المشاركة الأصلية كتبت بواسطة abosharbat (المشاركة 45377) اعوذ بالله من الشيطان الرجيم لا تسوق وراء ست ولا ميكروباص يودى فى 100000 داهية وبالذات الستات يا جماعة انا مرة شفت واحدة بتسوق وبترضع ابنها وهى سايقة ولا هى هنا

السلام عليكم ورحمة الله وبركاته
انا كنت داخله اقرا الموضوع بحياديه بحته
ولكن لقيت رايكم زى اى راجل فى اى مجتمع شرقى يرى انه الافضل وان المراه مخلوق اخر مش من حقها انها تسوق ومهاترات اخرى بصراحه ضايقتنى
ومن هنا انادى جمعيات حقوق المراه بحذر الموقع (الجمله ديه هزار طبعا)
نتكلم بموضوعيه شويه احنا نحسب الرجاله بتسوق من امتى والستات من امتى واحنا نعرف فرق الخبره
يعنى مثلا هتلاقى الولد واخد مفاتيح العربيه بتاعة والده ونزل يسخنها وطلع بيها كام مره ومن سن كام اخذ مفتاح العربيه وسمح له بقيادتها وكام مره اخد المفاتيح من ورا والده وساق العربيه
وطبعا الكلام السابق ده لا ينطبق على النساء عمرك شفت واحد اعطى بنته المفتاح علشان تسخنله العربيه مثلا عمرك شفت واحده اخدت مفتاح عربيه والدها وساقتها مثلا
ده غير ان موضوع سواقة السيدات كان مستهجن فى المجتمعات الشرقيه حتى وقت قريب وفيه دول مثل السعوديه لا تزال لا تسمح بقيادة المراه

نقطه تانيه السيدات سواقتهم مش حلوه طيب شوفها اتعلمت من امتى والنقطه التانيه ان فيه برده رجاله سواقتها تنرفز اخر حاجه
وبعدين الموضوع واضح جدا فى السيدات لان عدد السيدات الى بيسوقوا قليل فلما واحده بتغلط بتلاقى الموضوع تحت الميكروسكوب
اما عن الاشارات فحدثت معى كثيرا ان ارى السائق (وهو رجل) فى العربيه التى امامى يعطى اشاره يمين او شمال ويأتى بعكسها والخطأ وارد من الجنسين فالخطأ ليس حكر المرأه بس زى ما قلت احنا فى مجتمع شرقى يغفر للرجل ما لا يغفره للمرأه وبعدين اى حد ممكن يبحث عن تقارير الحوادث ويقلنا معدل حوادث المرور اكثر من الرجال ولا من النساء

حاجه كمان يا ريت نفكر فيها علشان نصدر حكم سليم الافضل ان الست تسوق سيارتها الخاصه ولا تركب المواصلات العامه زى الاتوبيس والميكروباص وتتعرض للمضايقات اليوميه والتى اقلها ازدحامها مع الرجال للركوب وطبعا اعلاها التحرش التى تعانى منه داخل وسيلة المواصلات وتقدر تتأكد لما تسأل اى فتاه بتركب مواصلات مهما كان شكلها او سنها او حتى لبسها وذلك لتغير اخلاقيات المجتمع واختفاء معانى الرجوله بعد 73
حد هيقولى تركب تاكسى بس التاكسيات مش متاحه دائما عندما تحتاجها ده غير استغلال سائقى التاكسيات فى احيان كثيره ومش كل ست هتقدر تركب تاكسى فى ذهابها لعملها وقضائها لاحتياجات بيتها
ده غير طبعا انك ممكن تركب مع سواق تاكسى مدخن او حتى الركاب داخل الميكروباص ولو اعترض اقل حاجه لو مش عاجبك انزلى وبتكون مضطر تسمع كل انواع الموسيقى الهابطه داخل الميكروباص
اقول تانى ولا كفايه