مصر موتورز مجتمع السيارات

ممكن حضرتك تحدد العيب فى دايرة البنزين ولا الكهرباء بطريقة بسيطة هاتشي العمة وتحط حوالى ملعقة بنزين فى الكاربراتير وتجرب لو دارت على طول تبقى دايرة البنزين وتحصر شكوكك فى حاجتين الرداخ البلف بتاعة بيهرب والبنزين بيرجع للتانك تانى والوقت ده اللى بيحتاجه الرداخ علشان يسحب بنزين ويملا الخراطيم والفلتر وحوض الكاربراتير وبعدين تدور أو رداخ الكاربراتير نفسه وده بتاع الكاربراتير بيصلحه وده فايدة انو يبقى محوش شوية بنزين جوة الكاربراتير يدورو العربية فى حال الدوار الصعب يعنى زيى التصبيرة كدة لحد ماييجى الامداد الاساسى من رداخ البنزين اى خلل فى العملية دى سواء بالنقص او بالزيادة يؤدى الى تأخير الدوارة
نيجى للكهرباء هنعمل حاجة بسيطة تجيب واحد معاك وتخلع سلك بوجيه من ناحيت البوجيه وتقربه من شاسيه العربية او ايى حاجة معدنية فى العربية وتخلى صاحبك يدور فى شرارة بتطلع يبقى الدورة لغاية مدخل البوجيه سليمة يبقى تخلع بوجيهاتك وتطمن على نضافتها وتشوف عليها زيت ولا لأ
لو مافيش شرارة يبقى الجزء السابق هو اللى فيه مشكلة برضو نرفع السلك الداخل على وسط وش الاسبراتير ونقربه من الشاسيه وتخلى صاحبك يقفل كونتاك ويفتحه لوحصلت شرارة يبقى البوبينة سليمة ويبقى العيب فى الابلاتين والكوندينسر نغيرهم لو محصلتش يبقى البيوبينة بايظة او موش داخلها كهربة نرجع لسلك الكهربا بتاع البوبينة وده بيبقى واصل على جنب نفكه ونلمسه فى الشاسيه بسرعة او عمل شرارة يبقى فيه كهرباء ونغير البوبينة لو معملش يبقى عليك وعلى الكونتاك هو دة اللى فاضل
يارب اكون عرفت افيدك والموضوع ده على فكرة مايخدش اكتر من عشر دقائق الصبح وتحدد العيب انشاء الله