رد: معاك ايه تحمى نفسك بيه لقدر الله فى حالة السرقة تحت تهديد السلاح
 

بصراحه انا شايف انك حولتها لمدرعه حربيه مش عارف بس بصراحه انا شايف اني المسدس ممكن يعملك مشاكل بوجوده وبالاخص اي انسان مش بيقدر يتملك اعصابه في الانفعال وخاصة لو اي مشاده مع سواق ميكروباص ودول اسهل ناس ممكن يعصبوك انا من رأيي السيلف ديفينس افضل حل وفي كلتا الحالات لو عصابه محترمه هي اللي وقفتك اعتقد المسدس مش هيفيد ولا السيلف ديفينس ولا كل ده قصاد رشاشتهم ولا الاسلحه اللي معاهم لاني تقريبا دلوقتي البلطجي او الحرامي ايا كان اسمه اللي بيطلع بمطواه ولا طبنجه دلوقتي بيبقي مبتدأ وبيبقي اصلا خايف من خياله وانا بصراحه ضد ان فكرة ان الشعب يسلح نفسه دي ثم لو كل واحد سلح نفسه طيب ساعتها وظيفة اقسام الشرطه بقي ايه هما مثلا اللي هنروح نشتري من عندهم الرصاص لما يخلص اللي معانا ولا ايه وعامة انا متأكد اني لو كل واحد سلح نفسه بمسدس مش هيفضل في البلد دي غير الاطفال اللي ميتعداش عمرهم خمس سنين بس
وعامة ربنا يعدي الايام دي علي خير ويحمي الجميع ويهدي الناس شويه لاني تقريبا جرايم القتل والذبح والتمثيل زادت قوي الفتره اللي فاتت دي والناس بقت بتتكلم علي قتل البني ادميين كانه شئ عادي جدا

رد: معاك ايه تحمى نفسك بيه لقدر الله فى حالة السرقة تحت تهديد السلاح
 

انا معايا شومه زان طولها حوالى 60 سم وفيها مسامير حديد (اللى بيتبقى فى الكنب وشبه دبابيس الضغط كده) ..

والشومه دى حاططها تحت الكرسى بتاعى ..

وبصراحه نفعتنى كذا مره ..

اكتر مره كنت فى البنزينه فى رمضان اللى فات قبل الفطار وكانت زحمة .. وبعد اكتر من نصف ساعه جه دورى وفوجئت بشاب بموتوسيكل شكله مش تمام وقف قدامى وعاوز يفول قبلى مع ان كان فى اكتر من 10 موتوسيكلات مستنيين دورهم على الجنب التانى .. فبقوله بعد اذنك يا برنس المكن من الجنب التانى .. وكان ساعتها فى موتوسيكل تانى واقف ناحيتى بس كان واقف على جنب مش قدامى ..

قام رادد عليا بكل بجاحة وبيقولى كده بالنص " امال دى ايه يا اخويا .. ربع نقل !! " ..

قولتله لأ مش ربع نقل بس واقف على جنب .. قام رادد عليا برضو بقله ادب .. قلت مبدهاش بقى ..

نزلتله ومسكت فيه ولقيته بيتمادى .. والدنيا صيام والجو حر والواحد على اخره .. ومبيقتش حاسس انا بعمل ايه .. رحت مطلع الشومة وخلاص مش ناوى انزلها غير فوق دماغه ..

اقسم بالله بقى يجرى قدامى فى البنزينه ومش عارف اوقفه لغاية ما الناس حاشتنى عنه .. والحمد لله ان ده حصل .. لأن لو كنت ضربته بيها كان فعلا هيتأذى ..

بس خلاصة الكلام ان فعلا لازم ناخد بالاسباب ونأمن نفسنا بأى حاجة بسيطة فى العربية ..

وانا شايف ان الشومه والالكتريك والسيلف ديفينس هما انسب حاجة .. سهل اخفائهم ومفيش فيهم مسائلة قانونية (اللهم الا بعض الغلاسة فقط) ..

ربنا يبعدنا جميعا ويحمينا من شر البلطجية ........

رد: معاك ايه تحمى نفسك بيه لقدر الله فى حالة السرقة تحت تهديد السلاح
 

هههههههه يا عم ولا مدرعة ولا حاجة ، بص هقول لحضرتك حاجة انا مش هنكر ان السلاح مع بعض الناس بيسخنهم و بيخليهم يدخلو في مشاكل هما في غني عنها السلاح بيجرأ الواحد ، بس عايز اقول لحضرتك حاجة في المشاكل والخناقات رفعة السلاح ليها مميزتها وليها عيوبها بمعني لما ترفع سلاح علي حد لازم تقدر ( تنفذ بيه ) تسستخدمه او مترفعوش من الاول عشان لو رفعته ونفذتش عند اللزوم هتكون العواقب وحششششة جدا ، فأ ي مشكلة مع سواق ميكروباص او ملاكي بنزل اتكلم بمنتهي الهدوء لقيت اللي قدامي بيقل ادبه بقل ادبي رفع سلاح برفع سلاح وبوقفه عند حده، لكن مش اول ما انزل برفع السلاح ده اخر حاجة بلجأ ليها ومحدش بيحب المشاكل

بخصوص البلطجية : حضرتك من بعض المشاكل اللي مريت بيها عشان انا كنت ايام الكلية غاوي مشاكل او المشاكل اللي بتحبني مع اني جايب تقدير ومرتب علي الكلية المهم البلطجية معظمهم هواة مش محترفين يعني بيجربوا يثبتوا حد بفرد خرطوش (مقروطة ) او سلاح ابيض وبتنفع فبيستمروا مفيش شرطة وحضرتك فاهم ، وانا عن نفسي اخد قرار اني لو لقدر الله اتثبت وخلاص مفيش حل غير المواجهة ، مش هيتاخد مني جنيه غير علي جثتي
اما لو فيه بلطجية برشاشات فأكيد كل احتياطاتي ديه ملهاش لزمة ومع ذلك انا هدافع عن نفسي
علي فكرة انا من اشد المعارضين لفكرة ان الشعب يسلح نفسه ده اكبر غلط ، بس لو حضرتك شايف حل يا ريت تقولي عليه ، انا اقسم بالله شوفت كذا موقف اتنين يخبطوا في بعض وكل واحد ينزل بعصايا واللي بسلاح ابيض ويموتوا بعض ضرب والناس تحوش واكون شايف ظابط ولا امين شرطة واقف يتفرج والناس اللي تقوله روح حوش يقلهم مليش دعوة ، حضرتك انصحني و قولي ايه الحل

انا ليا اختي الصغيرة بتاخد دروس ومش في كل الاوقات والدي بيقدر يوصلها انا بخلي معاها مسدس و مفهما اللي يكلمها تفضيه فيه ومعرفها ازاي تستخدمه ، حضرتك انا لو معملتش كده مش هكون مطمن ، يا ريت تقولي البنات اللي في المدارس وبياخدوا دروس يتصرفوا ازاي لو اتعرضوا لموقف وحش ، ربنا يستر علي كل الناس بس الواحد بيسمع اليومين دول حجات تشيب والله

اما نشوف الشرطة هترجع من الاجازة امتي فعلا معندهمش دم ولا ضمير ( غالبيته مش كلهم عشان اكيد فيهم كويس )

وبنا يستر علي كل الناس ويحفظهم