|
رد: كلام في السيارات 1(حازم خضر)
اقتباس:
تحياتى لحضرتك مرة تانية يا استاذ فادى اذا كنت تقصد بالسيارات الايطالية الفيرارى مثلا فا انا معاك 100 % و هو ده سر تفوق الفيرارى فى العالم كله السرعةو الثبات فى نفس الوقت و هى معادلة صعبة لا يقدر عليها الا اقل القليل اما بالنسبة لباقى الايطالى و الفرنساوى برده انا معرفش و برده مش قادر افهم ازاى السيارات الفارهة مريحة و ليست ثابتة اذا كان الثبات اصلا هو اص الراحة و انظمة الثبات يا باشا اللى فىالالمانى مابتشتغلش بعد ما العربية تنزلق ولا حاجة .. المرسيدس فيها سيستم بيدى فيد باك للكمبيوتر كل عشر ثانية عن الاربع عجلات علشان لو فيه واحدة منهم لفت بمعدل اكتر و اقل من المطلوب فى المنحنيات و على اساسه يتم تعديل الدفع و الفرملة فى باقى العجلات فاده بيشتغل قبل الانزلاق و يمنعه ... و اللى بيشتغل بعد العربية ماتتزحلق هو التراكشن كنترول و ده عندى فى الكابريس لما العربية تتزحلق بيرفع منى دواسة البنزين لحد ما العربية تعدل و بعدين يسمح لى ادوس تانى ... فا انظمة الثبات فى الالمانى اقوى بكتير جدا من الامريكانى بالذات و الامريكانى برده هو اللى بيتوافق مع كلام حضرتك و انا كان معايا مرسيدس قبل كدة و عارف و فعلا انظمة الثبات بتقلل قدرة العربية على المناورة بس فى الألمانى بتكون الحكاية دى اقل من الامريكانى و طبيعى جدا يا باشا ان العربية يبقىفيها الغاء لأنظمة الثبات علشان لو عاز تلعب و تخمس بيها براحتك ... الفيرارى نفسها فيها كدة 3 مستويات ثبات و البى ام فيها 4 مستويات ثبات ممكن تختار بينهم و المرسيدس فيها مستويين او تلاتة برده و فيه عربيات بتعتمد بس على التعليق الرياضى بدون انظمة ثبات حقيقية و دى زى اللومينا اس اس مافيهاش تراكشن و فيها تعليق راضى و ثباتها بصراحة زبالة :) فا مش العربيات الرياضية بس اللى فيها امكانية ايقاف عمل انظمة الثبات و بعدين يعنى انت عاوز تقنعنى ان الستروين اثبت من المرسيدس بدون ما يكون فيها انظمة ثبات ؟؟؟ ماعتقدش انا كنت معاك يا باشا لما اليبانى مابيعجبكش لأنه فعلا ما بيعجبنيش انا كمان .. اما الالمانى فا نا بجد مش معاك خالص و هرجع اقولك جرب كذا مرة علشان تعرف انك مش ممكن تركب عربية زى الالمانى ابدا و لك منى التحية و السلام |
رد: كلام في السيارات 1(حازم خضر)
سلام عليكم ...
ممكن بس مداخله بسيطه قبل ما نغوص في الكلام و ندخل في الغريق اقول كلمه من على الشط ... الوزن عموما بيأثر سلبيا على الاتزان و الثبات ... يعني اي عربيه ادائها لو واحد بس راكبها حيختلف لو 5 راكبين و الشنطه مليانه شنط .. واكيد كلنا بنحس بالكلام ده في السفر ... اما بخصوص التقنيه و انظمه التعليق و الانظمه المساعده للاتزان و التراكشن كنترول و ال ABS - SRS - EPS ... و ذخفلين نظام من عينه سوبر اس بالنتيجه حتحس ... فحدث ولا حرج ... ومعروف طبعا التفوق الالماني في مجال سيارات الانتاج التجاري ... لكن فيراري ... فدي قصه تانيه خااااااااااالص ... السيتروين شهرتها في اعتقادي مستمده من انسيابيتها العاليه و انظمه التعليق المبتكره ... لكن اني اقارن بين سيتروين و مرسيدس من حيث الثبات فدي مقدرش اعملها بصراحه ... لكن اللي اعرفه ان ال E class الجديده معامل الانسيابيه ( مقاومه الهواء ) بقى 0.26 ... و ده من افضل الارقام الحاليه ... الانجليز دايما بيعملو عربيات صغيره و خفيفه و رخيصه ينافسو بيها العربيات السوبر ... بتكون عربيات مواتير صغيره و خفيفه ... لكن الاداء بيتفوق على العربيات السوبر بسبب خفه الوزن - المرونه - الثبات ... واكيد اي حد مننا شاف حاجه زي كده في توب جير او فيفث جير لكن عموما ... الوزن كل ما زاد كل ما اثر سلبيا على الثبات ... سلام عليكم |
رد: كلام في السيارات 1(حازم خضر)
معلش مداخله تانيه ... بس نسيت اقول حاجه
العلاقه بين الثبات و راحه التعليق عكسيه ... يعني الامريكاني القديم مثلا مساعدين العربيه بتاخد و تدي على الطريق .. لتحقيق راحه الركاب ... و ده ضد مبداء الثبات ... اللي محتاج تعليق قاصي (ناشف ) يلزق العجل بالارض و يثبت العربيه ( يقلل المرجحه ) العفشه الرياضيه بتكون ناشفه علشان تحقق الثبات في المنحنيات .... |
رد: كلام في السيارات 1(حازم خضر)
اقتباس:
كلما زاد الوزن, زادت معه قوى الدفع الجانبية فى المنحنيات, كما يصعب معه التحكم فى السيارة, و يصبح القيام بالمناورات و الانزلاقات المحكومة أصعب, لكن فى المقابل, فان زيادة الوزن, يعنى راحة أكبر للجالسين داخل السيارة, خاصة فى السرعات العالية, و ثبات أكبر على الطرق السريعة, لكن السر فى الانسيابية, فسيارة انسيابية و خفيفة قد تكون أثقل وزنا على السرعات العالية من سيارة ثقيلة و غير انسيابية. سيتروين طبعا هى رائدة الانسيابية و نظم التعليق المبتكرة, و هو ما أعطاها سمعتها على صعيد الثبات, و انا مش بقارن سيتروين سى 3 بمرسيدس اى مثلا, فمرسيدس تتفوق على سيتروين فى الكثير من الأشياء لاسيما على صعيد الاعتمادية, لكن انا بتكلم من منطلق السمعة المتوارثة و ليس الحديث عن سيارة بعينها. و عموما الثبات نوعين, ثبات فى المنحنيات و أثناء الكبح و الانطلاق, و ده الثبات الرياضى, و كلما كان وزن السيارة أخف كلما كان أفضل, و فى حالة اختلال توزيع الوزن خلال الانطلاق أو الانعطاف, و لو كانت السيارة مزودة بنظام تعليق غير قاسى أو غير رياضى, فان ال2 طن وزنها بينتقلوا لمحور واحد و يصبح المحور الأخر (العجلات الخلفية مثلا)بلا أدنى ثبات. و ثبات على الطرق السريعة و ده ثبات الراحة, و بيزيد مع وزن السيارة, و بما أن السيارة الرياضية تحتاج للاثنين معا, فانها تصمم بطريقة تجعلها خفيفة و فى نفس الوقت لا تفقد وزنها على الطرق السريعة نظرا لانسيابيتها, فبذلك تكون الفيرارى ذات ال1200 كغ مثلا أثقل من المرسيدس ذات ال2 طن على سرعة 200 كلم/ساعة. كل أنظمة الثبات تعمل من منطلق واحد, و هى نوعين أنظمة منع انغلاق العجلات و أنظمة منع التفاف العجلات حول نفسها, و فكرتها تتمحور حول تحرير الاطار المنغلق من المكابح لاعادة ثباته مع الأرض, أو تقليل سرعة أو فرملة الاطار الذى يلتف حول نفسه, الموضوع مفيهوش أكتر من كده, و طبعا دى حاجات كلها ممكن يعملها أى سائق محترف, و لذا تمنع هذه الأنظمة فى السباقات تماما. و فى النهاية المرسيدس سيارة عائلية فاخرة, أى ان الهدف من تصميمها هو أن تنقل صاحبها و عائلته من نقطة 1 الى نقطة 2 بأقل مجهود ممكن و بأقصى راحة و رفاهية ممكنة, و هى تحقق هذا الغرض تماما و أفضل من اى سيارة أخرى, و الثبات هو أخر ما يطلب من هذه الفئة من السيارات. |
رد: كلام في السيارات 1(حازم خضر)
كلام استاذ فادي صحيح من الناحية النظرية بس التجربة بتدي انطباع تاني يعني انا عندي 280 و هي سيارة فخمة عائلية هدفها الاول هو الراحة و طبعا بس انا جريت بالعربية دي و اخدت بيها منحنيات صعبة علي سرعات 140 -150 كيلو مع ذلك محستش بأي نوع من انواع الانزلاق او عدم الثبات و كنت فاتح الشباكين اللي ادام و فتحة السقف
انا بس مختلف معاك في التجربة فقط يا باشا لان انا جربتها بس |
رد: كلام في السيارات 1(حازم خضر)
على فكره برضو ....
قاعده العجلات الكبيره Wheel base ... بتحسن ثبات العربيه ... علشان كده العربيات الصغيره اوي(الاقتصاديه ) ... بالرغم انها خفيفه لكن ثباتها في الطراوه .. لأن تماسكها ضعيف و العجل رفيع .. التماسك Grip مهم جدا وبيأثر جامد على الثبات ... لان الوزن الخفيف اسهل في المناوره لكن لو بيحصل للعربيه uplift ... بمعنى ان الهوا اللي بيعدي تحتها يخفف وزنها النسبي يبقى التماسك ضعيف ... و بالتالي ضاع الثبات .... فالوزن مفيد في التماسك grip ... لأنه بيرسي العربيه على الارض ... و ليس في الثبات ... لأنه بيأثر سلبيا في المنحنيات نتيجه قوه الطرد المركزي بسبب وزن العربيه ... لكن في نفس الوقت التماسك بيفيد في الثبات ... الكلام مش متناقض ... لكن العلاقات فيها تعارض ( وزن - تماسك - ثبات ) وتوزيع الوزن اهم من الوزن ... ودي قصه طويله اوي .... لكن عموما مرسيدس من اقدم الشركات اللي راعت النقطه دي .... علشان كده ابيزا بيحس بثبات ممتاز بال 280 ... قاعده عجلات طويله ... توزيع مثالي للوزن ... كاوتش عريض ... ده طبعا غير تقنيه مرسيدس و انظمه التعليق .... ربنا يباركلكم فيها يا ابيزا ... معلش انا حاسس انكم بتتكلمو في وادي و انا مع نفسي في وادي تاني ... بس اصل الموضوع نسبي و في عوامل و متغيرات كتيره جدا ... يعني مفيهوش اوي صح و غلط ... على اد ما فيه متغيرات و عوامل ايجابيه و سلبيه ... يعني ممكن نقول ان دي بعض العناصر اللي تأثر على ثبات العربيه عرض الكاوتش ارتفاع العربيه (الارتفاع الكلي - الخلوص عن الارض ) وزن العربيه توزيع وزن العربيه نوع العفشه و حالتها الانسيابيه طول وعرض قاعده العجلات تماسك الاطارات بالطريق وحالتهم و نوعهم الانظمه المساعده نوع الجر :- امامي - خلفي - 4×4 ptmnlo123per154 الشكل :- سيدان - هاتشباك - MPV دول اللي جم في دماغي دلوقتي واسف على الرغي ... بس اصلي بحب اوي المواضيع دي ... و مبسوط بالنقاش .. بينعش الذاكره و يشغل دماغ الواحد ptmnlo123per1105 ما تتكلم يا سومو .... مش دي داخله في الحته بتاعتك برضو |
رد: كلام في السيارات 1(حازم خضر)
شكرا يا فادى باشا على المعلومات القيمة بس كلامك بيشجعنى انى اطرح سؤال ....
ماذا تعنى لك لكمة ثبات ؟؟؟؟؟ هل هو ان العربية ماتميلش فى المنحنيات و لا ماتتزحلقش فى المنحنيات ولا الهوا مايوديهاش و يجيبها على السرعات العالية فى خط مستقيم .... يعنى من وجه نظرك بغض النظر عن انواع الثبات الرياضى و الراحة الداخلية.... امتى تقول العربية ثباتها ممتاز ؟؟؟؟؟؟؟ شكرا يا سامى باشا على مشاركاتك المفيدة و التى تنم عن دراية حقيقية و كلام حضرتك كله صح و منطقى و طبعا معروف ان الوزن بيتناسب عكسيا مع الثبات علشان قوة الطرد المركزى زى ما حضرتك تفضلت و فى الحالة دى ممكن نقارن ثبات السيتروين بالبورش مثلا بما ان وزهم اقرب لبعض :) الفكرة اللى انا بقوله ان فعلا المرسيدس قادرة بشكل غريب بانظمتها و تقنياتها على تخفيف العامل ده جدا ... طبعا هى مش هتتحدى فيزياء الكون ولا حاجة بس بتعالجه بمستوى عالى جدا و زى ما قلت قبل كدة البى ام الفئة الخامسة مثلا فيها تلات أو اربع مستويات من الثبات بتقدر حضرتك تختار بينهم و انت سايق و انا شفت حلقة عنها مش فاكر فى برنامج ايه و هما مشغلين الثبات الكامل ده و بيجربوها فى المطر ... والله العظيم فعلا بقى بتتحدى قوانين الطبيعة العربية ماشية على جبل طالع نازل و منحنيات و مطر و شد و فرامل ... ان العربية تتتعع من مكانها ولا تتزحلق سنتى مفييييييش... تحس انها ماشية على قضيب قطر او لانش ماشى فى المية بتاعت المطر بكل سهولة و سلاسة..... فا كلام حضراتكم صح بالنسبة لقوانين الثبات .... انما الالمانى يفوق كل التوقعات بجد و علشان كدة بنصح بالتجربة و ليس الكلام فقط علشان تعرفوا يعنى ايه ثبات و برده مش مقتنع ان ثبات الستروين او البيجو مثلا احسن من الالمانى :) لا طبعا والف لا ... اعذرونى يا جماعة بس انا والله مجرب المرسيدس و البى ام دول .. بجد مافيش ولا كلمة ..... انتو هتخلونى اروح ااجر ستروين علشان اروح اجربها بس . و اقارن بين ثباتها و ثبات الالمانى ... مع انى عارف النتيجة من قبل ما اجرب لكن علشان اقطع الشك الواحد فى المليون باليقين .... تنصحونى اجرب سيتروين ايه يا جماعة ... ايه اثبت عربية عملتها ستروين علشان اروح اجربها ؟؟؟؟؟؟؟؟ صحيح و لو حد شاف فيلم رونين بتاع روبرت دى نيرو كان فيه مطاردة بين بيجو و بى ام شوفو الفرق بينهم فى الثبات البى ام وحشششش بينما تتراقص البيجو يمينا و يسارا ......طبعا ده مش مبرر ولا حاجة بس حاجة افتكرتها قبل ما اخلص الرد بتاعى ... و اوعو تفتكروا انى باخد معلوماتى من الافلام :) انا لا اقتنع بعربية الا بعد تجربتها و شكرا لحضراتكم جميعا |
| الساعة الآن 02:50 PM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017