مصر موتورز مجتمع السيارات - حكايتي مع البطاريه

اقتباس:

المشاركة الأصلية كتبت بواسطة salahabdelnabi (المشاركة 69262)

على فكرة يا حازم فكرتنى بموقف حصل معايا من حوالى 8 سنين
كنت لسه جايب 124 مستعملة وحالتها مش بطالة على قدها ودى كانت اول عربية اجيبها
وكان عندى ساعتها حوالى 25 سنة
واول لما دخلت بيها الشارع وساحب خروف حلو كده من دورى معايا عشان ادبحه على العربية
لاقيت واحدة جارتنا والله العظيم كانت بترسم عليا لبنتها هى كمان
بتقولى مبروك ماانت خلاص اشتغلت واستكتهم وعديت الفقر
عربية وخروف فى يوم واحد
بسملت وحوقلت وقلت فى سرى ربنا ياخدك انتى وبنتك
واذ فجأتن ( حلوة فجأتن دى ) الخروف يملص من ايدى وينطح باب العربية ويدغدغ الازاز وهوووووب نط على الكبوت وفى البرابريز وفين يوجعك ......... وقلبى كان بيتقطع
وحلق يا صاحب الجحش ........ حلق ولا تمسكش
وهى مسخسخة على روحها من الضحك بنت الرفضى
كان هاين عليا ساعتها اجيب كرشها بالسكينة بدل الخروف
وانا مش عارف الحق العربية والا الخروف
واذ فجأتن تانى لاقيت الخروف مرمى على الكبوت ودماغه فى الصالون وبيفرفر اتارى الازاز بتاع العربية جاب رقبته
وربنا ساعتها عيطت وصعب عليا انه يروح هدر كده قدام عنيه
فى داهية العربية
المهم لحقنا الخروف وجبنا رقبته وكان دمه ساح فوق العربية وتحتها
وانا باخلص عليه كنت حاسس انى بجيب رقبتها هى
وطبعا على تصليح العربسية ومصاريفها من 8 سنين ماقولاكش
الجنيه كان بقيمة 10 جنيه دلوقتى
ودى كانت حكايتى مع اول خروف واول عربية

هههههههههههههههههههههههه
الحمد لله انا عين اللي كانت حتبقي حماتي اقل بكتيير من عين اللي كانت حتبقي حماتك
بس فعلا انا لو مكانك مش حكلمهم تاني و احتمال كنت ادبحها مكان الخروف بجد
يااااااه اشتري عربيه جديده و يحصل فيها كده
يالا الحمد لله كويس انها جات في العربيه ماجتش فيك انت

اقتباس:

المشاركة الأصلية كتبت بواسطة Dr. Bolbolan (المشاركة 69266)

لا حول ولا قوة الا بالله ! مصدقك يا أبوصلاح والله لآنى حضرت واقعه واحده حسدت واحد قدامى

مات على طول والله على ما أقول شهيد ! لذلك كويس انها جت فى الخروف ولا جاتش فيك !

والآخ حازم بتقول بتؤمن بالحسد ؟ طبعآ لازم كلنا نؤمن بيه اذا كنت تؤمن بالله وكتبه ورسله !

دى حاجه مافيهاش شك ! والبنى آدم ممكن يحسد نفسه ! وحتى الحيوان ممكن يحسد بنى آدم !

ولما نتقابل ممكن أحكيلكم على القصص دى !

د/ بولبولان ptmnlo123per122

لا يا دكتور اعملنا حلقات مجمعه عن الحسد زي حكايتي مع السيارات كدهptmnlo123per122

اقتباس:

المشاركة الأصلية كتبت بواسطة bostato (المشاركة 69286)

ربنا يكفينا شر الحسد
بس والله انت ممكن تكتب روايات لأن طريقتك في السرد جمسله ومنظمه
ربنا يكفيك شر جشع التجار

ربنا يخليك يا بوس دا بس من زوقك
ان شاء الله اي موقف يحصل ححكيه لا تقلق

اقتباس:

المشاركة الأصلية كتبت بواسطة bmkbmk (المشاركة 69411)

شكرا ليك يا حازم باشا على الموضوع الهايل و السرد الجميل
و الفائدة اللى عمت علينا جميعا

و بمناسبة الحسد فكرتنى باول عربية جبتها هنا فى الكويت :) و كانت مرسيدس زلمكة
كان راكب معايا بعد ما جبتها بيومين واحد بس اييييييه .. ماركة مسجلة عين مدورة نص قطرها 3 متر عمرها مخيبت مع حد و ده كان سنة 2003

المهم كنا فى رمضان و الدنيا زحمة مووت و العربيات راكنة يمين و شمال الشارع بعد ما صلينا التراويح بإمامة الشيخ مشارى العفاسى ربنا يكرمه

قلت اروح للعربية جرى و اخدها و اهرب قبل ما ييجى اخينا يركب معايا تانى .. الحمد لله ربنا سترها فى مشوار الذهاب و مش عاوز اخاطر فى مشوار العودة ...... فا رحت لقيت الباشا مستنينى عند العربية و بيبتسم ابتسامته الصفراء المعهودة .. كأنه كان عارف ابن الايه انى عاوز اهرب منه .
المهم و انا طالع من الركنة كنت راكن على يمين الطريق و مستنى عربية من اللى ماشيين تقف علشان اطلع .. المهم واحد ذووق وقف لى و انا لفيت الدركسيون شمال و طلعت و بلف الدركسيون يمين تانى .. ايدى اتزحلقت و جيت ادوس فرامل رجلى اتزحلقت برده و نزلت على البنزين :) آه والله و طلعت فوق الرصيف المقابل :) و الحمد لله ربنا سترها و كانت العربية اللى راكنة جنب الرصيف طلعت كنت لبست 2 تصليح مش تصليح واحد :) و دفعت فى الليلة دى ما يوازى الف جنيه مصرى ... ربنا ينتقم من اللى كان السبب :)
و بجد لما قرأت اللى حصل للاستاذ صلاح قلت دا انا كدة تمام قوى .. ايه يعنى طلعت فوق الرصيف .. دى حادثة سهلة دى حادثة هايلة

و ربنا يكفينا جميعا شر نوم البطاريات و الحسد طبعا :)

عارف انا النوعيه دي من الناس ليا واحد قريبي كان كده بس دلوقتي بقيت بقرأ المعوذتين قدامه
دا بقي كل ما يركب العربيه لازم يحصل حاجه المره اللي ما حصلش حاجه كان معانا عربيه مرسيدس لما نزل و قفل الباب بتاعه الجريده وقعت من علي الباب هههههه