مصر موتورز مجتمع السيارات - نوبيرا ولا لانوس ولا فيرنا

اقتباس:

المشاركة الأصلية كتبت بواسطة HITLER_MO2 (المشاركة 147235)

شوف انا هقولك حاجة مهمة جدا جدا
أنا بقالي حوالي 4 شهور عمال بعمل مقارنات بين العربيات اللي في السوق كلها عشان ناوي باذن الله اشتري عربية بس لسة بدري اوي وهفضل ورا الاخبار لغاية لحظة الشراء

وأحب أحييك على فكرة انك تجيب زيرو عشان المستعمل اللي في السوق كله خيش وقش .... خلاص زمن استعمال الطبيب بتاع والدي ووالدك انتهى كل واحد النهاردة بيعامل عربيته زي مايكون مأجرها وبينتقم من صاحب المعرض... ياراجل ده ماحدش بقى يسخن عربيته قبل ما يتحرك زي زمان
المهم

طول الفترة اللي فاتت وانا كنت بتنقل بالتاكسي الجديد عشان احاول اجمع اكبر عدد من المعلومات عن كل العربيات اللي في رينج أواخر الستين ألف جنية
أول حاجة اتضح لي ان الرينو اللوجان الرفارف بتاعتها مش فايبر زي ما الناس كانت بتقول الرفارف صاج زي اي عربية واللي مش مصدق يتدنجل لحد المصرية للسيارات او اي معرض ويخبط على الرفرف ويسمع والكراسي بتاعتها مريحة جدا والصالون بتاعها كأنك قاعد في الفوتيه في البيت والشنطة بتاعتها تنفع بسين صغير للأطفال من وسعها بس عيبها انها تفتقر للمسات الجمالية في الفنيش بتاعاها يعني عربية متجمعة كويس وخلاصده غير اني لاحظت ان الفوانيس بتاعتها مابتوزعش النور كويس قدام العربية يعني عملوا المهم ووقعت منهم حاجات هايفة

تاني حاجة (الاسبرانزا) العربية دي واسعة جدااااااااا والكنبة اللي ورا ممكن 3 يقعدوا مرتاحين جدا حتى لو أحجامهم كبيرة وفيها كل الاوبشن اللي اللي تتخيله بس الكاملة منها دلوقتي بنفس سعر الفيرنا الكاملة يعني ب68000 جنية بس اللي انا شايفه ان مافيش حد عمر مع العربية وعاشرها سنتين على بعض كللو بياخد خيرها ويتفها زي اللبانه بالظبط بس انا عن نفسي لو هجيب مش هيبقى صيني
(بالمناسبة مشترك الكهرباء بتاع الكمبيوتر عندي باظ جيت افكو عشان اصلحه لاقيته ببرشام مش بمسامير .... أتاريه صيني هههههههه)

بالنسبة بقى للنوبيرا ابصملها بالعشرة انها عربية واسعة وأدائها كويس الى حد ما بس للاسف بدئت تندثر وقطع غيارها بدأت تقل فعلا فأنا ماانصحكش بعربية هيا وحاجتها بيشحوا من السوق ده غير ان صاجها أضعف صاج عرفه السوق المصري من الآخر عربية ورق وخسارة فيها ال80000 جنية مين عارف!!! بكرة تخش بيها على سمكري يقولك بطلت اشتغل في النوبيرا زي مااغلبهم بطلوا يسمكروا الفيات

اما بالنسبة للفيرنا فهي وبدون مبالغة كل يوم بتكبر في نظري اكتر العربية دي فعلا أثبتت وجودها في أفل من 5 سنين وبقت في اعادة البيع راسها براس اللانسر يعني حتى اذا حبيت تغيرها في المستقبل هتجيبلك مبلغ محترم تتسند علية مش هتتفاجئ انك لبست في شجرة زي الباقي وعلى فكرة انا كنت مع صاحب فيرنا النهاردة لسة مستلم عربيته من أسبوعين وسألته عن هل فعلا الفيرنا بتنزل بعيوب في الصناعة والميكانيكا والعيوب دي بتتصلح مجانا ساعة الصيانة الدورية اللي في الضمان قاللي ولا الهوا والكلام اللي بيتقال دة كللو فساكونيا وكان لسة طاير بيها على الدائري على سرعة 120كم ومش مجنط كمان انا برضو كنت مستغرب ازاي عربية زيرو يبقى فيها الهبل ده... ممكن في الموديلات الأولانية كانت بتعوم شوية بس دلوقتي خلاص في فيرنا ستار الجديدة ركبوا لها عفشة ماكفرسون وبقت فل الفل*

أما بقى اللانوس فدي عربية أقل ما يقال عليها انها مسلة مش خابور وبس
اولا كنت راكبها الكرسي بتاعها مش مريح وحاسس اني قاعد على قصرية وثانيا اقل من الفيرنا ب100 سي سي واغلى منها ب2000 جنية والكنبة اللي ورا ماتنفعش حتى دكة لبواب صغيرة واذا خدت راكبين يبقى فل عليها اوي وواطية زي مايكون قاعدين على الاسفلت ... مالقيتش فيها حاجة مميزة اشهدلها بيها وفي رأيي الشخصي الكيا البيكانتو ال1100 سي سي برقبتها

رأيي الشخصي وليس نصيحة شخصية
لو كنت في مكانك هتوكل على الله وهجيب فيرنا ستار الجديدة جميع الكماليات سعرها 70000 بالظبط وعليها سبويلر شياكة وعفشة ماكفرسون

وفي النهاية رأيي الشخصي
(الفيرنا ستار الجديدة لو كانوا حطولها اير باج كانت ضربت النيو أكسنت)

والله ياهتلر موتنى من الضحك ياراجل من اسلوبك اللذيذ فى السرد
وكلامك منطقى جدا فى اللى قلته