عيب لا اعرفه في بومه 2007
 

لو سمحت أنا عندي لانسر بومه 2007 اوتوماتيك 1600سي سي والعربيه بتقعد تنتش مني علي اي سرعه يعني طول منا ماشي بتعمل كده والنتش ده مش في اثناء الغيارات حتي وانا دايس دواسة البنزين علي الاخر تلاقي ال أر بي ام عمال يعلي ويوطي مع العلم اني رحت التوكيل دايموند موتورز وغيرلي فلتر بنزين ونفس العيب لسه موجود رحتله تاني قالي دي طرمبة بنزين غيرتها بره عند الميكانيكي وغيرت بوجيهات وسلوك بوجيهات وطقم سيور ،سرفيس يعني ونفس العيب موجود وبقت كمان تقطع مني بنزين وفيها لسه ربع التانك و رحت للميكانيكي تاني راح مركب لي الطرمبه القديمه تاني ونفس العيب مازال موجود "التنتيش" وكشفت عليها كمبيوتر و مظهرش حاجه يعني بجد الواحد طلع عينه مع العلم بردو ان العربيه اخرها 160 بالعافيه.

رد: عيب لا اعرفه في بومه 2007
 

بص مبدئياً ومن غير تجريب ومن كلامك بس صعب نحدد العيب بالظبط وعلشان نحلل المشكلة واحدة واحدة لازم توضح النقاط ديه

العيب ده جالك بعد حاجة معينة ؟ صيانة كام او تغيير زيت او حادثة ولا فجأة كده
والعداد بتاع العربيه عامل كام دلوقتى
بتستخدم بنزين كام
كشفت على وجود تسرب فى دورة البنزين (التانك والخراطيم للطرمبة ومنها للانجكشن ؟
كشفت على الموبينة وانت بتغير البوجيهات وسلوكها واتأكدت انها تمام ؟
طرمبة البنزين اللى جبتها انت متأكد انها اصلية ؟ لان فيه حاجات مقلدة وبيبقى ادائها ضعيف
هل التقطيع بيبقى والتانك اقل من النص او الربع ولا فاضى او مليان بتقطع برضو ؟
انت متاكد ان التنتيش ده مش مصحوب بنقل غيارات الاوتوماتيك (يعنى النتشات على نفس الغيار )
فيه اى دخان بيطلع من الشكمان ولو فيه لونة اية

الاسئله ديه للايضاح بس اكتر لكن عموماً المشكلة اللى عندك فيها احتمال
- طرمبة بنزين خاصة لو بتحصل اكتر والتانك اقرب لكونة فاضى
وممكن يكون فيه تسريب فى الخراطيم او الدورة عموماً يخلى ضغط الطرمبة مش كافى

- مشكلة حساسات - وديه يبينها الكمبيوتر

- مشكلة رشاشات - ممكن تكشف عليها وممكن تتنظف بس الفيصل فيها انها تتغير

- مشكلة موبينة ومستبعدة لانك قولت انك غيرت السلوك والبوجيهات فلو العربيه متلتة او الموبينة ضعيفه كان الميكانيكى خد باله

اخر حاجة عايز اقولهالك برضو ان كشف الكمبيوتر بيفرق من مهندس للتانى ومن جهاز للتانى فيه اجهزة مبتقراش كل الاعطال او المهندس او الفنى اللى بيشغل الجهاز مش خبرة والمشاكل اللى زى اللى عندك ديه كشف الكمبيوتر هيوفر مسافات كبيرة علينا بدل ما تقعد تفك وتركب كل حاجة

وان شاء الله وتحت امرك فى اى استفسار

رد: عيب لا اعرفه في بومه 2007
 

و الله اللى انت بتحكيه دا بالظبط كان فى عربيتى اللانوس و التوكيلات محدش عرف
طلع فى الاخر صمام البيئة ال egrv فلو اللانسر فيها الصمام دا جرب افصل خرطوم الفيكم بتاعه

رد: عيب لا اعرفه في بومه 2007
 

اخي الفاضل انا معايا نفس العربية والمشكلة غير موجودة اطلاقا ومع اصحاب ليا من وجهة نظري العربية دي اتمونت بنزين مغشوش او وسخ (فية اتربة) وهية اللى عملت كدة ذرات صغيرة جدا عملت شبة انسداد جرب تنظفها او تغيرها لان العربية دي اجمل ما فيها سحبها

رد: عيب لا اعرفه في بومه 2007
 

رد: عيب لا اعرفه في بومه 2007
 

اخى الفاضل انا معيا نفس العربية و كان عندى نفس المشكلة و عملت زى مانتا عملت لغاية اما وصلت لمكنيكى محترم قالى دى يا سلك بوجهات يا بوبينا فا جربنا و غيرنا السلك فضل الغيب هوا هوا المهم خدت بوبينة عربية واحد صحبى العربية ظبتت و الكلام دة بعد لما لفيت على تلاتة مكنيكية