رد: رحلة الى الصين
 

(9)

الفقره دى لأنسات و سيدات المنتدى :

تانى يوم رحت المعرض من الصباح و فى اذنى التعليمات الحكوميه : كل كويس – البس تقيل لو برد – الهدايا .

طبعا بالنسبة للأكل عملت ساندويتشات من التموين اللى معايا و اللبس لبست اللى قدامى قلت مش باقى غير الهدايا لفيت على المنتجات اليدويه من تابلوهات سيرما و مصنوعات جلديه فيه حاجات جميله جدا و حاجات متوسطه بس الأسعار كانت نار بالنسبه للحاجات القيمه ثم توجهت الى حيث مكان تجارة اللؤلؤ و هناك قضيت اليوم.

اصناف و اشكال و انواع و الوان و احجام و اجمل نوع عجبنى هو اللؤلؤ الوردى و اغلاه اللؤلؤ الأسود و الأوروبيين ( السيدات طبعا ) نازلين شراء و بصراحه انا اشتريت معاهم بس مش زيهم و على فكره الفصال هناك يتم بالنسبة المئويه فمثلا تسأل عن سعر حاجه و بعدين تقوله او تقولها و اغلب العاملين فى اللؤلؤ من النساء و الحوار يدور هكذا :
هاتدينى خصم كام
تقول 5 %
تقولها 15 %
تحسبها على الآله و بعدين تقولك لأ 10 % عادل

فتقولها اوكى و يمشوا فى دقيقه و نص والأوروبيين الشطار ياخدوا 12 % و يقولك شوفت الشطاره انا أصلى شاطر فى الفصال . أما ابن النيل فبعد ما فهم الفوله فكنت اقولهم دى بكام تقولك مثلا 10 طب و دى بكام تقولك 15 تقول مثلا طيب هاخدهم الأتنين ب 17.5 تبصلك ببلاهة و فى عينيها سؤال طيب احسبها ازاى لدرجة واحده فى محل بعد ما خلصت شرا من عندها جابت كرسى و قعدتنى و قالت : علمنى و بعدين اديتنى عقد هديه من اجمل الأنواع . بس لو حد راح هناك ما يروحلهاش لحسن هاتقوله قديمه يا مصرى.

الحكومه كمان كانت طالبه مرجان وده دخت عليه و مالقيتش غير مكان واحد بس كان عنده حاجات روعه و ده ماكانش عنده فصال لكن بعد ما اشتريت منه اعطانى هديه لطيفه .

كمان الأحجار الكريمه موجوده هناك بأنواع و تشكيلات غايه فى الجمال و الأناقه و اسعارها معقوله و الألوان بتاعتها خرافيه و اشتريت من عندهم بصراحه حاجات كويسه ( عرفت من واحد جواهرجى لما رجعت ) بأسعار اكثر من ممتازه و بيعملوا الأحجار دى هناك غوايش و حلقان و تعليقات فى السلاسل الذهبيه و خواتم طبعا.

هناك طبعا محلات تبيع للزوار و أخرى للكميات التجاريه لكن فى المشغولات اليدويه و المجوهرات الكل بيعمل فى النوعين.

الصينيات بشكل عام خجولات و مؤدبات جدا و يضعن مساحيق التجميل كالغربيات و يلبسن الأزياء الغربيه و معظم مجوهراتهن من الأحجار الكريمه و لم أر محلات تبيع الماس أو الذهب و هناك محلات كوافير أى ان صورة الصين تغيرت تماما بعد رحيل ماوتسى تونج و انتهاء عصر الثوره الثقافيه .


يتبع ....

رد: رحلة الى الصين
 

رد: رحلة الى الصين
 

حضرتك خد راحتك و قص ما تشاء

هى خبرات نستفيد منها جميعا

رد: رحلة الى الصين
 

(10)



رجعت الأوتيل و غيرت و سألت هل فيه سمك فى مطعم الأوتيل فأجابوا بالنفى فقلت لنفسى لازم ادور على مطعم اسماك يكون محترم . المهم نزلت فى الريسبشن و سألت و اعطونى عنوان مكان و رحت هناك .

فى مدخل المطعم على اليمين وجدت حوض زجاجى كبييييييييييييييير و جدت به انواع كثيره من الأسماك و جمبرى معتبر و حاجه عظمه المفروض انى اختار منهم و ادخل المطعم و ألتهم قلت فى نفسى فرجت و كنت أظنها لا تفرج . المهم باضرب بعينى فى الناحيه التانيه لقيت اقفاص كده فقلت اروح اشوف فيها ايه . لقيت اشى بط بكينى على فراخ على حمام على ………. ايه ده .

قربت من القفص شويه لقيت حاجه عجيبه . حيوان كده طوله حوالى 50 سم واقف و راسه طولها حوالى 10 سم و وجهه يشبه الخفاش و بينظر لى نظره حزينه جدا ناديت لأحد الجرسونات و سألته بلغة الأشاره عن هذا الحيوان فأجاب بما معناه انه يذبح و يسلخ .

بصراحه منظر الحيوان المسكن ده صعب عليا. بالمناسبه كان فيه جنبه اقفاص زجاجيه بها تعابين . و الله العظيم تعابين حقيقيه ضخمه مش تعابين سمك. قررت الرجوع للأوتيل و الأكل من التموين .

تانى يوم اتصل بى صديقى الصينى و ادانى موعد يجيلى الأوتيل فقررت آخد جوله حره حتى الموعد . نزلت الريسبشن و سألت عن موقع خطوط سنغافوره و اخذت من هناك مجله تتكلم عن الصين و كان فيها موضوع عن هونج كونج فقلت ليه لأ . المهم خدت تاكسى و رحت لشركة الطيران علشان اطلب اكل نباتى و أاكد الحجز و هناك سألتهم كيف اذهب لهونج كونج فارسلونى لشركة اتوبيسات فى نفس العماره حيث حجزت بعدها بيومين لهونج كونج و حاولت اغير تذكرة العوده من هونج كونج للقاهره فوجدت انى هادفع مبلغ حوالى 3000 جنيه اضافى فقلت لأ أرجع لجونج زو تانى و اركب من هنا و الغريب اعمى ولو كان بصيرا .


التاكسى هناك لونه احمر و السقف ابيض و طبعا فيه عداد شغال و التاكسى مش غال يعنى مشوار يساوى من رمسيس للعباسيه مثلا حولى 10 جنيه و من رمسيس للمطار حوالى 20 جنيه لأن بدايته كبيره ( فى فرنسا مثلا دفعت من فرساى لمنطقه تسمى اوسترليتز حوالى 200 جنيه لمشوار 15 دقيقه ) المهم ركبت تاكسى تانى و رجعت الأوتيل علشان اكمل الجوله الحره على الأقدام , و الأرقام طبعا ليست أكثر من مثال .


امام الأوتيل يقف شرطى لابس ازرق و كل شرطة المرور لابسه ازرق و الراجل اللى واقف امام الأوتيل مهمته حاجه واحده ياخد ارقام التاكسيات اللى الناس بتنزل منها و اللى بتركب فبها و موعد الركوب أو النزول. كما لاحظت وجود سياره مدرعه مختفيه بجوار الأوتيل .

المحافظه التى تقع فيها المدينه تسمى كانتون و تقع جنوب شرق الصين. جوها معتدل طوال العام عن بكين القارصة البروده شتاء و لذلك يقام هذا المعرض مرتين فى ابريل وفى اكتوبر حين ذهبت . المدينه نفسها واسعه جدا و الشوارع غير مزدحمه كما تصورتها و لكن لأن المساحات هناك شاسعه فعدد السكان غير واضح اطلاقا و يمكننى ان اشبهها مثلا بحى ذو كثافه متوسطه عندنا .

المدينه بها نهر يسمى بيرل ليس كنهر النيل مثلا و لكنه ايضا ليس كأنهار انجلترا التى هى عباره عن ترعه واقفه من بتوعنا و الناس عمالين يقولوا عندنا نهر عندنا نهر و تبص تلاقيه زى قنايه فى غيط .

فوجئت بكميه من السيارات الحديثة جدا – مرسيدس و بى ام – بكثره هناك و كذلك بكميات غير عاديه من الموتوسيكلات و الفيسبا التى حلت محل الدراجه التقليديه التى نادرا ما رأيتها بما يغنى ارتفاع المستوى الأقتصادى للسكان كذلك انتشار الموبايل بصوره مهوله و لكنها انواع لا نعرفها عندنا.

ايضا كبارى عبور المشاه مختلفه فلها مطالع و منازل كبيره علشان الموتوسيكلات و العجل و الفيسبات و لذلك فشكلها غريب شويه. المرور منتظم بسيوله و الأتوبيسات العامه خضراء اللون و متواضعه المنظر و زحمه على خفيف يعنى فيها ناس واقفه مش كله قاعد و جميعها فيها ظاهره غريبه و هى وجود كاميرا فيديو مثبته خلف الأوتوبيس تنقل الصوره لتلفزيون صغير بجوار السائق . ايضا المدينه بها مترو انفاق .

ايضا من ركوبى للأتوبيس و انا فى طريقى من و الى المعرض أو التاكسى لاحظت ملاحظه غريبه . المدينه تكاد تكون منقسمه لقسمين متلاصقين و فى بعض الأحيان متداخلين احدهما مثل بولاق الدكرور او بولاق ابوالعلا من جوه أوى بمحلاته و مجاريه و الآخر مثل الشانزليزيه او اكسفورد بس أرقى شويه جناين و مولات و مراجيح فى الشارع و ناطحات سحاب. هذه الملاحظه كانت هاتجننى.

الى احد هذه المولات دخلت بغرض تجديد التموين و عمل زواده . دخلت سوبر ماركت زى مترو كده بس على كبير شويه و فضلت الف علشان اعرف اجيب حاجه اعرفها تتاكل مش عارف و كله مكتوب بالصينى و خايف اجيب حاجه مش عارفها تطلع بيضة كيوى من نوع تانى . المهم لقيت حاجه كده عامله زى الفواكه المجففه اشتريت منها عدة انواع و اشكال و انواع مختلفه من التوست و العيش و خرجت حيث كان موعدى مع صاحبنا قد اقترب.


يتبع .........

رد: رحلة الى الصين
 

http://billhocker.com/china5/pinktowers2.jpg


New Housing
Guangzhou, China 2002

رد: رحلة الى الصين
 

http://billhocker.com/china5/taxi2.jpg


Taxi
Guangzhou, China 2002

رد: رحلة الى الصين