا رد علي من هنا لمعلومات أكثر .

السلام عليكم و رحمة الله

رد: محتار بين صني إي إكس صالون وسوبر صالون رجاء الافادة
 

يسعدني أن أتقدم بالشكر الجزيل للأخوة الذين قاموا بالرد على هذه النصائح الغالية . بارك الله فيكم جميعا وجزاكم الله خيرا كثيرا .
وأقول لكم بصراحة أني سعيد بانضمامي لهذا المنتدى لما وجدت فيه من جدية الأعضاء ومن قبلهم طبعا الادارة وحرص الجميع على أن يقدم النصيحة المخلصة لمن يحتاجها .
فشكرا لكم مرة أخرى

رد: محتار بين صني إي إكس صالون وسوبر صالون رجاء الافادة
 

لاشكر على واجب ده دورنا كلنا فى المكان ده اننا نتناقش وننقل خبراتنا لبعض ويارب يكمل حلمنا ونبقى دايما عن حسن ظن الاعضاء

رد: محتار بين صني إي إكس صالون وسوبر صالون رجاء الافادة
 

السلام عليكم ورحمة الله
والله يا اخى أنا معايا نيسان صنى 2009 نبيتى أتوماتيك عامله 10000 كيلو طبعا الأتوماتيك مريح جدا ولكن يوجد بعض الفروقات بين سوبر صالون وEX أولا عفشة العربية عندى ناشفة مش وحشة ولكن مش مريحة ولكن فى السوبر صالون عفشة رياضية وأعتقد فارقة كثير إلى جانب الجنوط شكلها اجمل فى السوبر صالون ولكن باقى الكماليات أنا شايف أنها مش زات أهمية كبيرة لأنى ركبت الفوجات ووحدات رفع وإنذار لم تكلفى 600 جنيها