رد: FIAT 132 2000
 

MANY THANKS

رد: FIAT 132 2000
 

موضوع رائع ياحازم باشا


انا بصراحه فتحت عيني لقيت نفسي راكب عربيه والدي الله يرحمه وهيا برضو 132 بس الماني

ومازالت الى الان عندي
وانا متفق معاك يا استاذ حازم في كل اللي بتقوله

بس برضو الصناعة الالمانيه مش وحشه وبدليل ان المكنة من ساعة ماوالدي اشترى العربيه في سنة 85 الى الان مش اتعملها غير عمرة واحده بس ومازالت العربيه شده حيلها بس عيبها الوحيد هو العفشه وده بالنسبة لتعليقى على موضوع الالماني والايطالي اما موضوع حكاية فرق مقاس التروس بين الالماني والايطالي فبصراحه انا ماعنديش خلفيه عنه

في بقه نقطه واستشاره ياباشا بما انك عاشق للعربيه دي


انا بشد العربيه حاليا وانا ودتها لمركز تجديد بياخد العربيه شده راكبه
سلمتها بمفتاحها وهستلمها بمفتاحها
وتقريبها انا غيرت نص السمكره حاليا وهيا الان لسه ماخرجتش من السمكره
ياريت حضرتك تنصحني بايه

خاصة انا عايز اركب ليها باور وتكييف وزجاج كهربا
وبالمناسبة هيا 1800 GLS موديل 74 - فتيس 4 غيار طبعا

ممكن تكون مستغرب انها الماني وموديل قديم وبتقول في سرك ده المفروض يرميها بس انا مستحيل افرط فيها لانها من ريحه والدي وعندي استعداد اصرف عليها عشان تكون في حاله كويسه اوي

وياريت اسمع رايك في موضوع التجديد اللي انا فيه حالياً وخاصة التكييف والفرش الداخلي اجيبه منين وازاي وعايز اعرف حدود سعر التابلوه بتاع 2000
لاني بصراحه اول مره اجددها بنفسي ومحتاج حد خبره زيك
ومنتظر ردك يامعالي الباشا

رد: FIAT 132 2000
 

اهلا و سهلا بيك يا باشا
و ربنا يبارك لك في عربيتك و عمري ما اقولك ارميها طبعا
مهما كانت دي عربيه ولو اتعمل فيها شغل مضبوط حتبقي زي اي عربيه حديثه.
تعالي نتكلم عن المفروض يتعمل فيها
لو انت فاتح ميزانيه كبيره للسمكره يبقي تجيب اربع ابواب 2000 استيراد بس حتلاقيهم غاليين شويه
بتيجي بالزجاج و الفرش و النواكل و مكن زجاج كهربائ امامي كمان و بكده تبقي انت رجعت الروح للعربيه دي
و تجيب كمان شبكه اماميه 2000 برضه و اكصدامات و جنوط مروحه و تابلوه و فتيس 5 غيار و فرش سقف
كده حتبقي العربيه معاك شبه ال 2000 بالضبط
لكن لو مش عاوز تعمل كده و الابواب بتاعتك نضيفه و عاوز تحافظ علي موديل العربيه
يبقي اهم حاجه تخلي بالك من السمكره علشان العربيه تطلع سليمه
لو العربيه اتظبط فروقات الابواب و سوكه الجنب و الشبكه الاماميه و الفوانيس الخلفيه حتبقي العربيه شكلها نضيف
بالنسبه للتكيف لا انصح به مطلقا علي موتور قديم خصوصا ان مكيفات الفيات القديم تعبانه و مش حلوه اوي و كمان حتهبط الموتور اوي
فنصيحه مني بلاش من التكييف
اما لو عاوز تركب الباور فميش منه اي مشكله كل اللي حتحتاجه خزنه زيت باور و كمبروسر و خزنه دركسيون باور و طنبوره كرنك يركب عليها سير البور مع سير الدينامو
بالنسبه للتكلفه اعتقد حتوصل ل 2000 جنيه
اما بالنسبه للتابلوه حيبقي غالي كمان يعني ممكن يدخل في الف جنيه او الف و نص
بس حيغير منظر الصالون خالص و تجيب كمان الكونسول بتاع ال 2000 و تغير الفتيس بواحد 5 سرعات علشان
يبقي خارج من فاتحه الكونسول بتاع ال 2000 لان وضعيته مختلفه
يا اما تجيب تابلوه ارجنتا بالكونسول بتاعه حيركب عادي مع الفتيس بتاعك و شكله حلو برضه
و اي سؤال انا موجود اهو:)
و عاوزين نشوف الصور بعد العمره يا ريت و ربنا يباركلك فيها

رد: FIAT 132 2000
 

جميل جدا الموضوع وشكرا اوى عليه

بس انا عاوز اعرف ال132 تعملها كام لو حالتها كوبسه
واسمع ان ال 2000 بتسحب بنزين كتييييير
فعاوز اعرف معدل استهلاكها اد ايه مثلا

رد: FIAT 132 2000
 

ياباشا انا بجد ممنون ليك لسرعة ردك


ويالا بينانخش في الموضوع

بالنسبة للسمكره انا جبت ستاره اماميه وقنطره راداتير و 4 طبل ببان و2 رفرف امامي و2 عتب و2 دوران خلفي
ده شغل السمكره

اما شغل العفشه انا عندي ان شاء الله هغير كل العفشه من تيش ببيضه ب4 مساعدين بشدادات بكل العفشه تقريباً

وبالمناسبة احنا مغيرين للعربيه الجنوط بتاعتها من فتره وجايبين جنوط مروحه وكمان الاكصدامات جايبينها اكصدامات العربيه ال 2000

بالنسبة للفتيس انا مش عايز اغيره لان اعتقد ان الميزانيه مش هتسمح لذلك انا متردد في موضوع التابلوه ده لان الكونسول بتاع ال2000 مش هينفع مع الفتيس ال 4 غيار اللي عندي وفي نفس الوقت انا احتمال اغير التابلوه قدام
فالموضوع عندي متلخبط شويتين بالنسبة للتابلوه والفتيس

وان شاء الله انا هجيب الباور لان الدريكسيون تقيل جداً عندي فالموضوع ده في الخطة
وكمان الزجاج الكهربا الامامي ان شاء الله هجيبه برضو

اما التكييف انته ايه رايك ياحازم باشا لو بعت جبت من السعوديه تكييف ياباني بتاع عربيه تويوتا مثلا او مازدا هل برضو هيأثر على عزم العربيه زي تكييف ال 132 موديل 2000 ولا هيكون مختلف

اتمنى الافاده والتعليق على اللي هيحصل في عربيتي وتقوللي ايه رايك

وبالنسبة للصور انا اكيد هصورها في الفنش النهائي وهرفع صورها في المنتدى