تقرير صيانة 20 ألف ومهزلة جديدة بالقطامية
 

إخوانى الأعزاء
أنا من ساعة مامشيت إمبارح من التوكيل وأنا بفكر إنى أكتب التقرير بما حدث بالضبط وأتمنى أن يكون تقرير مختلف عما سبق وأن تكون لنا وقفة مع هذا التوكيل
فى البداية أنا كنت حاجز من يوم ابعاء الماضى ليوم السبت الساعة 10 ولسوء حظهم وصلت 10 بالدقيقة دخلت من البوابة موظف الأمن سألنى حضرتك حاجز قلتله نعم وفحص كشف الحجوزات لقانى جاى فى معادى قالى إتفضل قدام خالص فى أول الطابور (مخبيش عليكو حسيت بالتفاؤل) وقفت من 10 لحد 10:15 لحد ما مهندس معدى بالصدفى قالى حد عملك أمر شغل قلتلة لأ فجه عمل أمر الشغل وكان محتواه كالآتى
1. الكاوتش إللى فوق السقف عاوز يتلزق لأنه مفكوك
2. عوامة البنزين بتعلق (مهما فولت التانك المؤشر مابيعلاش عن 3/4)
3. جهاز الإنذار (وأنا كان ليا موضوع سابق هنا عن تعديل الحساسية لكن كنت سايبة على حساسية منخفضة لأنى بوقف العربية فى الشارع وطبعا عارفين الأطفال والكورة والذى منه لكن مره كنت مسافر وحبيت أعدل الحساسية لقيت مافيش فرق بين 1 و 4) وطبعا وأنا بقوله كدة قالى ده مش جهاز إنذار أصلا ده إيموبليزر ومالوش حساسيات وكان ردى الطبيعى إن ده فى الكتالوج ولما نفذت الخطوات إتنفذت (لو هو مستوى واحد مفروض ميدخلش برمجة أصلا وميقبلش أى تعديل وميديش مؤشر بكذا عدد من الزمارات)
المهم قالى هبقى أسأل وأقولك نبتدى موضوعنا بقى وهعرضة فى شكل جدول زمنى عشان مطولش على حضراتكو علما بأن الكلام ده حصل 10 وربع
11:15 لا جديد تحت الشمس (العربية مكانها وأنا واقف فى الشمس)
11:30 إبتديت أزعق وأعمل مشكلة ياخوانا أنا حاجز ودى مش طريقة شغل جالى مهندس إسمة أحمد (راجل محترم وبيحاول يظبط بس محدش مساعدة) قالى أصلهم ماشيين بالدور ومنقدرش نتدخل وكلام من ده وطبعا أنا إتنزفزت لأن أكيد من كل دول جو9 ومينفعشا أدى كل الناس معاد 10 وأنا عارف إن المركز يوم ما يتنطط هيشيل 10-15 عربية المهم وأنا بتكلم وهو بيقولى عشان الشغل ياخد حقة رحت حاكيلة إنى طلبت منهم مرة يظبطو تقل الشنطه فى القفل عملوها صحيح بس خلوها مفارقة زى ما تكون عاملة حادثة قالى إزاى ده إحنا لازم نخليهم يظبطوها وراح جاب أمر الشغل مشكورا وزود علية تظبيط فروق الشنطة (وياريتة ما عمل كده أنا كنت راضى وساكت)
12:00 العربية محلك سر وأنا زهقت رحت مكلم واحد قريبى شغلة جنب المركز جه خدنى قعدت معاة فى المكتب شوية
1:00 رجعت المركز لقيت العربية جوه الورشة ووشها ناحية الباب من برة وقرب الباب
1:30 يا جماعة حد يشوف العربية دى واقفة ليه محدش عبرها قالولى واقفة على التجربة (ما علينا)
1:40 جه المهندس المحترم ومعاة فنى من الورشة وقالى أصلنا مستنيين السمكرى وعنده ضغط وهنبدأ نعلمك باقى الشغل على ما يخلص وطبعا مش هقولكو رد فعلى أكيد متخيلينه وتصادف ذلك مع وجود الأستاذ محمد رمضان مدير المركز إللى بدورة تدخل فى المشكلة وحاول يهدينى وجاب أمر الشغل وشاف معاد دخولى والمعاد إللى انا حاجزة وقالى معلش هنعملها دلوقتى وأنا بعتذر وكلام جميل يعنى وفضلنا نهزر ونضحك شوية على ما العربية تخرج
3:00 خرجت العربية مغيرة بوجيهات وفلاتر وزيت وشكرا (لا إتلزق الكاوتش ولا عملوا حاجة فى العوامة كنت متعمد أفولها للآخر قبل ما أدخل عشان يبان إن المؤشر مش واصل للآخر) ولا حتى فروق الشنطة إللى كانت سبب العطلة عشان السمكرى مش فاضى
3:10 وأنا خارج حبيت أدى فكرة للمهندس أحمد لقيته قاعد على الباب قلتلة أدى الشغل إللى بيتأخر عشان الذمة الزايدة عند الفنيين بتوعكوا طبعا مكنش لاقى حاجة يقولها وقلت برضه أطلع لمدير المركز قبل ما أمشى وقلتلة على إللى حصل بعت معايا مهندس تانى وقاله شوف الموضوع ده وخلصوا
3:30 دخلت العربية تانى وبعدها ب10 دقايق جابها الفنى وجه لازق الكاوتش والمهندس أحمد سأله عملت العوامة قاله محدش قالى عليها أنا قالولى إلزق الكاوتش وهاتها
3:40 إتحركت أنا والمهندس أحمد بالعربية خارج التوكيل عشان يتأكد إن التانك متفول على الآخر وفعلا دخلنا المحطة بالعافية خدت 2 لتر ودخلنا تانى المركز وقالى معلش هتصبر علينا شويه عشان الموضوع مطول
3:50 دخلت العربية المركز ورحت أنا لقريبى عشان طبعا مبقاش غيرى فى المركز
4:50 رجعت المركز لقيت المهندس أحمد خارج بالعربية والمؤشر زى ماهو وقالى معلش أصل التانك مليان على الآخر والبنزين ده كله هيروح على الأرض لو فكينها وبعدين تغيير الطرمبة والعوامة بيحتاج ييجى 3 ساعات تعالى فى يوم تانى نعملها قلتله وكان إيه الداعلى للعطلة قالى انا قلتلك هخلية يشوفها (تقريبا كان بيعرفوا عليها أو حاجة) وفهمت طبعا إنه مش لاقى حاجة يقولها وقررت أنى أعمل حاجتين وبرجاء المساعدة من حضراتكم
1. شكوى إلى جهاز حماية المستهلك وطبعا القضية مقفولة لأن أمر الشغل فى عوامة والعوامة لسه بايظة (بس حد يقولى أبدأ منين)
2. مراسلة الشركة الأم فى الصين لإنهاء هذه المسخرة وإلا تتحمل العواقب
صدقونى لو مش حاسس إنى طولت عليكم كنت حكيت باقى الموضوع بس أكيد هييجى فى المناقشات بعد كده
الخلاصة إن العربية كويسة (مش جبارة يعنى زى ما هم متخيلين) بس تغووووووووووووووووووووووو وووووووووووووووووووور من وش ده وكيل

رد: تقرير صيانة 20 ألف ومهزلة جديدة بالقطامية
 

سيدي، يمكنك ان تجعل شكوى إلى حماية المستهلك ويفعلون ما هو ضروري. ثم عليك التحقق من شكواك من وقت لآخر ولكن هذا أمر غير مقبول...
تقبل مرورى :)

رد: تقرير صيانة 20 ألف ومهزلة جديدة بالقطامية
 

أخى الكريم
أشكرك على مشاركتك ولكن ما هو الأمر الغير مقبول هل ما حدث من التوكيل أو كتابتى للموضوع؟

رد: تقرير صيانة 20 ألف ومهزلة جديدة بالقطامية
 

رد: تقرير صيانة 20 ألف ومهزلة جديدة بالقطامية
 

يا خوانا لازم نقف ضد التسيب والاهمال دة انا مش عارف فين الضمير والوكيل سمعتة بتكون زي الزفت والعربية لو كويسة تغور من وش توكيل زي دة زي مالاخ قال لية منكونش احسن من كدة وانا واللة عملت مشاركة مرة بخصوص دة هي العربية هاتموت لو اتصلحت برة وجهاز حماية متواطئ مع الناس دي هي دي مصر قبلا والان وفيما بعد عمرنا ماهنتغير ابداااااااااااااااااااااا ااااااااااللاحسن

رد: تقرير صيانة 20 ألف ومهزلة جديدة بالقطامية
 

نصيحة من اخوك لو ميهمكش الضمااان اوى اعمل عوامة البنزين عند اى كهربائى شاطر بره التوكيل والله العظيم مش هتاخد نصف ساعة ومش اكتر من 15ج الى 20ج لانها مش معضلة(ممكن يكون الذراع بتاع العوامة عايز يتنى لتحت حاجه بسيطه علشان يحس بمستوى البنزين صح) ولا محتاجة تضيع وقت منك فى التوكيل ولا حاجة وانا متاكد انه مش هيخرجك من الضمان هما يعرفوا منين اصلا ؟؟ اما بخصوص الكاوتش اللى على السقف انا ظبطه تمام التمام (بسيلكون اسود) ازاى ؟؟؟؟!

الراجل وهو بيركبلى الشبكة على العربية (تاكسى) فكه وراح حاطط على اطراف مكان تركيبه على السقف خط رفيع من السيلكون ولا كأن فى حاجة وزى الفل اكرر زى الفل واكرر مرة تانية والله العظيم زى الفل ومتخافش من حاجة ومضايقش نفسك ياسيدى ادينى حلتهالك لو لم تتمكن من حلها حتى الآن ؟؟!!!!! :balloons71:


وبالتوفيييييييييييييييييق

رد: تقرير صيانة 20 ألف ومهزلة جديدة بالقطامية
 

أستاذ هانى
أشكرك على نصيحتك ولحد إمبارح كان يهمنى الضمان وعاوز أحافظ عليه لكن بصراحة بعد إمبارح أنا قررت أتعامل مع مركز صيانة محترم لأن كده كده الضمان لم يشفع لى فى العوامة ثم أننى رأيت العجب إمبارح .. تخيل واحد قالوله هتغير تيل وطمبورة وهو عامل 55 ألف وكل صيانته فى التوكيل .. مش المفروض إن الريجا بتحصل فى الطمبورة لو التيل تآكل بشكل مبالغ فيه إذا فين المتابعة الدورية للسيارة لما تكتشف إن العربية عاوزة طمبورة وتيل مع بعض .. كل ده غير المعتقدات السائدة فى التوكيل بأن كل التوكيلات كده وواحد فنى طالع يزعق ويقولك بنعرف نزعق زيك وواحد يقولك إنت مش سلمت العربية تروح تقعد بقى و تستنى لحد ما نبعتلك .. ياراجل ده ما ينفعش يكون ورشه تكاتك