|
لتجعل سيارتك تعمل بالماء.....!!!!
|
رد: لتجعل سيارتك تعمل بالماء.....!!!!
لا يوجد ما يكفى من التفاصيل عن المنتج سواء فى مشاركة حضرتك او فى الرابط
لذا يرجى شرح تفاصيل عمل المنتج وسعره والضمان وكل ما يمكن من تفاصيل بما يحقق مصلحة الاعضاء ومصلحة المعلن |
رد: لتجعل سيارتك تعمل بالماء.....!!!!
العرض غير واضح |
رد: لتجعل سيارتك تعمل بالماء.....!!!!
يا أخوانى
عايزين ناخد بالنا من وجود منتجات فى السوق و للأسف بتوزعها شركات لها سجلات تجارية و بطاقات ضريبية سليمة و لكن عبارة عن قطع حديد بتقزقز لب :waving:. أنا جالى واحد من سنه و قدملى كل الأوراق عن شركتة و فيها كمان سابقة أعمال مع شركات كبيرة و معروفة للجميع و المنتج اللى بيوزعه جهاز موفر الوقود يوفر 17% من أستهلاك الوقود صناعة تركية قيمتة 375 نقداً و هو عبارة عن قطعتين مغناطيس بهم تجويف للتركيب متقابلتين على ماسورة دخول الوقود للمحرك. طيب ... بيعمل أية المغناطيس ده يا سيدى الفاضل قال دة بيوفر فى أستهلاك الوقود. كيف يحدث هذا؟ فقال بيعمل ترتيب للأيونات بتاعة الوقود. طيب و لما يعمل ترتيب للأيونات بيوفر أزاى؟ فقال لما الأيونات بتترتب بيبقى سهل حرقها و سيادتك خبرة و فاهم طبعاً. فعرفت أنة بيلبسنى العمة....و كان عايز يعنى يبيع لى من المغناطيس دة بواقع 4 قطع للسيارات الديزل (قطعة لكل سلندر) و قطعة واحدة للعربيات البنزين تركب كما زكرت سابقاً .... فقلت له أنا و لا خبرة و لا فاهم لكن أنا هأخد منك واحدة عينة و أنت بنفسك تركبها فى عربيتى و أمشى بيها مدة شهر كامل و يا أما بعدها تيجى تاخدها زى ما ركبتها أو تيجى تعمل معانا أتفاق على شراء باقى القطع. و عمل أختبار للسيارة طوال شهر علشان أشوف التوفير قد أية ما لقيتش لا توفير و لا حاجة و هو ما شفتش وشة من ساعتها تانى و المغناطيس راكب فى مكانة زى ما هو. المذهل فعلاً أنى لما راجعت الشركات المذكورة فى سابقة أعماله وجدتهم فعلاً وقعوا فى الفخ و ما بحسبوش أى حاجة لكن التوفير بالنسبه لهم تهيئة نفسية. و أشياء أخرى أعدها منها:- * واحد جالى عرض عليا صمام خانق للوقود علشان تحديد السرعة على السواقين علشان ما يجروش بالعربيات ... طيب ما هى الخاصية دى موجود فى المحركات الديزل أصلاً. قال طيب أية رأيك أن الجهاز ده معتمد فى المرور و بعد كام شهر ما فيش عربية هترخص من غير ما تكون مركبة الجهاز ده بالتحديد ..... قلتلة هاتلى الورق اللى يدل على كدة و لما الحكومة تمنع الترخيص نبقى نناديلك ..... قال بعد كده هيبقى أغلى من دلوقت ....قلتله محدش مغسل و ضامن جنة. * أضافات لزيت المحرك تخليك ما تغيرهوش أبداً * فلاتر للوقود و الزيت تنقية عالية الجودة و غيرهم كثيرين يا أخى الفاضل ناشر الموضوع هل نحن نجد ماء نقياً نشربة حتى نجدة للأستعمال كوقود هل تتخيل ما هو الوضع الأقتصادى للماء حين يصبح وقوداً حينها لن تسمح الحكومة لأحد بأن يقترب من النيل أصلاً و لا من البحار. هذا الكلام غير منطقى يا أخى تقبل رأيى و مرورى تحياتى |
رد: لتجعل سيارتك تعمل بالماء.....!!!!
الاخ auto5truck
واضح ان ليك تاريخ مع المنتجات الغير فعالة او بمعنى اصح ليك تاريخ مع النصب و طبعا ده يديك كل الحق انك تشك في اي شيء يتعرض عليك و انك تحذر من حاجة غلط انت جربتها انما انك تاخد قرارك الداخلي بأن كل شيء جديد هيكون برضة نصب و تبتدي تتكلم على ان الموضوع مش صحيح و تقنع الناس كمان بكده فده كتير اسمحلي يعني حضرتك لو كنت اخدت الوقت تقرى الوصف للمنتج هتلاقى الماء المطلوب لعمل الجهازاي ماء متوفر بمعنى ان ماء البحر زي ما هو كده ممكن تستعمله بل بالعكس هيدي نتايج افضل بكتير... لو فيه اي ماء معاد استخدامه زي الماء المستخدم في الاعمال المنزلية او الماء المعاد استخدامه من نواتج العمليات الصناعية ايضا ممكن تستخدمه و اذا كان الهدف الاساسي من المنتج انه يوفر على الناس فلوس و تلوث تفتكر هنوفر في الفلوس و البترول و ناخد الميه اللي هي حياة البني ادمين؟ و بعدين البترول هيخلص هيخلص... و الكلام ده مش من عندي... احنا بالفعل في نطاق الاستهلاك الجائر و ده موضوع معروف عالميا لأننا وصلنا لأقصى قيمة انتاج عالمي سنة 2000 و بالتالي احنا في المنحنى النازل للأنتاج و للأحتياطي العالمي البترول هو سبب معظم الاعتداءات و الحروب على عالمنا العربي نظرا لأهميته في الحياة العصرية و الحضارة الغربية... انما الماء اللي حضرتك بتتكلم على مشاكله احنا عندنا في الوطن العربي بحار و منافذ على محيطات و خلجان ده غير عيون المياه الطبيعية المالحة... و ده هيحررنا كتيييييييير من مشاكل احنا في غنى عنها و نفضى بقى علشان نبص لبكرة و نشوف احنا متأخرين ليه و بالنسبة للمنتج ده فهو مش اختراع غير مثبت... دي تكنولوجيا مثبتة علميا من القرن الماضي... و هناك عدة منتجات مطروحة مشابهة على الانترنت من دول مختلفة من اول امريكا لحد الصين... و زي ما هو مذكور في وصف المنتج انه حاصل على المركز الاول في مسابقة صنع في مصر و دي لجنتها دكاترة جامعة و رجال صناعة و الهدف الاساسي من الاستفتاء اننا نشوف هل المنتج ليه مكان في السوق بتاعنا؟ ليه احتياج؟ و المبلغ اللي الناس مستعدة تدفعه في مقابله ايه؟ و دي دراسة للسوق مش عرض فعلى للمنتج... يعني الاسئلة بتقول انت متوقع؟ مستعد؟ مش بتقولك خش و جرب يا حضرت يمنع الكحة و يقوي الصحة يروق الدم و يعطر الفم الموضوع مافيهوش شيء يزعل... مرورك نورنا و اتمنى اكون وضحت الصورة شوية |
رد: لتجعل سيارتك تعمل بالماء.....!!!!
اخواني الكرام
المنتج في طور دراسة السوق قبل طرحه فعليا و بالتالي التفاصيل الفعلية للسعر و الضمان غير محددة الهدف من هذا الموضوع و الاستفتاء المرفق ليس اعلان عن منتج في السوق ... ليس عرض بيع... و انما هو نوع من مسح مبدئي للسوق لمعرفة مدى استعداده لأستقبال هذا المنتج و ايه هي المميزات الاكثر جذبا لأهتمام المستهلك لأن النقط دي في غاية الاهمية معرفتها قبل نزول المنتج للسوق حتى يقدم للمستهلك افضل خدمة بأنسب سعر و كفاءة المضوع بمنتهى البساطة ان فيه منتجات اثبتت فعاليتها و كفاءتها العلمية انما السوق العربي مش محتاجلها او مستعدلها لسه و احنا مش عايزين نقع في المشكلة دي و في النهاية هناك توضيح اخير... هذا الاستفتاء مساعدة منكم لينا علشان نقدر ننزل بالمنتج في اسرع وقت مما يعود بالفايدة عليكم بردو كمستهلكين من سمات التقدم ان المستهلك هو اللي بيحدد ايه اللي محتاجة و ايه اللي مش محتاجه.... و لأننا فاهمين ده كويس فقررنا نبتدي شوية بعكس ما هو متعارف عليه في مجتمعاتنا ... نستكشف احتياج المستهلك قبل ما ننزل السوق لنفيد و نستفيد |
رد: لتجعل سيارتك تعمل بالماء.....!!!!
اقتباس:
أحب أوضحلك صورة أخرى التاريخ مع المنتجات الغير فعالة أو النصب زى ما حضرتك ذكرت ده نابع من كونى مهندس متخصص فى صيانة السيارات و أعمل كمدير فنى لصيانة أسطول سيارات لأحدى الشركات ذات الأسم الجيد فى مصر و ده بيتيح الفرصة لأى واحد عنده بضاعة متعلقة بالشغل بتاعنا أنه يجيلى و يعرضها على و بالتالى بتدينى الفرصة للتعرف على حاجات كتير منها الصالح و منها لا. الشك ده مش نابع من التجارب فقط و لكن مبنى على علم و خبرة. أنا لم أتخذ قرار بأقناع الناس أو أو عدم أقناعهم أنا قلت رأيى فقط و شرحت تجاربى و على من يقرأ كلامى أن يزنة بعقلة. النقطة الأخيرة اللى عايز سيادتك توضحها لى فعلا كيف يتحول الماء لوقود؟ شكراً لسعة صدرك |
| الساعة الآن 09:04 PM. |
Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017