المشاركة الأصلية كتبت بواسطة gadix (المشاركة 236154)

كنت في جنوب افريقيا السنة الي فاتت ايام كاس العالم للقارات
طبعا كمسلم في بلد غير مسلم لاززم اتأكد ان الاكل حلال
المهم اول 3 ايام بقيت اكل في اي مطعم و هاتك يا اكل و قبل ما اكل اسألهم ده فيه خنزير؟
يقولولي لأ اقوم اكل بكل اصرار و انا من النوع الي يحب الاكل بصراحة
المهم تالت يوم و انا ماسك طبق فراخ بفترسه بحط الاكل في بقي و افتكرت حاجة
يادي النيلة انا كل مرة اسأل هوا ده فيه خنزير و لا لأ و ناسي خالص اني لازم اسأل هوا مدبوح حلال و لا لأ
يعني بقالي 3 ايام باكل لحم فطيس و انا مش واخد بالي

المشاركة الأصلية كتبت بواسطة gadix (المشاركة 236157)

انا بحب الاكل الهندي جدا و اول مرة اجرب الاكل الهندي كان في دبي
كنت شغال في بنك الامارات الوطني و اتعرفت علي جماعة هنود و ضربت معاهم صحابية
و هم كانوا مبسوطين اوي لاني كنت بتعامل مهم ببساطة لان للاسف كتير من الخليجيين بيعاملوهم مش كويس
المهم اخدوني مطعم هندي و كان مطعم صغير قوي و فقير جدا شبه المطاعم الملوثة بتاعتنا
دخلت المطعم كان كله هنود و بيبصولي بارتياب شديد
طلبنا رز و فراخ
انا اعرف ان الفراخ لونها ابيض و كانت اول مرة اشوف فراخ لونها احمر من كتر الشطة هم غالبا مش بيدبحوا الفراخ هما بيجيبوا الفراخ صايحة و يرموها في الشطة و لما تموت ياكلوها
المهم ال 3 هنود الي معايا طلبوا ايه؟ كلهم طلبوا رز و زبادي
انا مفهمتش بصراحة ايه علاقة الرز بالزبادي
الرز وصل و راحوا فاتحين علب الزبادي و راحوا دالقينها علي الرز
انا طبعا توقفت عشان اتابع المشهد الرهيب ده
بدأو يعجنوا الزبادي مع الرز بايديهم واحد منهم داق الرز لاقاه ناقص ملح راح دالق شوية ملح عالزبادي و الرز شوية و راح داقه تاني و يظهر لاقاه ناشف شوية فراح مادد ايده في كوباية المية و اخد شوية مية سقسقها عالرز و قعد يقلب و ياكل بايده
طبعا انا في المطعم الهندي ده كنت اضحوكة لاني اول ما بدأت طلبت من معلقة و كانت معضلة و فضلوا يدوروا لحد مالقوا معلقة و غالبا انا الزبون الوحيد في تاريخ هذا الممطعم الي طلب معلقة
بدأت اكل الفرخة و لسة مع اول لقمة الشطة بهدلتني و دخلت في حالة كحة هستيرية و بعد 5 دقايق فقت منها و لقيت المطعم كله بيضحك عليا لاني لحد مابدأت اكل الفرخة كنت فاكر ان اللون الاحمر ده صلصة و عمري ما تخيلت انه ممكن يكون شطة

المشاركة الأصلية كتبت بواسطة sad-bird (المشاركة 236270)

من ضمن حرقة الدم دي
انا كنت رايح دورة تدريبية في الرياض
وقدمت على تأشيرة ليها
وطلعت عيني علشان اخدها وفي الاخر كان باقي على الدورة يومين ولسه مطلعشتش قلتلهم خلهولهاكم وقفلت في دماغي خلاص ( يظهر ان فيه عرق صعيدي في العيلة عندنا )
بعد الموضوع ده ما حصل باسبوع
ناس معرفة سعوديين بيكلموني وعاوزين يعملوا تأشيرة وينزلوا مصر قلتلهم والله مش عارف الظروف ايه انتو روحوا السفارة وشوفي الاجراءات ايه هناك لكن معتقدش انكو هتنزلوا في الميعاد اللي محددينه لان الموضوع هياخد وقت وله عقد وكلاكيع كتييييييييييييييييييييييي ييير
بعدها ب3 ايام
لقتيهم بيتصلوا احنا اخدنا التأشيرة وحجزنا على مصر للطيران في رحلة كذا الساعه كذا وان شاء الله نتقابل في القاهرة
اخدت الخبر وانا منتح ومخنوق وقرفان
حتى لو روحت قابلتهم وقعدت معاهم حصل موقف ابقى اقولكم عليه بعدين كنت همسكه اضربه في الموقف ده

المشاركة الأصلية كتبت بواسطة gadix (المشاركة 236501)

ده مش موقف محدد بس تحذير للناس الي بتسافر
كذا مرة ابقي راجع من دول عربية بذات و طبعا عشان السفر بتاعي بيبقي اسبوع او اتنين بالكتير اوي بيبقي معايا شنطة سفر واحدة
الاقي حد من حبايبنا المصريين الي واقفين في طابور ال check in يجيلي
- ازيك يا باشا؟
- اهلا؟
- هوا حضرتك معاك شنط تانية غير دي؟
- لا و الله مش معايا
- طيب بعد اذن سيادتك و ربناا يخليلك الاولاد و وووو ممكن تاخد شنطتي معاك عشان معايا وزن زيادة؟

فعلا بيبقي ناس مصريين من الي بيشتغلوا في الدول العربية اي شغلانة و السلام و فعلا بيبيقي واخد حاجات كتير و مش عاوز يدفع وزن زيادة
بس طبعا التصرف الحكيم الوحيد في الموضوع ده انك ترفض مهما صعب عليك و سواء كان راجل او اوحدة ست
لان ممكن يبقي الشنطة فيها بلاوي سودة توديك ورا الشمس و الواحد شبهة لوحده اصلا و بيدخل البلد بالعافية
يبقي ارهاب و مخدرات كمان؟
المرة الوحيدة الي اخدت حاجة من حد في المطار كان واحد حاجز تذكرة طيران لبنته و عاوز حد نازل مصر يوديهالها فاخدتها منه و طبعا ده بدافع من انسانيتي و مش عاوز اي حد يقول عشان دي بنت

المشاركة الأصلية كتبت بواسطة gadix (المشاركة 236622)

فكرتني بالجفاضع (ضفادع) و انا في كلية الزراعة في شبرا كنا بنشتري الضفدعة ب 5 جنيه عشان نشرحها و لازم الضفادع تبقي صاحية
المهم في يوم اشتريت ضفدعتين و ركبت القطار من شبرا للقناطر (البلد بتاعتي) لان القطار كان ارخم وصيلة مواصلات و مواعيده مضمونة لان المواصلات من القاهرة الي كوكب المريخ اسهل بالاف المرات من المواصلات من القاهرة الي الي القناطر او المنوفية مثلا
المهم حطيت الضفدعتين في كيس و ركبت القطار و بصراحة من الكلية للقطار كانوا محترمين و هاديين و لما بدأ القطار يتحرك و مع الزحمة و الحر الضفادع بدأت السيمفونية بتاعتها و هاتك يا نقيييق
كنت انا واقف و جنبي واحدة ست قاعدة علي الارض و تبص علي الكيس و تشوف الضفادع و ترفع راسها تبصلي بنظرة تحمل كل معاني الدهشة و الاستغراب و انا ابصلها و انا في نص هدومي
الضفادع تعزف و الناس تبصلي و انا ميت في جلدي من الكسوف
يا جماعة انا طالب في كلية زراعة و بنشرح الضفادع
و لا الهوا
الناس مقتنعة تمام الاقتناع ان اننا عيل اهبل

المشاركة الأصلية كتبت بواسطة مهند سالم (المشاركة 237766)

خلاص يبقى نلغي قسم الاستراحة وننتهي، ولا لما ييجي موضوع رايق وظريف وعاجبنا حتى ولو كان بعيد كل البعد عن السيارات نتركه، ولما ييجي موضوع...... ننادي بالحذف...... طبعا لأنه ما لوش علاقة بالسيارات.
أنا أعتقد إن حجم المواضيع إلا مالهاش علاقة بالسيارات في المنتدى لا يقل عن 40 في المائة.
الموضوع ده فكرني بزميل في المنتدى مرة عمل موضوع كان واقف فيه مع البرداعي، فتم حذف الموضوع على أساس إننا منتدى سيارات وما لناش دعوة بالكلام ده، أما لما عضو بارز عمل موضوع كبير انتقد فيه البرادعي وبشدة تم ترك الموضوع دون أن ينبس أحد ببنت شفة.
وأنا على فكرة لا مع ولا ضد، ولكن عايزين نشوف العدل والإنصاف بق في حياتنا، في أي حاجة في حياتنا، مش هيبقى حتى النت إلا الناس بتفرج فيه عن نفسها شوية برده هيدخله الظلم والكيل بمكيالين، وشكرا للجميع