رد: 500 خطوة حب مع "لى لى" سيات ليون
 

الأخ حسونة حسونة
أرجو منك فى البداية التروى عند شراء هذه السيارة خاصة إذا كانت مستعملة و موديل السنة دى و بسعر لقطة......لأن كل دى عوامل تشكك أن السيارة تكون فيها حاجة....وسيبك من الناس اللى تعقد تقول لك دواعى سفر و خلافة.....انا مش بأكل من الكلام ده و عشان كده أنا رأيى الأتى

1- كشف كامل على السيارة بالتوكيل و التأكد طالما أنها موديل السنه أنها مازالت داخل الضمان من أفواههم بالتوكيل مش بالشهادة اللى مع صاحب السيارة لأن الليون و الألتيا بشكل خاص أى مسمار يتعمل فيها برة التوكيل تكون بره الضمان بشكل مباشر

2- هوا ايه اللى خلا الأير باجز فتحت أصلا و متقلش الخبطة اللى نتج عنها الفانوس المكسور

3- أنا مش هاقدر أفيدك بصراحة فى أى حاجة خارج التوكيل لأن أنا من يوم ما أشتريتها ماكنش عندى ألى نيه أعمل فيها مسمار برة التوكيل حتى و ‘ن كان ده مالهوش علاقة بالضمان و لكن لأن العربية تستحق أن تصان لدى من يفهمها و الأجهزة الخاصة بيها و خصوصا أن أجزاء كثيرة منها تعمل على نظم كمبيوتر و أنا مش بحب الفتى بصراحة.....عندك جهاز العربيى تتحط علية يطلع المشكلة أيه على عينى و رأسى ....هانفتى و نجرب و ندور يبقى تسلم و فرصة تانية .......و أقبلك كدة و الليون بقت سيت موديا 1980 أن شاء الله

4- ممكن تقوللى بق السعر اللقطة و لونها أيه......عشان فى واحدة فيرانى و بتاعت شاب و عاملة حادثة و أنا عارفها

رد: 500 خطوة حب مع "لى لى" سيات ليون
 

بصراحه ثبتنى ..الايرباج مفتحوش فعلا من خبطة فانوس
. انا هقولك الصراحه
العربيه اتقلبت على جنبها الشمال وبعدين على السقف
يعنى الجزء الايمن سليم .. والجزء الاهم الامامى سليم تماما
والعربيه دايره وماشيه عادى والتكييف و السى دى شغال وكل شىء تمام
عايزه سمكره بس .... للجاب الايسر يعنى الباب الا مامى والخلفى
و السقف ... مع العلم ان الفتحه سليمه وبتفتح وتقفل عادى
اللى اي يتغير بس باب الشنطه .. وفانوس امامى شمال وغطا فوانيس خلفيه
والاتنين اير باج الامامين
والعربيه عامله 30 الف كيلو
لونها حمر طوبى وانتاج 1212/2008 ... يعنى موديل 2009 ...
هى بتاع شاب ابن شخص ثرى جدا عندنا وعندهم بدل العرييه 3 وزى متقول اتشاؤم منها
وانا خلصتها ب 60 الف . والحمد لله
.و ودتها على السمكرى امبارح..
حسبت المصاريف لقيتها مش هتزيد على 15 الف ان شاء الله
وهجيب
الفانوس واصلح الايرباج فى الحرفيين
يعنى العربيه هتقف عليا ان شاء الله 75 الف .. ج باكتر اوى 80 الف
وهى ب 145
هل الصفقه فاشله ولاجيده نسيا ؟؟
ردك يهمنى جدا لانى لسه خام فى العربيات ودى اول مره اشترى عربيه

رد: 500 خطوة حب مع "لى لى" سيات ليون
 

والله يا باشا الناس فى المواضيع دى أنواع .....يعنى فى ناس تقول لك ده سعر لقطة و اللى حصل فيها ماهوش مشكلة ماهى العربية دايرة وماشية ذى الفل

وناس ليها رأى تانى و دول أنا منهم بصراحة لما عربية تتقلب يبقى السؤال هو الأتى

- أيه أخبا القوائم و الشاسية؟؟؟؟؟؟؟؟؟؟؟؟؟؟؟؟؟؟ ؟؟؟
بص يا باشا العربية دى يوم ما أنا أشترتها كنت عارف أنى مش هابيعها لكذا سبب
أولا دى شبابى يعنى شاب اللى هايشترى
ثانيا قطع غيارها مش رخيصة يبقلى برضة مافيش إقبال كبير عاليها

يعنى لو حبيت تبيع هايطلع عينك......فما بالك لو العربية فيها عيب فى الأساسيات (قوايم و شاسيه)

أنا رائى أنك لازم تكشف على الموضوع دة لدى الوكيل عشان أسف فى اللفظ ماتلبس فى الحيط وبعدين لازم أفهم سعاتك العربيه دى ثمنها كمان 5 سنين لن يتجاوز ال 60.000 بس لو فى عيب كمان فى الأساسيات ذى ماقلتلك يبقى الحال أيه........وتأكد من موضوع الأير باج لأن أنا ليا ناس راكبين عربيات على المستوى ده الأير باج عشان تتغير كلفت مبالغ مش أقل من 3000 جنيه لأن فى حجات جنب الأير باج تتصلح .....وش الدريكسيون مثلا......بصراحة يا أخ حسونة أنا رأيى أنها صفقه مقلقة فا الأولى أستخير الله ...........وأنا لو مكانك بصراحة مش هاشتريها .....ودى أراء....لأن العربيات اللى ذى الليون دى ماينفعش تتركب و هى متهانا ....فى رأيى العربيه مهما حصل مش هاتكون مظبوطه و بعدين أتقلبت و مافيش حاجة حصلت فى العفشة ولا القوائم طب أذى و الله أعلم ....ويمكن يكون برضه للأخوه رأى تانى

رد: 500 خطوة حب مع "لى لى" سيات ليون
 

شكرا لك على الرد ياتش باشا
والله انا كل شويا ادخل المنتدى اشوفك رديت ولا لا لان رايك يهمى جدا
بالنسبه لردك

انا مقلتش مفيش حاجه فى القوايم ... الجنب الشمال بالكامل عايز تظبيط قوايم والسمكرى فكها النهارده وهيبدا شغل فيها كمان يومين وربنا يستر وبالنسبه للشاسيه فهو تمام والحمد لله
والا مكانتش جابت السعر ده
اضافه الى انى مش هقعدها خمس سنين .. ولاحاجه كتير اوى 5 سنين ولا را ى حضرتك ايه
يادوب ان شاء الله بعد الصيف الجاى اكون خلصان منها وكسبان فيها كمان ان شاء الله
لانى بصراحه واخدها ركوب وتجاره
والوش الصغير الدائرى بتاع ا لدريكسيون مكسور فعلا .. اللى هو تحته الايرباج
مهو بتصليح الايرباج حتى لو اتكلف مش هتكلفنى اكتر من 15 الف ج تصليح ان شاء الله
انا شايف انها صفقه ناجحه ان شاء الله
لان فيه عربيه معموله ... اتباعت ادامى ب 115 .. وكانت نفس حالة العربيه دى
بس انت قلقتنى فى موضوع انها مش ماشيه وسوقها نايم
يعنى لو حبيت ابيعها كمان سنه ب 90 الف او 85
مجيبش السعر ده ولا ايه راى حضرتك
بس ياريت تفيدنى هل منطقة الحرفيين اللى فى القاهره ممكن الاقى فيها باب شنطه وفانوس امامى
وممكن اصلح الايرباج هناك ولا لا
لانى اعرف ناس صلحت الايرباج بتاعها هناك ب 500 ج وزى الفل
وسوال اخير فين ممكن اكشف عليها غير التوكيل
معلش اخوك خام اوى ودى اول مره اشترى عربيه ...
وانا كنت ناوى بال75 اللى هدفعهم دول اجيب رينو لوجان 2010 الهاتشباك الجدبده
بس لما شفت قيمة العربيه دى قلت احط الفلوس فيها احسن ورزقى على الله وبينى وبينك انا بحب التميز .. والعربيه دى مش منتشره عندنا
منتظر ردك ياغالى

رد: 500 خطوة حب مع "لى لى" سيات ليون
 

الأخ حسونة ....طالنا أنك أشتريت و خلصت ربنا يبلرك لك فيها ...و أحب اقول لك أن كل معلوماتى هى معلومات و أراء شخصية جمعتها بس أنا ماجمعتهاش من الناس فى الشارع ....ذى ما معظم الناس بتعمل عشان مايبقاش كلام فى الهوا و أهواء ناس ....انما معلوماتى مصادرها أصحاب السيارات الليون و الوكيل و ناس ليها فى مواضيع التجارة بالعربيات و خلافة......و النقطه الأولى هل العربية تجيب 90 و لا لأ .....أه تجيب بس لو قاعدت معاك أكتلر من 3 سنين ماعتقدش و ده عشان قانون تخفيض الضرائب الجديد بينزل 4% كل سنة يعنى العربيه كمان 3 سنين تكون نزلت من ثمنها 16% يعنى قرابة ال23000 جنية طبعا دة بخلاف أنها عربيه علقت نمر يعنى شيل 10000 كمان و أستخدام 3 سنين من عمر الألمانى 15000 عن ال3 سنين يعنى كدة العربية تشيل من إجمالى تمنها 48000 جنية يبقى كدة العربيه عمله معاك ال90 عند ال3 سنين بعدها أبتدى أخصم تانى بقى ....وده لو ماحطناش المنافسة اللى هاتكون من العربيات الجديدة و أسعرها اللى هاتكون فى الأرض .....بس العربيه دى لو حد فاهم أشتراها منك ماعتقدش أنها هاتجيب السعر ده خصوصا أنك ناوى على الحرفيين مش الوكيل يعنى بصراحة ممكن تتفقس........أما عن قطع الغيار فى الحرفيين ....لازم تتأكد عشان أنا ماعتقدش أنها موجودة ....العربية جديدة و مش منتشرة أيه اللى هايخلى تاجر يجيب قطع غيارها و يركنها عندة.............أكيد تلاقى أبيزا و قرطبة بس مش ليون ....و مثال على كدة الفيات البرافو مش منتشرة ....فالناس فى الحرفيين كانت بتجيب حاجت الجراند بونتو مثلا لأنها أكثر أنتشار و مش البرافو بس للأمانة أنا مجربتش................... ...حاجة تانية هاقولك عليها .....الليون مسمار فيها برة الوكيل و تكون بره الضمان و دى أكيد هايسألك عليها اللى هايشترى منك .....انت ليه طلعت بره الوكيل ......و ربنا معاك و يرزقك منها

رد: 500 خطوة حب مع "لى لى" سيات ليون
 

شكرا على سرعة ردك
بصراحه انت قلقتنى وربنا يستر ....
طيب ممكن اشترى باب الشنطه والفانوس من التوكيل لو ملقيتهمش فى الحرفيين.. ولا لازم ضمان لان صاحب العربيه بيتاهلى مش معاه ضمان

رد: 500 خطوة حب مع "لى لى" سيات ليون
 

مؤكد ممكن تشتريهم من التوكيل لأن دى قطع مالهاش علاقة بلضمان بس خد بالك
1- ركبت جوا التوكيل هاتدفع ثمن التركيب
2- أخدتهم عشان تركب برة هاتدفع ضريبة زيادة على تمن القطع

فاقارن بين فرق السعر و شوف مين أحسن رغم أنى أفضل أنك تركب الشنطه جوا التوكيا عشان تأكيد التركيب السليم اللى مايعبش العربيه فى حاجه و إن شاء الله يكون خير و مافيش قلق و ربنا يكتبهالك صفقه مربحة....وعسى أن تكرهوا شيئا و هو خير لكم
بس الحقيقة أن انا كان نفسى أنك تصرف 25 عليها جوا التوكيل بدل 15 و تضمن تجيبلك 100 او 110 بعد سنه بدل شغل الحرفيين..........أهم حاجة بعد ما تخلص العربيه على خير .....جرى على التوكيل أدفع 250 جنيه كشف كامل على العربية موتور و عفشة و بدى تتطمن قلبك أن عربيتك سليمة و ميه ميه لأن لو فى حاجة غايبة عنك مع العربيات اللى زى دى اللى ماليانه كمبيوتر ممكن تعمل فيك مقلب مانتش واخد بالك منها