رد: ممكن حد يكرهنى فى النيو سيراتو!!!!
 

[quote=m_o_sakr;102704]الف شكر لحضرتك على الرد
بس ازاى دارك شيرى او ميتال برونز!! المفروض اللون بيتحدد فى استمارة الحجز

quote]

لآ ! فى استمارة الحجز مافيش مكان ( بلانك ) أو خانه للون ! لكن همه قالو لى اختار لونين ممكن السياره

الموجوده ساعة الاستلام تكون منهم ! و تم كتابة اللونين !

حاجه تانيه عايز أقولها بصراحه ! أنا بعد ما حجزت و من الكلام الكتير اللى سمعته عن سيئات العربيه دى

( مش ندمت ) بس بقيت قلقان و مش مستريح ! لكن لم أتراجع لآنها فى الآول و فى الآخر عربيه زى كل

العربيات ! وشىء سهل تغييره أو بيعه أو حتى توليعه ! مش لازم نبقى ميتين على الدنيا ! أمال اللى بيشترى

صينى ولا روسى مع كل الكلام اللى اتقال عنهم يعمل ايه ؟؟ وبعدين أصلا العربيه غاليه آه ! بس ليه ؟ علشان

الجمرك بتاعنا العالى و علشان الجنيه بتاعنا اللى بقى فى الآرض ! ياخوانا كيلو اللحمه أصبح ب 52 جنيه !

ما جتش على حتة سيراتو ! ولو الواحد قعد يتنك على كل حاجه مش ح يعمل حاجه ! أظن كل واحد فينا كان

فاكر قبل الجواز انه ح يتجوز أحسن واحده فى العالم تناسبه ! عايز أسأل المتجوزين دلوقت رأيكم ايه فى الجوازه

دى ؟؟ أنا عن نفسى لو فيه سيات 133 بتاعة زمان جديده موديل السنه دى مع شوية أوبشن حديثه ! لن أتركها !

لكن هوه ده المتاح دلوقت و كل واحد واحتياجاته ! و ملحوظه أخيره ! كل اللى بيشتم فى السيراتو راكب حاجه تانيه !

Dr. Bolbolan ptmnlo123per122

رد: ممكن حد يكرهنى فى النيو سيراتو!!!!
 

انا فى البدايه احب اشكر حضرتك على الرد و المتابعه
وانا متفق مع حضرتك فى اننا فعلاٍ كلنا مستهلكين و محدش ليه مصلحه وكل واحد ليه حريه الرأى و التعبير
بس حضرتك معروف عنك الحياديه و الموضوعيه فى ردودك علشان كده انا قلت الكلام ده, علشان حضرتك ايدت كلام الأستاذ فادى فى مهاجمه الكورى كله!! و ايدت كلامه بإن السيراتو واخده نفس شكل الألفا روميو (و مفيش وجه شبه خالص - الشبه مفهوش ازواق, لو شكل العربيه عاجبك او مش عاجبك تكون ازواق و وجهات نظر)
و موضوع ان العربيه تستحق الضجه من عدمه ملوش علاقه بعربيه بتعجب الواحد او مبتعجبوش و العربيه محققه اعلى مبيعات فى مصر وفى دول كتير جداً متقدمه زى ما قلت فى مشاركه تانيه, يعنى مش هنا فى مصر بس الى بنقول العربيه كويسه
بس انا لمل عملت الموضوع كنت عايز الناس تكتب تجاربها و حقائق عن العربيه مش الكورى وحش و الهوندا بتجرى اسرع!!!
و شكراً ليك و ارجو المعذره اذا كان اسلوبى دايق حضرتك
و يا سيدى ربنا يكرمنا كلنا و نركب bmw او مرسيدس

رد: ممكن حد يكرهنى فى النيو سيراتو!!!!
 

[quote=Dr. Bolbolan;102725]اصل انا مكتوب عندى فى الوصل لون العربيه
انا دورت فى النت على العربيه و وجدت انها عامله مبيعات ممتازه فى استراليا و كندا و حتى امريكا (بس طبعاً هناك بتنزل بمواتير 1600 و 2000 و2400 سى سى) و حتى فى اوروبا الغربيه بدأت تتواجد و تعمل مبيعات كويسه هناك
و محدش فى كل الدول دى اشتكى من اى حاجه فى العربيه ولا العفشه (بس عندهم الشوارع متسفلته مش زى عندنا ptmnlo123per111) و حضرتك ان شاء الله عربيه ممتازه و زى الفل و مفيهاش حاجه تخلى الواحد يقلق جامد

رد: ممكن حد يكرهنى فى النيو سيراتو!!!!
 

شكرا ليك يا باشا على متابعتك و على اسلوبك المهذب
و دائما اختلاف الرأى لا يفسد للود قضية
هو بس الاعتراض كان على وصف تعليقى بالغير موضوعى بس عادى يا باشا ولا يهمك..

و انا يا باشا زى ما قلتلك ... انا عبرت عن وجهة نظرى الشخصية فى العربية و قلت ان ده لا هيقلل من نجاحها ولا هيزوده و هى عملية اذواق
و بالنسبة للكورى و اليابانى الاتنين مابيعجبونيش كعربيات (انا بتكلم عن السيدان الصغير زى السيراتو و الالنترا و الكرولا) بس منتشرين جدا فى العالم كله لاعتمادية اليبانى و المحاولات الكورية للتطور المستمر ...

و علشان تفهمنى اكتر يا باشا انا اكتر حاجة تهمنى فى العربية هى (الأمان و الاداء) و خصوصا انى راجل بحب السرعة و الجرى فا مبحبش اركب عربية مش واثق فيها من الناحية دى... .انا بتكلم عن سرعات 150 و انت طالع.. يعنى لو العربية فول اوبشن و ضعيفة من الناحيتين دول مش هفكر فيها علشان كدة اكتر عربيات بتعجبنى طبعا هى الالمانى .. عربية بركبها و انا حاطط فى بطنى بطيخة صيفى حتى لو قديمة شوية و مستعملة استعمال نضيف بفضلها عن اى حاجة تانية لو جديدة.. انا كان معايا زلمكة موديل 92 بجد عربية وهمية و معايا دلوقتى كابريس 2004 عبارة عن موتور كورفيت على بودى كبيييير و المرسيدس القديمة كنت ببقى مطمن اكتر بكتير و انا سايقها

فهمتنى يا باشا ؟؟ انا ببص للعربيات من زوايا مختلفة شوية و علشان كدة بيحصل سوء التفاهم و الناس ساعات بتفتكرنى متحيز.. بس انا فعلا فيه اولويات مهمة ببص لها فى العربية قبل الشكل و الاوبشنز

بس يا باشا ...و ادام الله بيننا جميعا المحبة و الاخاء

رد: ممكن حد يكرهنى فى النيو سيراتو!!!!
 

انا سعيد جداً برد حضرتك و الف شكر ليك على المتابعه و توضيح وجهة نظر حضرتك
و قطعاً اختلاف الرأى لا يفسد للود قضيه و أتمنى دائماً ان نظل على علاقه طيبه و روح أخويه فى المنتدى الجميل مصر موتورز