مصر موتورز مجتمع السيارات - الفرق بين اسبرانزا ولانسر

مصر موتورز مجتمع السيارات (https://www.masrmotors.com/vb/index.php)

- A 516 (https://www.masrmotors.com/vb/forumdisplay.php?f=187)

- - الفرق بين اسبرانزا ولانسر (https://www.masrmotors.com/vb/showthread.php?t=5252)

رد: الفرق بين اسبرانزا ولانسر

والله يا جماعة أنا استفدت جدا من كلامكم

ولكم الشكر جميعا ...
ويارب كمان صاحب الموضوع يكون استفاد

رد: الفرق بين اسبرانزا ولانسر

اقتباس:

المشاركة الأصلية كتبت بواسطة moody (المشاركة 36452)

اسم الموضوع استفزني بصراحه وحبيت ارد لاني امتلك الانسر 2005 1300 اتوماتك واسبرانزا 2008 1600 مانوال,,

واكيد فيه فرق بين الاتنين والاسبرانزا فيها عيوب بس مش زي ما بنسمع انها بتسيح وتعطل وتفرقع وكده

بالنسبه للسفر

السرعه الاسبرانزا تتفوق في السرعه القصوى يعنى بتجيب سرعات عاليه ببساطه ,, لكن الثبات الانسر احلى والاسبرانزا ممكن تتمرجح في اي موجه على الطريق على السرعه العاليه الا لو كانت محمله ,, الفرامل المفاجئه الاسبرانزا طبعا بتعمل مغناطيس في الارض ودا عشان الاي بي اس ,, بالنسبه للراحه الداخليه الاسبرانزا الكرسي بتاعها ضخم شويه ومش متعب خالص في قاعدته اما الانسر فكرسيها تحس انه معمول بالمقاييس وبرضو مريح ,, عزل الصوت انا كنت فاكر ان الانسر عزلها وحش لاني كنت بقارنها بالكرولا لكن لما جبت الاسبرانزا حسيت بنعمة الانسر لان الاسبرانزا عزل الصوت فيها رديء جدا وتسمع اي حاجه في الطريق

داخل البلد

بالنسبه للطلعه الاولى للسياره من اشاره مثلا او مطب الانسر تتفوق لان الاسبرانزا نيه ولازم تدوس لها بنزين عالي عشان تديك الطلعه المطلوبه ودا لان دواسه البنزين بتاعة الاسبرانزا بالكهربا وفيها حساس متحكم في الدوسه انا شايف انها لو وير عادي كانت هتبقى احلى بكتير ,, التكيف الاسبرانزا لو الطبلوه بتاعها سخن من الشمس مش هيسقع تستنى ربع ساعه كده لما يبرد لكن الانسر مش بيفرق معاها الطبلوه سخن ولا ساقع لكن لو بليل او مكنتش راكنها في شمس هتلاقي الاتنين زي بعض ,, المطبات لو الطريق فيه حفر ونقر ودبش يبقى الاسبرانزا مش هيعجبها الوضع وهتسمعك حاجات مش كويسه وخاصه من الدركسيون الي لسه ما عملوش ليه تعديل لغاية دلوقتي لكن الانسر هتتهز في المطبات ومش هتسمع حاجه بمقارنه مع الاسبرانزا لكن الاسبرانزا ناعمه جدا في المطب الصناعي العادي الي مافيهوش رزع واعتقد دا عيب الطرق بتاعتنا لان حاسس ان الخواجه الصيني صمم الاسبرانزا انها تمشي على طريق مسفلت محطش في دماغه الحاجات الي عندنا ولو مش عاوز تسمع صوت المطبات في الاسبرانزا امشي براحه خالص في المطب هتلاقيها ناعمه وكويسه

جودة الخامات

الانسر مافيهاش غلطه في خامة التصنيع لكن الاسبرانزا حاجات وحاجات فمثلا الطبلوه حلو قوي من فوق ومحمل لكن تنزل تحت عند الدواسات كده وخاصه الجزء الي خلف الكاسيت هتلاقيه ورق لكن الصفه العامه كوس وخاصه انهم عاملينه من خامه جيده في الاجزاء الي انت ممكن تتعامل معاها ,, الزراير هي خفيفه في استخدامها بس شكلها كويس ومش بتعمل مشاكل او تهيس ,, فرش الباب في الاسبرانزا حلو ومحمل ,, زراير التكيف في الاسبرانزا رديئه جدا يعني لازم تلبس قطن في ايدك قبل ما تدوس وانا شايف ان زراير الكاسيت احلى بكتير وانهم كانو المفروض يبدلو زراير الكاسيت بدل التكيف علما بان تكيف الاسبرانزا تتش ,, الكشاف الي ورا بذات رديء هوا التاني لو حد سند عليه ممكن يتكسر في الاسبرانزا لكن الامامي جامد ومش بيتكسر بسهوله حتى مع الحوادث

العمر الافتراضي

الانسر بغير فيها حاجه مش بتعطل تاني طبعا معمره ,, الاسبرانزا الله اعلم هي لسه لغاية دلوقتي مفيش حاجه اتغيرت لانها اجدد

الاعطال

مفيش

نظره عامه

الانسر المفروض ما نتكلمش عنها لكن الاسبرانزا مضمونها جيد فيها بعض الحاجات الي اصحابها عارفينها وتاقلمو معاها زي علبة الدركسيون ودبدبة العفشه خامات مش كويسه في بعض الاماكن منها وانها نيه شويه وكده واعقد ان سعرها القليل يشفعلها اننا نتغاضى عن الحاجات دي وخاصه انها عربيه لما بتقصدها في مشوار اي كان مش بتقول لا وتتكسر وتسيح ولا تعطل ولا عجلها يفك من مكانه واي حد يقول كده مش صحيح خالص ولو حد واثق من عكش كده يصورلنا العربيه المكسوره الي بتسيح ويوريهالنا عشان نصدقه

وفي الاخر ما ينفعش نقارن بين واحد في 6 ابتدائي بواحد في 3 ثانوي ونقول زي بعض لكن ممكن نقول الي في 6 ابتدائي مجتهد ومستقبله احسن وكويس قوي ان الصين قدرت تعمل منتج زي دا في عدد قليل من السنين ويخلو الناس تضرب اخماس في اسداس والكلام الغلط الي بينتقد بيه العربيه دي في صالحها مش ضدها ودا شيء كويس ليها وخاصه ان معظم الكلام عنها غلط وهتثبت مع الايام انها مش كده وهتبقى جديره بالاحترام ,فاي حد عاوز ينقد العربيه دي عشان تبقى وحشه في عين الناس يدور على حاجه غير انها بتسيح وتتكسر

ptmnlo123per122

الله ينور عليك يا مودى

رد: الفرق بين اسبرانزا ولانسر

تمام يا مودي

رد: الفرق بين اسبرانزا ولانسر

كلامك تمام و ريح قلبى والله هو دة خلاصة الموضوع كلة و اهم حاجة انك عن تجربة ptmnlo123per112

رد: الفرق بين اسبرانزا ولانسر

شكرا ليكم يا جماعه على ردودكم المشجعه وانا تعمدت في مشاركتي الي فاتت اني اذكرلكم العيوب الي مقابلاني في السياره الاسبرانزا وزي ما قلت انه لازم منه عشان فرق السعر طبعا

وعاوز اضيف في المشاركه دي الحاجات الي عجباني في العربيه عشان المهتمين بيها والي عاوزين يعرفو عنها اكتر واي سؤال عنها انا جاهز وتحت امركم

المظهر العام فخمه من بره وجوه ,, اوبشن كتير وكله تحس انه بيرحك وانت ماشي بيها يعني مثلا التحكم في مستوى الانوار الاماميه ,, وانوار الشبوره بتاعتها شديده جدا وفعلا بتنور جامد في حالة الضباب والاتربه ,, مظهر العدادات والاضاءه بتاعتها مريحه للنظر وواضحه ,, الازاز الكهربا بتاها تحس المتور الي بيرفع وينزل الازاز عفي قوي وشديد ,, الباور خفيف جدا بالمقارنه بالعربيات التانيه ,, وزي ما قلت قبل كده انها بتجيب سرعات عاليه فلو الطريق مظبوط زي طريق اسكندريه ممكن ما تحسش بسرعتها الا لو جت موجه ساعتها ممكن تحس ,, مش بتتاثر بالحموله يعني اداء المحرك ثابت هي فاضيه او محمله بس الفرق الوحيد انها هتزيد استهلاك البنزين ,, صوت المحرك هادي ولو مدي غيار عالي مع سرعه قليله ودوست بنزين على الاخر مش هتحس برجرجه ولا تسقيف وزي ما قلت ان الدواسه بالكهربا وهي الي بتتحكم في الدوسه ,, فتحات تكيف للكنبه الي ورا بتساعد جامد في تسقيع جو العربيه ,, شنطه واسعه جدا والصالون كمان ,, لو فتحت الكابوت مش هتلاقي اسلاك ولا ويرات ماشيه عشوائي هتلاقي كل شيء فيها ماشي منتظم والمحرك عليه غطا اسود مديله شياكه .

والكلام دا حبيت اقوله عشان ما يبقاش كله نقد في العربيه واني لازم اذكر الاشياء الكويسه فيها زي ما قلت عيوبها ولو ربطنا المشاركه دي والي فاتت بسعر العربيه هنلاقي انها مناسبه جدا لسعرها وخاصه ان عيوبها ممكن ما حدش يلاحظها الا لو واحد بيدقق في العربيات وانا برشحها لاي حد عاوز يشتري عربيه زيرو في حدود ال 70 الف جنيه

وشكرا ptmnlo123per122

رد: الفرق بين اسبرانزا ولانسر

شكرا لك استاذ مودى --كلامك مقنع ومحترم فى ردك الا ول وكذلك الثانى
وواضح انة عن تجربة--ارجوا ان نبتعد عن الدفاع الاعمى والهجوم الغير مبرر

رد: الفرق بين اسبرانزا ولانسر

انا ايد كلام ا جنيدى العربية سحبها جبار و انا سافر الاسكندرية مع واحد صحبى و كان معا الانترا 2008 و انا اسبرنزا 2008 و كانا بنشد مع بعض 150 \\160 ك و الراجل كان مشمصدق سحب العربية هى كل الحكاية شطارة سواق