رد: أدب الرحلات
 

دى لذيذة بقى
مرة راكب العربية وعايز ادخل الحمام باى شكل المهم كنت على الزراعى بتاع اسيوط بين بنى سويف والواسطى وبصيت لقيت مفيش كافتيريات خالص وفضلت ماشى وكله غيطان (حقول) وقلت ياواد مبدهاش روحت راكن جنب شجرة وكاى مواطن طبيعى مزنوق جيت جنب الشجرة وروحت مديها
وفوجئت ب2 سواقين ميكروباس وقفو جنب وبصوت عاااااااااالى جداااااا قالو
يابو ...............
على اساس انى واقف بعملها عينى
لكن انا ضحكت جداااا ومزعلتش
وعادة فى الحر لما مالاقيش حجز فى القطار بركب قطارعادى وسريع جد بيقو م من القاهرة 3:25 بعد الظهر وبيبقى زحمة جدا وعلشان تتخيلو مدى الزحام معظم سفرى فى القطار ده بسافر واقف غالبا لحد طنطا واحيانا لاسكندرية ومن كتر الزحام الكمسارى ممكن ييجى لك قبل سيدى جابر بحاجة بسيطة
المهم كل م اركبه فى الحر ده باخد زجاجتين ميه من البيت بايتين فى الفريزر علشان يبقو تلج خاالص ومعايا زجاجة تانيه فيها ميه عادية علشان نزود الميه المجمدة وبفرق على الناس فى القطار
والزجاجة تفضل تلف فى القطار وترجعلى فاضية
المهم مرة ركب واحد من بنها والجو كان نااااار ولقيته خطف الزجاجة و تك تك تك تك شربها كلها وواحد من الركاب اتغاظ جدا وشخط فيه وقال / انت لسه جاى من بره مشربتش وانت على المحطة ليه وهيمسكو ف بعض واحنا نحوش وصلو ع النبى ياجماعة لحد الموضوع م خلص بسلام
ومرة راكب نفس القطار وكنا صايمين فى رمضان والمغرب أذن علينا بين طنطا ودمنهور
وروحت مطلع زجاجتين المياه وشوية بلح عجوة وكام ساندوتش لحمة وكبدة كانت المدام عاملاهم وكنت مزود شوية علشان لو حد حب ياكل وفعلا بعزم على واحد قاعد جنبى لقيته خطف البلح كله ورمى لى بلحة وجرى اختفى فى القطار كلتها وسكتت وبعد شوية لقيته جاى فقال معاك ايه تانى قلت ساندوتشات كبدة ولحمة يالا تعالى نفطر وفوجئت بيه خطفهم واختفى وجه بعد شوية وقال فين الميه فين الميه بعصبية كده وخطف زجاجات الميه واختفى شوية و جه بيهم فاضيين
ولقيت بيسالنى سؤال غاظنى بيقول لى / انت فطرت فقلت له منين م انت خطفت الاكل وسبت لى بلحة فضحك وقال ولا انا فاتغظت اومال الاكل الكتير ده راح فين فقال فرقته ابتغاء وجه الله فى ناس صايمين كتير فقلت له الحمد لله اننا مش صايمين ففهم ان انا بتريق فقال ياعم ربك هيبعت دلوقت المهم واحد قاعد كان سامعنا قال انا معايا كام بلحاية وواحد تانى قال وانا معايا شوية ميه وفطرنا المهم هو نزل دمنهور وانا كملت على اسكندرية و كل م افتكره وهو بيخطف منى الاكل اضحك وافطس من الضحك

رد: أدب الرحلات
 

مرة ركبت الفرنساوى بتاع الساعة 4 العصر وهو مراكز اسكندرية (دلوقت معاده اتغير بقى 4:15)
المهم فى ثلاثى لما بيجتمع فى القطار ده لازم تحصل كارثة وانا اللى لاحظت الحكاية دى بعد كام مشكلة والثلاثى ده انا وعم سعيد فرد المباحث (المخبر السرى) فى القطار وعم عادل و ده رئيس قطار ظريف من اسكندرية و دايما يهرج مع الركاب
المهم اول حادثة حصلت و دى اللى بعدها بقينا اصحاب انا وهما اول مالقطار اتحرك من القاهرة ومكناش لسه خرجنا من رصيف القاهرة عربية الباور قطعت و ده معناه لانور ولاتكييف يعنى تربة (قبر) ماشى المهم جينا بعد شبرا روحت لعم عادل قلت له ياريس المفروض نركن وييجى لنا عربية باور من القاهرة فقال هنجيب واحدة من بنها ولان حظه الزفت انه بيكلمنى وانا من خبراء السكة الحديد قلت له / انت بتضحك عليا بنها محطة فرعية لو مشى القطر مش هنغير الباورغير فى طنطا فضحك وقال / معلش اصل انا تخين شوية وعايز اخس فانا قلت / ياعم متهزرش الله يخليك هنموت لحد طنطا فقال معلش اصل علشان نجيب عربية باور من القاهر ة هنعطل كتير واحنا فى رمضان فنتحمل شوية لحد طنطا واعمل معروف متقولش الكلام ده ادام حد علشان متعملش ثورة فى القطار بضرب بعينى بره القطار لقيت اننا فى اثناء المناقشة كنا عدينا طوخ و قربنا على بنها فقلت ماشى فقلت له هفتح الباب يدخل شوية هوا للناس فقال ماشى ووقفنا بعيد عن الباب لان دى مسئوليه على المسئول عن الباب و ده شخص بيبقى لابس رمادى المهم جه واحد من الركاب هيقف على الباب قلت له اعمل معروف ابعد عنا الباب علشان ده مسئوليه ولو لاقدر الله حصل لك حاجة هتأذى ناس تانية فقال ماشى لسه هيتحرك ولقيت عم سعيد المخبر جاى جرى وبيقفل الباب وبيتخانق معايا واانا هعمل واسوى روحت انا قالب على الوش التانى وقلت له ده حقك الرسمى لكن خلى بالك فى طنطا هنتحاسب ووصلنا طنطا ولقيت رئيس القطار مكلمش طنطا فى اللاسلكى علشان يستنوه ويطلب منهم عربية باور ويجهزوها علشان القطار ميتعطلش ف طنطا اومال ايه قيمة اللاسلكى وفهمت ان فى حركة خيانة وروحت متفق مع 3 من الركاب على حاجةلان عم عادل ده كان تخين اوى ولقيت القطار وصل طنطا وهيطلعوه من طنطا ولا حس ولاخبر وروحت انا والركاب ال3 شلنا رئيس القطار وخرجنا بيه بره القطار وقعدنا بيه على الرصيف وحاصرناه وقلت له ياحلو القطار مش هيطلع من غيرك ياتجيب عربية الباور ياننام كلنا هنا ويسافر القطار من غيرك وده مستحيل والقطار اتحرك فعلا راح متصل بالسواق وقال له اقف انا بره القطار فالسواق قال انت مين قال انا عادل المهم السواق طلع غبى وكمل مسيره وقال بس ياعادل بطل هزار قال له انا مبهزرش انا متكتف على الرصيف راح السواق وقف بعد كلمة متكتف دى ورجع لورا ومباحث السكة الحديد اتلمت وحصل قلق على محطة طنطا لان تعطيل قطار ده جناية امن دولة مش حاجة هينة المهم اتصلو برئيس الحركة وبدأت اجرائات تركيب عربية الباور والمغرب اذن وقعدت افطر ولقيت عم عادل وعم سعيد بتاع المباحث بيعزمو عليا وحطيت الاكل بتاعى مع الاكل بتاعهم وقعدنا ناكل سوا ونضحك ونكركر والركاب فى حالة ذهول لانى من شوية كنت خاطف الراجل ده انا و3 تانى وبنتخانق
مرة تانية ركبت نفس القطار ولقيتهم وسلمت عليهم وهزرنا شوية راح القطار عطل فى بنها
ومرة تالتة ركبت نفس القطار ولقيتهم وسلمت عليهم وهزرنا كالعادة راح التكييف باظ وعربية الباور حصل فيها مشكلة وحريق بسيط وكده والدور اتلم
فى المرة الرابعة بركب نفس القطار لقيتهم سلمت عليهم وهما لاويين بوزهم وانا ركبت اللى وراه
اصل الركاب ذنبهم ايه احنا ال3 لما بنتلم فى قطار 4:15 العصر بننحسه فروحت واخد اللى وراه

رد: أدب الرحلات
 

طبيعى جدا لما بتركب كل يوم بيبتدو يعرفوك
وانا كان معايا اشتراك كيلو مترى وده عبارة عن دفترقيمته 5000 كيلو سفر او 1000 او زى مبتعمله لما بتيجى تسافر بتروح الشباك ينزلو مسافة السفر من ال5000 مثلا يعنى بنها 45 كيلو فينزلها من ال5000 ويختمها المهم معظم الوقت غالبا كنت ببقى متأخر فمش بلحق اروح للشباك اختم فكنت بقلم جاف اشخبط على ورقة او على بريزه فضه او ربع جنيه فضه واختم الاشتراك المهم فى كمسارى لاحظ الحكاية دى فجالى مرة وقال ارحم امى شوية وبطل كسل او تعالى بدرىوروح اختم الاشتراك بدل مانت نازل شخبطة فيه كده فانا ضحكت وقلت له مش المهم المسافة نزلت قال ماشى وضحك ومشى

رد: أدب الرحلات
 

هههههههه مواقف جامده قوى ياخالد كملنا والنبى اكيد عندك مواقف تانيه

رد: أدب الرحلات
 

ياخواننا طب شاركونى وكل واحد يحكى اى مواقف عنده