رد: بيكانتو ولا هيونداى I10 ولا شيفروليه سبارك , افيدونى
 

يجب تحديد الاولويات
1 معايا كام
2 محتاج عربية حاعمل بيها ايه
مثلا واحد عنده عربية عائلية تشيل شيل و مشتروات و عربية اطفال و مراته و عياله
لو افترضنا حيجيب عربية تانية لمراته
منطقي يجيبلها هاتش باك أوتو اهي سهلة في السواقة و الركن لان عربيته التانية حتسعفه في مشاوير التحميل
لكن اسرة بتجيب اول عربية لها مش منطقي تجيب هاتش باك

و فعلا عن تجربة فرق السعر او تقاربه بين حاجة صغيرة أوتو و حاجة كبيرة مانيوال يستاهل
اما السبارك ب 72 و صغيرة و مانيوال فده اختيار غير عملي

رد: بيكانتو ولا هيونداى I10 ولا شيفروليه سبارك , افيدونى
 

تماااااااااام ..
يبقى انا كده هاكون فى مجال المينى ..
وبما ان ذلك ..
اذن امامى واحدة من 3 ..
بيكانتو رغم سعرها العالى اللى ماعرفش تستاهله فعلا ولا لأ 74000 مانيوال
هيونداى i10 اللى سعرها اقل من البيكانتو ب8000 جنيه , 66000 مانيوال
سوزوكى سيلاريو اللى اقلهم فى السعر 55000 مانيوال هاف اوبشنز2011 ,,, 60000 مانيوال فول اوبشنز 2011 ,,,70000 اوتوماتيك فول اوبشنز 2011 , ماعرفش 2012 عاملة كام ..
السبارك استبعدتها خلاص مع انها مقاربة للبيكانتو والi10 فى المواصفات بس سعرها زى البيكانتو , هاتقولولى طب مختارة البيكانتو ليه , هاقولكم لإنى حاباها , بس مش معنى كده إنى اجيب اللى حاباه , إنما أجيب الأفيد لى , عشان كده محتاجة رأيكم ..
واشكركم على كل مشاركاتكم .

رد: بيكانتو ولا هيونداى I10 ولا شيفروليه سبارك , افيدونى
 

هاتي البيكانتو احسنهم واحدث شكل فيهم ال 2012 الجديدة شكلها تحفة ومتورها اقوي وهي افضل سيارة في فئتها ولازم تأخذي قرار وبعدين تستخيري وتتوكلي علي الله لانك لو قعدتي تسني كدة مش هتشتري هتفضلي خايفة من قرار الشراء

رد: بيكانتو ولا هيونداى I10 ولا شيفروليه سبارك , افيدونى
 

الى مش فارق معاه الفلوس و القسط يبقى البيكانتو بلا منازع
لكن بسعر البيكانتو مانيوال اقدر اجيب i10 اوتو و باقل اقدر اجيب سيلاريو اوتو
فى رايى الاصلح لحضرتك طالما السعر فارق معاكى يبقى خير الامور الوسط
ركزى فى الاختيار ما بين ال i10 أوتو بـ 73500 و السيلاريو أوتو بـ 72000
و فعلا سعرهم مقترب اذا مكنش اغلى من الصالون المانيوال ذى الفيرنا و اللانوس و اللوجان
بس يستاهلوا لانهم أوتو و فرق الجودة و الاداء لصالحهم

بالرغم انى مقتنع بتفوق السيلاريو عن ال i10 الا انى ملقتش و غلبت فى البحث عن السيلاريو اوتو
السيلاريو تتميز بالاتى :
وسائل أمان غير موجودة بالجودة دى فى فئة الاسعار حتى 75 الف زى 2 airbags و ABS و EBD و الثلاثة دول انا معتبرهم طفرة فى السوق المصرى بس الى يفهم ( و اولهم المستورد مودرن موتورز الى بتهيألى مش حاسس بقيمة عربيته )
جنوط سبور
كاسيت قوى

ميزة ال i10
انتشار واسع ده يترجم لـ :
خدمة ما بعد البيع متميزة بتوكيل قوى
توفر قطع غيار
اوسع شوية من السيلاريو

عن نفسى إذا كانت السيلاريو الاوتوماتيك متوفرة كانت حتبقى اختيارى الاول لكن للاسف كنت منتظرها 4 شهور لغاية لما جبت ال i10 أوتوماتيك و الحمد لله

رد: بيكانتو ولا هيونداى I10 ولا شيفروليه سبارك , افيدونى
 

انا مش خايفة من قرار الشراء ولا حاجة , لكن الأمر يحتاج الى تفكير ولمدة طويلة فعلا , انا مش كل مدة هاجيب عربية ودى هاتبقى اول عربية لى فى حياتى , فطبيعى لازم آخد وقت , اضف انى مش قايمة اجيبها حالا , يعنى قدامى وقت شوية اقرر فيه عشان مارجعش اندم على اختيارى
يعنى الموضوع تفكير بروية مش اكتر
جزاك الله خيرا

رد: بيكانتو ولا هيونداى I10 ولا شيفروليه سبارك , افيدونى
 

ما شاء الله اللهم بارك ..
آراء حضرتك سديدة , والله كأنك بتقرأ أفكارى , نفس اللى فكرت به بالظبط , بالفعل انا استقريت على واحدة من اتنين اما الi10 او السيلاريو ..
اللى بفكر فيه دلوقتى هو الاوتوماتيك والمانيوال وايهم اسهل من حيث الصيانة
سمعت ان الفتيس الاوتو معقد شوية ومش اى حد يفهم له ولو باظ بيتغير كله على حسب ما قرأت هنا فى المنتدى وبالتالى هايكون مكلف , ورأى آخر بيقول انه حلو بالنسبة للسير فى الزحمة بدل ما الواحد كل شوية يجيب اول تانى اول تانى وعبقال ما يرجع البيت تكون رجله الشمال تعبت من الدبرياج ..
الرأى ده عجبنى , الا انى خايفة من حكاية الصيانة دى , وفى نفس الوقت باقول لنفسى , طب ما العربيات الجديدة عموما المفروض ان الدبرياج فيها خفيف يعنى مايتعبش الرجلين ..
إيه رأى حضرتك فى الموضوع ده

رد: بيكانتو ولا هيونداى I10 ولا شيفروليه سبارك , افيدونى
 

رأيي و الله اعلم
المستقبل للأوتو كله دلوقتي بيجيب أوتو البلد بقي الزحام حمل كبير علي الي سايق خاصة السيدات
الزيرو له ضمان
و بعد الضمان طالما في انتظام في الصيانة يبقي بإذن الله حيعيش
و عن نفسي في اللانوس الدبرياج سهل بس كتير بالاخص في القاهرة ساعات زحام في مسافة تتمشي علي الارجل في 5 د بالعربية تاخد ساعة ففعلا الاوتو يستاهل
و سواء فتيس السيلاريو او ال i10 فانا مفترض انهم اعتمادية عالية
و عن تجربة مع زوجتي قبل ما اجيبلها اوتو و بتقعد جنبي و انا سايق مانيوال في زحام و مواقف صعبة قالتلي مش حعرف اتصرف كده بمانيوال لازم أوتو
و انا نفسي في اجازاتي بقيت استسهل و اركب ال i10 طالما مفيش شيل كتير
فعشان متبقاش السواقة صعبة عليكي الاوتو حيسهلها خالص
ده غير ان معظم الفتايس الي اتغيرت كانت في حدود الف الي الف و 500 استيراد
و عربية زيرو مش قبل 5 سنين عشان يحصل مشكلة من الفتيس ده ان حصلت اساسا