المشاركة الأصلية كتبت بواسطة gadix (المشاركة 236145)

مرة و انا راجع برضو كنت راكب جنب راجل و مراته من اسكتلندا قعدنا ندردش و الكلام جاب بعضه فسألوني "هي مصر لازم لها فيزا عشان ندخلها؟" انا نزل علي السؤال كالصاعقة و في ثواني استرجعت مدي صعوبة استخراج الفيزا عشان اسافر اي بلد و استرجعت تجاربي المريرة في دخول مصر و الكشف علي الجواز كل مرة اجي ادخل بلدي!!! و قلت في سري الناس دي عبيطة و لا ايه؟ حد يسافر بلد من غير ما يسأل علي تأشيرتها؟ و قلت بس انتوا هتتظبطوا
المهم وصلنا ارض الوطن الغالي سالمين و وقفت في طابور الجوازات و شفت صحابنا راحوا للبيه الظابط يسالوه و في اقل من 10 دقائق كانوا برة و انا استخبيت عشان مايشوفنيش و انا واقف في طابور امن الدولة جوة

المشاركة الأصلية كتبت بواسطة gadix (المشاركة 236150)

في 2007 رحت البحرين و كانت برضوا اسبوعين و كان ليا ترانزيت في دبي و دي كانت تاني مرة اسافر و مكنش عندي خبرة كافية
المهم في مطار القاهرة الموظفة بتاعت ال check in سألتني انت عندك ترانزيت في دبي تحب تاخد الشنط في دبي و لا البحرين؟ انا طبعا استعملت ذكائي و قلت لها دبي طبعا و كان في نيتي اني اخد اي حاجة من الشنطة اسلي نفسي بيها في ال 4 ساعات ترانزيت
طبعا انا مش معايا تاشيرة للامارات وو صلت دبي و اكتشفت اني عشان اخد الشنط لازم ادخل صالة المطار و لازم يكون معاايا تأشيرة
قلت بس الشنط راحت و بقيت اضرب اخماس في اسداس و مش عارف اعمل ايه
سألت بتوع الامن قالي روح لشركة الطيران و اعمل بلاغ معرفش فين عشان الشنط يودوها البحرين
رحت لموظف الشركة
يا أستاذ انا حصل معاياا كذا كذا و عايزك تساعدني
هوا كان بيكلم بنت بصراحة صاروخ و كانت الي لابساه اقل بكتير من الي قالعاه و الراجل كان متنح لها بطريقة عجيبة
فالراجل مبصش في وشي اصلا و فضلت 10 دقايق واقف اكلمه و هوا و لا هنا
المهم عشان يزحلقني خد البيانات و قالي نص ساعة و اشنط بتاعتك تبقي في الطيارة
و انا زي الاهبل صدقته و كانت النتيجة اني استلمت الشنط بعد ما وصلت البحرين ب 3 أيام

المشاركة الأصلية كتبت بواسطة gadix (المشاركة 236133)

المشاركة الأصلية كتبت بواسطة gadix (المشاركة 236152)

سافرت مرة السعودية و كان موسم اجازات و الطيارات الي رايحة مصر كلها محجوزة وحصل مشاكل في الشغل و اضطريت أأجل السفر لمصر المهم كان خلاص الفيزا بتاعتي هتخلص ورحت شركة مصر للطيران في الرياض عشان اغير حجز الطيارة
بصراحة انا اتصدمت من معاملة الموظفين الزبالة ليا و قلة ذوقهم و رفضهم اني اغير المعاد علي الرغم اني وريتهم ان التأشيرة بتاعتي خلصت خلاص و فاضلها كام يوم و اني مستعد ادفع اي فلوس فرق في التذكرة
للحظ انا ساعتها كنت بشتغل لهيئة الطيران المدني في السعودية و حكيت لهم القصة فواحد سعودي ليه قريب شغال في مصر للطيران راح متصل بيه عشان يغيرلي التذكرة
يعني اجيب واسطة من واحد سعودي عشان يمشيلي حاجة في شركة مصرية!!!!

المشاركة الأصلية كتبت بواسطة gadix (المشاركة 236154)

كنت في جنوب افريقيا السنة الي فاتت ايام كاس العالم للقارات
طبعا كمسلم في بلد غير مسلم لاززم اتأكد ان الاكل حلال
المهم اول 3 ايام بقيت اكل في اي مطعم و هاتك يا اكل و قبل ما اكل اسألهم ده فيه خنزير؟
يقولولي لأ اقوم اكل بكل اصرار و انا من النوع الي يحب الاكل بصراحة
المهم تالت يوم و انا ماسك طبق فراخ بفترسه بحط الاكل في بقي و افتكرت حاجة
يادي النيلة انا كل مرة اسأل هوا ده فيه خنزير و لا لأ و ناسي خالص اني لازم اسأل هوا مدبوح حلال و لا لأ
يعني بقالي 3 ايام باكل لحم فطيس و انا مش واخد بالي