|
رد: متابعه يوم بيوم ل فك ماتور و عمل طقم شنبر
النهارده الجمعه وبعد ما ربطت مع الميكانيكي الخميس مساء علشان نطلع الجمعه الصبح فى طريقنا الي الشيخ / طارق ابوزيد كلمت الشيخ طارق ابو زيد مساء الخميس علشان أأكد معاه قال لي انه يمكن يسافر يجيب بضاعه واتفقنا مع بعض اني اكلمه الصبح اشوفه سافر ولا لأ علشان اجي له
الجمعه كلمته التليفون مقفول فكده المشوار بالنسبة ليا اتلغي بس علشان اليوم مش يبقى على الفاضي قولت انزل احاول اخر محاولة مع تصليح الكارونه كلمت الحاج حمدي قال لي انه شغال روحت نازل على ورشه الحاج حمدي اللى فى حدائق القبة وصلت له وبدئنا شغل فى العربية رفع العربية و فك الصاجه المغطيه الكارونه و حل قلب الكارونه وطلع التروس ( التفكير فى ذلك الوقت اننا هنغير التروس والبنيون بطقم بتاع لادا 2107 او 2105 مش فاكر بالضبط المهم هوا كان ب 750 ) الراجل وهو بيفك الحمد لله لاحظ ان التروس عندي سليمه هيا والبنيون ومفيش فيهم مشاكل فبص على بليه الكارونه لقاها مش حلوه فدورنا على بليه وطبعا مفيش جديد ف شاف لي من عنده بليه وركبها وقال هنجرب لو الصوت راح هيكون عرفنا ان السبب من البليه ولو مش راح هنبقي نغير طقم التروس والبنيون المهم الحمد لله ركبنا وطلعنا جربنا :playing_music: الحمد والشكر لله مفيش صوت اتاري الصوت والدوشة دي كلها من البليه اللي كانت ممكن تبقى السبب اني كنت اغير الكارونه بواحده تانيه او اعدل وادخل فى الدوامات دي تكاليف الاصلاح : بليه الكارونه استيراد بالظرف 40 جنيه جركن زيت التعاون للكارونه : 50 جنيه مصنعيه خراط لتظبيط مسافات التروس بعد التركيب : 20 جنيه جوان واول سيل و انبوبتين لحام حديد و صاموله : 17 جنيه مصنعيه : 150 جنيه اكراميه : 30 جنيه التكلفة كده فى المعقول جدا 307 جنيه بالمقارنه مع تكلفة وتعب تغيير الكارونه (1200 : 1800 )او تعديلها ( 1000 : 1500 ) الحمد لله علي كل شئ الحاج حمدي قال لي ان بعد شوية كده يوم او يومين اغير زيت الكارونه ودلوقتي ندخل بقي فى موضوع الموتور و هل هيكون عمره كامله ولا نص عمره ( طقم شنبر ) |
رد: متابعه يوم بيوم ل فك ماتور و عمل طقم شنبر
مبروك يا باشا اجتياز المرحلة الاولى
وعقبال باقي التظبيط للعربية الحمد لله ان المشكلة طلعت بسيطة وان حلها تكلفته برضة بسيطة اما عن موضوع الماتور فمن الافضل انتظار القرار لما تفك الماتور ويبقى قدامك وتعرف العيب فين لانك ممكن تفتح تلاقي حاجة تانية غير طقم الشنبر يبقى على الوضع اللي هيبان قدامك هتقرر هتعمل ايه او اني اظن ان الرأي القائل ""ان الماتور كله على بعضه قطعة واحده وان تلف جزء يعني تلف باقي الاجزاء "" رأي صحيح ومنطقيا ولو فرضنا ان فعلا الجزء اللي تحت من الماتور لازال سليم بعض الشيء يبقى لو انت عملت اللي فوق هيفضل فيه جزي تحت مش سليم 100% وممكن يكون هو نفسه فيه مشاكل تؤدي لتلف الجزء اللي فوق ترجع تاني بعد فترة قريبة تقرر تفتح تااااااااااااني علشان تصلح الجزء اللي بايظ يبقى من الافضل تعمل عمره كاملة وتظبط ماتورك تمام وتمشي بيه وتحتفظ دايما بالاجزاء اللي بتتغير عندك لو لسه فيها امل لو لا قدر الله حصل حاجة قريب في العربية بتجيبها وتشغلها تاني ويبقى استفد بيها لو محصلش ركنتها عندك مش هتخسرك طالما فيها الرمق شوية الكلام ده لو فرضنا انك فتحت ولقتها سليمة اما بقى لو فتحت ولقيت الدنيا خرابنه يبقى مفيش مفر من عمره كاملة وربنا يقويك ويعينك ومتنساش تعمل تقرير على اللي انت عملته بالتكاليف وعقبال لما تخلص المرحلة الثانية وتدخل في الثالثة ان شاء الله عمل الشكمان |
رد: متابعه يوم بيوم ل فك ماتور و عمل طقم شنبر
2 مرفق
ايه رايكم في الصور دي عاوز اعرف ايه الموجود فى الصورة وهل ينفع اخلي الماتور اللى عندي كده ( من الواضح انها تجهيزات لجعل الموتور فى حاله افضل )
|
رد: متابعه يوم بيوم ل فك ماتور و عمل طقم شنبر
كنت عملت موضوع عن مقويات الشاسية ومفيش حد رد عليا فيه فبكرره هنا هل ال 131 بتحتاج بارات او مقويات زي اللى في الصورة دي و هل الاقي منها استاندر (مقاسه كام) ولا بتتعمل
|
رد: متابعه يوم بيوم ل فك ماتور و عمل طقم شنبر
العربية البيضاء اللي فيها دي بارات علشان تمسك العربية ومتفتحش وتقريبا صاحبها مركب عليها ماتور اقوي منها علشان كده ركب البارات خوفا ان الشاسية يفتح
العربية الحمراء ده ماتور تاني غير ماتورها واللي راكب معاه ده فلتر رياضي علشان يزود السبح للعربية والله اعلم |
رد: متابعه يوم بيوم ل فك ماتور و عمل طقم شنبر
اقتباس:
لو مش لقيته ممكن تخلي السمكري يعملهولك |
رد: متابعه يوم بيوم ل فك ماتور و عمل طقم شنبر
معلش يا غالى لانى لسه ملاحظ موضوعك ده حالا ...
اولا الحمد لله والف مبروك انك عرفت تصلح الكرونة وعموما بعد كده لو اضطريت تغيرها بلاش تجيب غير الكرونة بتاعتها (التروس تكون نفس المقاس سواء التاج او البنيون) علشان متحسش بفرق فى العزم والسرعة .... بالنسبة لموضوع العمره المصنعية كده كتير قوى لو طقم شنبر بس .. مصنعية تغيير طقم الشنبر (نص عمره) من 250 الى 300 جنية بالكتير قوى (تبقى انك كده كارم الراجل) .. لكن 400 جنية كتير ... وانا عن نفسى قبل كده من حوالى سنة ونصف عملت نصف عمره شاملة (فك تفوير وش السلندر وتغيير الكستبانات (التاكيهات فى مواتير DOHC) ورودية وحل البساتم وتغييرها وتركيب طقم شنبر وايضا تغيير الكبالن وتشييك على الفرامل) كل ده بمصنعية 275 جنية وكنت كارمه كمان علشان ركبلى الكبالن وهى المفروض شغل العفشجى ... لكن 400 جنية كتير قوى يا نجم لان على الاقل عربيتك فيات قديمة والمفروض ان شغلها سهل وغير معقد ... يعنى بالكتير اوى 300 جنية لو نص عمره من غير حل البلوك ونزود 50 جنية بالكتير اوى لو حصل فك للبلوك وخرط شمايز وكده (باذن الله مش هتحتاج خرط) ... عموما انا هحاول اقولك على الخطوات بتاعت النصف عمره علشان تبقى فاهم ايه اللى بيحصل .. عموما اوعى تسيب عربيتك عند الميكانيكى وتمشى لأى سبب .. خلى كل حاجة قدام عينك ... - باذن الله اول ما هتروح للميكانيكى حاول تروح بدرى اول ما يفتح وتسيب العربية تبرد .. - هيبدأ اول حاجة يحل وش السلندر كله وسير الكاتينة والذى منه ... - بعد ما هيحل الوش ويطلعه بره هتبدأ تشوف البلوك (الجزء التحتانى من الموتور) والبساتم .. - هيبدأ الميكانيكى ينزل تحت العربية ويحل السبايك والبساتم ويطلعها بره الموتور .. - لازم تطمئن على حالة البساتم انها سليمة ومش مكسوره (لا قدر الله) ... -وبعدين اطمئن على الشمايز (جدران غرف الاحتراق او اماكن البساتم) انها ناعمة ومفيهاش خدوش او تجريح .. ولو فيها تجريح كتير (لا قدر الله) يبقى لازم تاخد وش فى المخرطة للاسف (وده هيقلل عزم الموتور بعد كده) ... - لو البساتم والشمايز تمام هيبدأ يغسل جسم الموتور كويس ويركب الشنابر فى البساتم ويبدأ يركب البساتم فى المكنة باستخدام اداه عباره عن اسطوانة حديد او صفيح كده فيها شداد بتضغط الشنبر فى البستم علشان يدخل فى مكانه فى الموتور ... وبعد ما يدخل البساتم الاربعة هينزل تحت يقفلهم فى الكرنك ويقفل كل حاجة من تحت ... وعندها تبدأتطمئن شوية ان الصعب خلص ... - هنيجى بقى للوش .. هيعمل رودية ويظبط (حسب اللى هو شايفة) ويشيك على التاكيهات والكامات والذى منه ... وبعدين هيبدأ يركب الوش .. يحط جوان وش السلندر (سواء واحد او دبل) ويركب الوش ويبدأ يربط المسامير خلف خلاف على شكل X .. يعنى يبدأ يربط من النص وبعدين الاطراف .. ويا سلام لو يستخدم مفتاح عزم فى ربط الوش علشان التقريط يبقى مظبوط ... هيبدأ يقفل كل حاجة ناقصة فى المكنة وبسم الله الرحمن الرحيم يدور العربية ويحط الزيت الجديد ... لو العربية دايره كويس يستحسن تفضل دايره 3 او 4 ساعات وهى واقفة علشان تلين قبل ما تمشى بيها ... وبعد ما تمشى بيها ابدأ امشى بالراحة لانك هتكون فى مرحلة تليين زى العربيات الجديدة بالظبط بس لمسافة 300 كيلو مثلا حاول متعديش 2500 RPM مثلا وبعدين واحده واحده ابدأ اقرص اكتر .. ومبروك مقدما يا باشا .... طبعا هتلاقى حاجات بتنطلك اثناء التصليح مكنتش ع البال ولا ع الخاطر ده شئ اكيد ... عموما انا متابع معاك باذن الله لغاية ما تعمل العمره على خير باذن الله .... |
| الساعة الآن 10:13 AM. |
Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017